InfoHub Logo

— Nartaı! — dedi art jaǵynan bir kisi. Nartaı jalt qarady.

Anda-sanda kóretin, eki-úsh úıdiń arjaǵynda turatyn kórshi áje eken. Toqtap, shamaly kútip turdy da:

— Amansyz ba? — dep amandasty jaqyn kelgen soń.

—Aman ba, balam? Atań keldi me? — dep surady qasyna kelgen kórshi áje.

— Joq, — dedi Nartaı tańdana qarap.

— Saǵyndyń ba?

Nartaı únsiz basyn ızedi.

— Men bir habar estidim. Atań kelmeıtin bolypty, — dedi kórshi áje jymıyp. Sony aıtyp, qaıter eken degendeı Nartaıǵa synaı qarap bir sát turdy da: — Sol jaqtan bir kempir alyp, sen sekildi nemere taýyp alypty. Endi ájeń ekeýińe qıyn bolatyn boldy.

Nartaı tiksinip qalǵanmen, senbedi. Atasynyń olaı istemeıtinin jaqsy biledi. Ekinshiden, kórshi áje kúlip turyp aıtty. Úlkenderdiń  keıde óstip qaljyńdaıtyny bar. Shamasy, sondaı-sondaı birdeńe.

— Sendiń be? — dedi azdan soń kórshi áje Nartaıdyń betine qarap.

Nartaı kúlip, basyn shaıqady.

— Ótirik aıtam. Atań óıtpeıdi. Ketkeli biraz boldy, keldi me… bileıin degenim ǵoı, — dedi kórshi áje qatarynda kele jatqan Nartaıdyń basynan sıpap. — Kelip qalar… ájeńe aıt! Toqym qaqsyn! Sonda tez keledi.

Nartaı túsingen joq. Biraq bul sózdi ájesine aıtyp barýǵa ýáde berdi.

— Ájeńe sálem aıt! Men aıtqan sózderdiń bárin umytpaı, aıtyp bar, — dedi kórshi áje aıyrylysar tusta taǵy da kúlip.

—Maqul!— dedi Nartaı buryla bere.

Kelgen boıda bolǵan jaıdy túgel aıtyp berdi. Ájesi kúldi de qoıdy.

— Kúlaı ǵoı… — dedi sálden soń. — Ol sóıtip qaljyńdasyp júredi. Atańdy naǵashym dep ázildesedi.

— Áje, toqym qaǵar degen ne? — dedi Nartaı artynsha.

— Toqym qaǵar degen… atań sekildi jolaýshylap ketken kisi keshikkende, sony syltaý qylyp, jınalyp ishetin bir sháýgim shaı. Kórshi-qolań bas qosady. Jaqynda ǵana jol júrip kelgen taǵy bir kisiniń toqymyn ákep qaǵady. «Toqym qaǵar» degen sodan shyqqan bolý kerek. Biz de qaǵaıyq. Azdan soń baryp jańaǵy Kúlaı ájeńdi shaqyryp kel. Erteń keshke dep. Qalǵan kórshilerdi ózim shaqyraıyn, — dedi ájesi toqtap qalǵan sharýasyna buryla berip.

---