InfoHub Logo

Jumeken ertemen úıden shyqty da, sý soryp aqjem bolǵan qaraǵaı eskekti alyp, Esilge qaraı aıańdady. Jarqabaqtaǵy úıeńkiniń irgesinen qyp-qyzyl bolyp jalyn atyp kún shyǵyp keledi. Kún sáýlesi shashyraı tógilip tur. Bala balshyqty qyzyl jardan syrǵanap tómen tústi.

Jumeken kishkene qaıyǵyna minip, tómen qaraı yqty. Tómengi jaqta quryp qoıǵan aýy bar edi. Eskekti sırek sermep, aý qazyqtaryn uzaq izdep, shóp arasynan bireýin tapty. Siresip qatyp qalypty. Shetinen tartyp edi, áldeqandaı myqty kúsh qazyqty qolynan sýyra berdi. Jumeken shıyrshyqtalyp qalǵan aýdy ózine qaraı tartqanda qaıyq shapshań ilgeri syrǵı jóneldi.

Kúrekteı qońyr quıryq jarq etti. Jumekenniń betine  muzdaı sý shashyrady. Qaıyqtyń istik tumsyǵyn eńkeıtip, shaıqap-shaıqap qaldy. Bir sátte sý betine qaıta shyǵyp qarakók arqasyn kórsetti de, zor kúshpen boılaı jóneldi. Kishkene qaıyqty shapshań qozǵap, aǵynmen tómen yqty.

— Jumeke-en, bosa-at, sýǵa ketiredi, óldiń… óldiń… — dep dóń basynan aıqaılaǵan daýys estildi. Bala qaısarlanyp alǵan edi. Qaıyqtyń tekpishine aıaqtaryn tirep, siresip qatyp qaldy. Aýdaǵy alyp balyq kók Esildiń aıdynynda birese jaǵaǵa soǵyp, qaıta tereńge tartyp, damylsyz jantalasady. Jumekenniń mańdaı teri burshaqtap kózine quıylyp, túk kórsetpeıdi. Jeńimen sıpap tastaýǵa da ýaqyt joq, qoly siresip qatyp qal­ǵan.

Qansha ýaqyt ótkenin kim bilsin, bir kezde balyq saıabyrsı bastady. Júrisi baıaýlap, álsireı berdi. Sý ishinde ıreleńdep baıaý jyljydy. Balyq tik jardyń astymen keledi. Tóbege tóne túsip buıra taldar tur. «Birine qolym ilikse eken» deıdi Jumeken. Bir kezde jaǵadaǵy kók taldan ustaı aldy. Balyq qaıta týlady. Biraq alǵashqydaı bulqynys joq edi, jelbezekterin jelpip turyp qaldy…

Aǵyndy boılaı dabyrlasyp jurt jetkende, Jumeken nán shortandy qaıyqqa aýdaryp salyp, terin súrtip otyr edi. Kópshilik jyrtqyshtyń kúmisteı jarqyraǵan baýyryna qarap, qýana tańyrqasyp turdy.

— Áı, órkeniń óssin, balyq jekken Jumeken! — desip, qoshemet sózderin jaýdyrsyn kelip…

---