InfoHub Logo

Aqtyq saǵaty jaqyndap, ahıretke kóshkeli jatqan bir dindar adam zeketi men sadaqasy berilgen adal dúnıe-múlkin balasyna mıras etip qaldyrmaq nıetpen oǵan: «Balam! Ómir baqı adal jolmen taýyp, joq-jitikke aqysyn bergen myna dúnıe-múlkimdi saǵan tastap baramyn. Biraq sońǵy ósıetim bar. Men qaıtys bolǵannan keıin súıegimdi jýǵan moldaǵa aıt, meniń denemdi tabytqa qoıarda aıaǵymnyń birine jyrtyq, eski shulyq kıgizsin», — deıdi. Ákesiniń sózderin zer salyp tyńdaǵan balasy onyń osy ósıetin oryndaýǵa ýáde beredi.

Kóp ótpeı álgi adam naýqastanyp, artynan kóz jumady. Barlyq alys-jaqyndary jıylyp «jaqsy adam edi» dep kóńil aıtysady. Molda da shaqyrylyp, súıegi jýylady. Osy kezde balasy moldanyń qulaǵyna ákesiniń ósıetin aıtyp sybyrlaıdy. Molda dúnıeden ótken adamǵa mundaı joralǵylar jasaý sharıǵatqa qaıshy ekenin aıtyp ruqsat etpeıdi.

Biraq balasy ákesiniń basynda turyp: «Onda turǵan ne bar? Ákemnen mynaý jyrtyq shulyqty da aıap tursyńdar ma?», — dep shulyqty oǵan kıgizbek bolady. Sonda bir qarıa kelip: «Balam, ákeń maǵan óler aldynda saǵan arnaıy jazylǵan bir hat qaldyrdy. «Balama myna hatty meniń súıegimdi tabytqa qoıyp jatqanda ber» degen edi. Al, qane ash, oqy, ne jazǵanyn kórelik», — deıdi. Sol jerge jınalǵan halyq tyńdaýǵa asyǵyp qulaq qoıǵanda, balasy hatty daýystap oqı jóneledi: «Balam! Munshama baılyqqa ıelik etken meniń halimdi mine kórip tursyń. Men artyma osynshama dáýlet qaldyrǵanmen olar maǵan eski shulyq ta kıgizýge ruqsat etpeı jatyr. Bir kúni men sekildi saǵan da eki metr bózden basqa esh nárse buıyrmaıdy. Maǵan qarap ǵıbrat al. Saǵan qaldyrǵan baılyǵyma mastanyp, tákapparlanyp, dinińdi umytyp ketýshi bolma. Joq-jitiktiń jaı-kúıin bilip, olardyń janyna tereń úńil. Mine, óziń kórgenińdeıqansha baı bolsań da, báribir ólgen soń dúnıeń qol bulǵap artyńda qalmaq. Qabirge kirerde ústińe jibek shapan turmaq, aıaǵyńa jyrtyq shulyq ta buıyrmaıdy!».

---