InfoHub Logo

Nartaı úlkenderdiń ruqsatyn áreń aldy. Alǵashynda ájesine qyńqyldady.

«Ákeńnen sura» dedi. Ákesine shetin shyǵaryp edi, «bolmaıdy» dep bir-aq kesti. Bolmaǵan soń, atasynyń qulaǵyna sybyrlady. Atasy aralasqan jumystyń óz yńǵaıyna sheshiletini belgili ǵoı. Kún bata jaqsy habar estidi.

— Barsań  bar, — dedi atasy shaqyryp alyp. — Biraq, «tentektik jasamaımyn» dep ýáde ber!

— Ýáde berem! — dedi Nartaı qolma-qol.

— Jaqsy, — dedi atasy sózin ary jalǵap. — Salt-dástúrmen tanysady dep ájeń men ákeńdi áreń kóndirdim. Shynymen de bul jaqsy dástúr. Shet jaǵasyn kóre ber. Ózińnen úlken ul-qyzdardyń ónerin tamashala, ónegesin úıren. Sonan soń kisiniń úıinde uıyqtap qalyp júrme, uıat bolady. Taraǵanda eresek balalardyń bireýi jetkizip tastasyn.

Kıinip syrtqa shyqqany sol edi, kórshi úıdiń balasy Jaqaý keldi entigip.

— Qalaı boldy? — dedi jaqyndaı bere.

— Atama aıtyp júrip áreń shyqtym, — dedi Nartaı ústi-basyn retke keltirip.

— Jaqsy, onda kettik!

Kelse, osy mańaıdaǵy jigit bop qalǵan úlken balalardyń birazy jınalyp qalypty. Barlyǵy toıǵa kelgendeı bolyp kıinip alǵan. Gúl bolyp jasanǵan boıjetken qyzdar kirgende, bular amalsyz aýyz bólmege shyǵyp ketti. Biraq esik ashyq bolǵandyqtan tórgi úıde ne bolyp jatqanyn kórip-bilip otyrdy. Bir kezde Ámir degen bala ornynan turyp sóz bastady.

— Dostar, qosh keldińder! Ýaqytty ozdyrmaı, tamashamyzdy bastaıyq. Ózderiń biletindeı, osy úıdiń úlkenderi jolaýshylap ketken. Qazir úıdiń ýaqytsha qojasy synyptasymyz Gúlim. Ol synyptaǵy basqa qyzdarmen aqyl dasyp «bastańǵy» jasaıyq dep kelisipti. Bul jaǵdaıdan Gúlimniń apasy da habardar. Ortamyzda bóten eshkim joq. Óz synyptastarymyz ǵana. Bıyl mektep bitiremiz. Onan soń basymyz kóp qosyla qoımas. Endi tamashamyzdy bastaıyq. Ortamyzda synybymyzdyń ánshileri, aýdanymyzǵa tanymal aqyndar otyr. Aldymen solar bastasa, basqalar qarap qalmas. Áýeli men aýyldyń alty aýyzyn aıtyp bereıin. Ámir qasynda turǵan dombyrasyn alyp, birneshe án shyrqady. Nartaı ań-tań.

— O, qandaı myqty ánshi! — dedi qasynda otyrǵan Jaqaýǵa.

— Qazir meniń Gúlim ápkem án aıtqanda talyp túsesiń, — dedi Jaqaý maqtanyp. — Seni osyndaı ánshilerdi tyńdasyn dep ádeıi shaqyrdym ǵoı.

— A! Gúlim ápke de myqty ánshi me? — dedi Nartaı odan saıyn tańǵalyp.

— Iá. Ony aıtasyń… ol degen aqyn. Ázir bireýmen aıtysatyn shyǵar…

Aıtqandaı-aq, sálden soń aıtys bastaldy. Óte qyzyq aıtys boldy. Eki jaqty kezek tyńdaǵan qyz-jigitter kúlkige batty da qaldy.Tamaq jep bolǵan soń Nartaı men Jaqaý dalaǵa shyqty.

— Bastańǵy degen osyndaı bolady eken ǵoı. Qandaı qyzyq! Osyndaı qyzyq keshke shaqyrǵanyń úshin saǵan raqmet! — dedi dosyna qol usynyp turyp.

---