InfoHub Logo

Balalarymyzdyń ómirine jaqsy nemese jaman áser etetin tárbıeshilerdiń kóp ekenin baıqadyq. Sol tárbıeshilerdiń ishindegi eń áserlisi — áke-sheshe. Iaǵnı, balanyń tálim-tárbıesinde áke-sheshe basty rólde oınaıdy.

Áke-shesheniń ornyn eshkim basa almaıdy, óziniń rólin tastap eshqaıda qasha almaıdy. «Qasha almaıdy» dep jatqan sebebimiz, keıde ata-ana qol ustasyp alyp, bala tárbıesindegi jaýapkershiliginen qashqysy keledi. Sóıtip, jaýapkershilikti ata-ájege, bala kútýshige, balabaqsha tárbıeshisine nemese mekteptegi muǵalimge laqtyrǵysy keledi. Keıde ata-analardan «myna mektep nege durys tárbıe bermeıdi», «balama ádepti úıretpeı muǵalim qaıda qarap júr?» degen shaǵymdardy jıi estımiz. Mine, osylardyń bári jaýapkershilikten qashýdyń belgisi. Negizinde, mekteptiń jáne mektep muǵalimderiniń basty jaýapkershiligi balanyń bilimi ekeni barshamyzǵa málim. Al balanyń tárbıesine tikeleı jaýapty — balanyń ata-anasy.

Halyq danalyǵynda «Bir ákeniń tárbıesin júz mektep bere almaıdy» degen tamasha sóz bar.

Keıde áke bala tárbıesin túgelimen derlik áıeliniń moınyna ile salady. Jalpy alǵanda, bala tárbıesindegi eń basty ról — ákeniki. Biraq qoǵamymyzda kóptegen ákeler bul jaýapkershilikti sezine almaı júrgeni qynjyltady. Kóptegen ákeler balanyń materıaldyq qajettiligin qamtamasyz etýmen ǵana shektelýde. Iaǵnı, balalaryn mektepke alyp baryp, alyp kelý, tamaǵyn, kıimin qamtamasyz etý sekildi ǵana qyzmettermen shekteledi. Árıne degenmen búgingi qoǵamda materıaldyq jaǵdaı aldyńǵy orynda. Biraq balańyzǵa rýhanı, ımanı tárbıe berý materıaldyq jaǵdaı jasaýdan buryn turýy kerek.

E.Ertaıuly

---