InfoHub Logo

«Qarasaz» kolhozynyń predsedateli Jortaqbaı keńsege qatty ashýlanyp kirdi. Qabaǵy túksıip, óńi tútigip, qaraýytyp ketipti. Tipti qatty ashýlanǵandyqtan esik aldynda turǵan birsypyra kolhozshylarmen amandaspaı, óz kabınetine de barmaı birden býhgalterler bólmesine bettedi.

Ashýshań bastyqty bárimiz de sógemiz. Biraq búgin ashýlandyń dep Jortaqbaıdy sógýge bolmaıtyn edi. Ashýlanbaǵanda qaıtsin, egin sýdan qalyp barady, otyrǵyzylyp bolmaǵan temeki anaý. Kók brıgadasynyń jumysy múldem bastaýsyz jatyr. Aýdan aqpardy buryn bes kúnde bir suraýshy edi, kolhozda telefon ornaǵaly beri qulaqqa tynyshtyq joq, aýatkomdegi áne bir badyraq kóz qara qyz taqyldap tynyshyńdy alady.

Tipti kúndegisin bylaı qoıǵanda balalar ıaslıinde isteıtin bes áıeldiń beseýi de jumysqa shyqpaı qalypty. Iaslıdiń esigi ashylmaǵandyqtan bes brıgadadaǵy jıyrma shaqty balaly áıel úıinde balasynan shyǵa almaı shyrmalyp qalypty. Iaslıde isteıtinderdiń birdi-ekilisi bolmasa kóbi belsendilerdiń áıelderi edi. Jeńildeý jumys, mańdaı kúnge tımesin, shyjyǵan ystyqta bir-bir ýaqyt kóleńkede otyrǵannyń ózi de bir ǵanıbet qoı desken. Endi mine, bulardyń kesiri brıgadaǵa tıip baqandaı jıyrma adam jumysqa shyqpaǵan.

Jortaqbaı daladan qatty kelgen kúıi bas býhgaltershe jekı túıile sóıledi:

— Seniń áıelin nege jumysqa, ıaslıge barmaı qaldy?

Býhgalter sasqan joq, jaı ádemi sybyzǵy daýyspen jymysqyp qana:

— Búgin sizdiń úıdegi Jaýhar jeńgeıge bolysatyn edi,— dep lypyń ete tústi. Predsedatel ne aıtaryn bilmeı bar ashýynan aırylyp, sylqıdy da qaldy. Al býhgalter tisin kórsetip yrjıyp kúlgen boldy.

---