InfoHub Logo

— Jáki-ish!

— Báıke-en!

— Bizdi izdep júr. Qashyp keteıik, sabap tastaıdy, — dedi Báıken. Jákish jylap jiberdi.

— Júr deımin, júr!

Báıken tartqylap edi, qolyn silkip tastady…

— Sabasyn, qaıta onymen qutyla almaımyz. Erteń mektepke barǵanda balalar taǵy kúledi, muǵalimder keııdi! — dedi Jákish óksip.

— Men bir aqyl taptym. Ekeýmiz tyǵylyp qalaıyq, olar izdeı bersin. Bizdi sýǵa batty dep esteri shyǵyp ábiger bolady. Tipti tirligimizden kúder úzedi. Sol kezde ap-aman, sap-cay úıge jetip baramyz. Bizdi bala­lar da, úlkender de naǵyz batyrlar deıdi, qyzyq bolady.

— Meniń apamnyń júregi aýyrady, — dedi Jákish.

— Sózdi qoı, júr tyǵylaıyq, az ǵana ýaqytqa tasalana turaıyq.

Jákish yqylassyzdaý erdi, ekeýi baqsha shetindegi alabotanyń arasyna jasyryndy. Kól jaqta bulardyń atyn atap aıǵaılaǵan daýystar estiledi.

— Sen otyra tur, men barlap keleıin, jaraı ma?

Jákish basyn ızedi. Uzaq tosyp otyrdy. Daýystar azaıyp, aýyl tynyshtala bastady. Aspan ashylyp, juldyzdar samsap tur. Qýraı basy aqyryn yrǵalady. Balaýsa kók pen shirigen kóń ıisi bar. Jákish zerigip ketti. Úıine barǵysy keledi. Ýádeden taıýǵa bolmaıdy. Qaıta otyrdy. Tizesinen sý ótip qaltyrap barady.

Bir kezde tý syrtynan ıt bolyp abalap Báıken shyǵa keldi. Jákish yrshyp tústi. Anaý shegi qata kúldi.

— Otyr, mine mynalardy ákeldim, — dep, bir etek jasyl qıardy aqtara saldy.

— Urlap aldyń ba?

— Joǵa.

— Endi qaıdan?

— Oıbaı, ózimizdiń úıdiń baqshasynan aldym, je! — Báıken bir úlkenin kóıleginiń etegine súrte salyp  Jákishke ustatty.

Jákish urtyn bultańdatyp qıardy kemirip otyr. Ekeýin jep, úshinshisin bastaǵanda, qara bala taǵy tyıymsyz kúlkisine basty.

— Ótirik aıtam, ózimizdiki emes. Rysbaı shaldyń baqshasynan qaǵyp kettim. Kık-kık, ha-ha-a!

Qıardy qapsyra tistegen boıy Jákish otyryp qaldy. Kózi sharasynan shyǵyp barady. Birde kóktemde qarttyń osy qıardy egip júrgenin kórdi. Sýalyńqy jaǵyna qaptaı ósken aq saqalynan ter tamshylaıdy. Ataıdyń sondaǵy ystyq terine ósken qıardy túkirip tastady. Aýzy ter tatyp ketti. Júregi  loblyp barady.

Jákish alabotany japyryp júgire jóneldi.

— Áı, tura tur, toqta-a!

---