InfoHub Logo

Meniń qadirli oqyrmandarym! Zor iltıpattaryńyz, meniń «Qaraǵandy» romanyma arnalǵan búgingi jazýshylar konferensıasyna oraı, ol shyǵarmama degen yqylas-nıetterińiz meni meılinshe tolqytty.

Lenın partıasy men Sovet ókimetiniń jańa ómir jasaýdaǵy,komýnızm qurylysshysy — jańa sovet adamyn tárbıelep ósirýdegi qudiretti kúshi men orasan zor qyzmeti búkil jazýshylyq eńbegimniń uzyna boıynda meni únemi tolǵandyryp, tebirendirip keledi. Men ózimniń boıymdaǵy búkil darynym men kúsh-qýatymdy partıa isine, halyq múddesine qaltqysyz, alańsyz baǵyshtaǵan jazýshymyn. Meniń tvorchestvomnyń ózegi, arqaýy, negizi jańa zaman, jańa adam.

Qaraǵandy jaıynda, onyń adamdary jaıynda men kóp jyldardan beri qalam tebirentip kelemin. Sondyqtan da meniń búkil tvorchestvomnyń kúshi, irge tasy Qaraǵandy taqyryby, jumysshylar ómiri.

1939 jylda men Qaraǵandy qurylysy onyń adamdary jaıynda talaptanyp roman jazdym. Tyrnaq aldy iri shyǵarmanyń tıisti baǵasyn oqyrman jurtshylyq kezinde bergen bolatyn. Sodan keıin men birneshe jyl aýyl ómirine boı uryp kettim. Kolhozdy aýylǵa, onyń ozat adamdaryna baǵyshtalǵan «Mıllıoner», «Shyǵanaq Bersıev» romandaryn jazdym.

Qalaı degenmen, sosıalısik Qaraǵandy taqyryby meni únemi tebirentip, tolǵandyryp keledi. Sonymen 1950 jyly «Qaraǵandy» romanyn jaza bastadym. Eńbek aıaqtaldy. Jurtshylyq sarabyna berildi. Meniń jańa romanyma oqyrmandar qaýymynyń osynsha kóńil bólip, keń túrde pikir bildirgenderine meılinshe qýanyshtymyn.

Roman qaharmandarynyń attary oıdan shyǵarylyp, ózgertilip qoıylsa da, sizderdiń kópshilikterińiz olardyń túpki tórkinin — janama beınelerin aınytpaı tanydyńyzdar. Máselen, «Qaraǵandy kómir» tresiniń basqarýshysy Sherbakovty sizder osy basseıinniń alǵashqy qurylysshysy — Gorbachev dep bildińizder. Meniń romanymdaǵy basqa qaharmandardyń da negizgi beıneleri Qaraǵandy qurylysyna belsene qatysqan shahterler, ken barlaýshylar, ınjenerler, jumysshylar, partıa, sovet qyzmetkerleri. Olardyń kópshiligi búgingi osy konferensıaǵa qatysyp otyr.

Sizderdiń qaltqysyz dostyq keńesterińiz, eskertpelerińiz meniń keleshektegi jazýshylyq eńbegime zor kómek, úlken súıenish bolady.

Men sizderge ózimniń tvorchestvolyq josparymdy aıtaıyn. Men Qazaqstan qara metalýrgıasynyń tuńǵyshy — Temirtaý bolat qorytýshylary jaıynda kórkem fılm senarıin jazýǵa kiristim. Sonymen qatar, Temirtaý týraly romanǵa kerekti derekter jınaımyn. Áıtkenmen Qaraǵandy taqyrybyn da tastamaımyn. Taıaý ýaqytta Qaraǵandynyń batyr shahterleri ómirinen pesa jazbaqpyn.

Partıamyzdyń tarıhı XIX sezi meni jańa shyǵarma jazýǵa shabyttandyrdy.

Qymbatty oqyrmandarym, meniń tvorchestvoma osynsha kóńil bólip, qurmet kórsetkenderińizge taǵy da ystyq yqylaspen alǵys aıtamyn. Sizderdiń bul syı-qurmetterińizdiń esesin ózimniń jańa kitaptarymmen qaıyramyn. Buǵan senińizder!

1952

---