InfoHub Logo

Qyrsyq qylǵanda, sol kúni sabaq boldy. Muny bilgen Nartaı qatty qamyqty. Endi-shi! Búgin Ulman ájeı aýylda birinshi bolyp Naýryz kóje bergeli jatyr. Bir jyl boıy kútken kójeden qur qalatyn boldy ǵoı! Ony aıtasyz, bir jasqa óspeı qalýy da múmkin áýeli. Ájesi solaı degen. Alǵashqy Naýryz kójeni ishken kúni adam bir jasqa ósedi eken. Al ishpeı qalsa, bir jas óspeı qalady degen sóz ǵoı! Qaıtpek kerek?! Barmaıyn dese taǵy bolmaıdy. Óte mańyzdy sabaq. Muǵalimniń ursatyny eshteńe emes-aý! Bir sabaq jiberip alsań keıin qýyp jetý qıyn. Sony oılap taǵy qınaldy. Endi qaıtti?!

Ózi oılanyp sheshe almaǵan soń, aıańdap ájesine keldi.

— Áje, oqýshy úshin sabaq mańyzdy ma, álde naýryzkóje mańyzdy ma? — dedi tuıyqqa tirelip turǵany óńinen aıqyn baıqalyp.

— Oqýshy úshin, árıne, sabaq mańyzdy,— dedi ájesi oılanbastan.

— Onda men… búgin Ulman ájemniń naýryzkójesin ishpesem, bir jasqa óspeı qalatyn boldym ǵoı?

— A, ol ma… ol jaǵy ońaı, — dedi ájesi Nartaıdyń ishki oıyn oqyp qoıǵandaı meıirlene kúlimsirep. — Bul ońaı sheshiletin másele.

— Qalaı?

— Sen sabaqqa alańsyz bara beresiń. Ulman ájeńniń úıine atań ekeýmiz baramyz. Kójeni sabaqtan kelgen soń ishesiń.

— Qalaı? Ulman ájemniń úıine baryp pa?

— Joq. Naýryzdyń óz jol-joralǵysy bolady. Barmaı qalǵandarǵa ydysqa quıyp barǵandardan berip jiberedi. Muny «sybaǵadan qur qaldyrmaý» deıdi. Barmaı qalǵan adam óz sybaǵasyn ózi úıinde ishedi. Sen muny bilmeýshi me ediń?

— Joq, bilmeımin. Endi estip qýa nyp otyrmyn. Jaqsy boldy ǵoı. Ulman ájemniń naýryzkójesin ishe almaı qalatyn boldym dep qatty ýaıymdap edim. Endi sabaqqa alańsyz baratyn boldym. Biraq, áje, siz umytyp ketpeńiz.

— Joq. Alańdama, qulynym! Men umytsam da, Ulman ájeń umytpaıdy. Óıtkeni, sybaǵa berý — olardyń mindeti.

— Onda jaqsy, áje! Men mektepke kettim.

Ýaıymy seıilgen Nartaı mektepke daıyn dalý úshin óz bólmesine qaraı buryldy.

---