InfoHub Logo

Búlkibaı maıdannan bir qolynan aırylyp qaıtty. Onyń shyntaǵynan joq qolyna protez jasaldy. Al ekinshi qolynyń da eki saýsaǵy oqqa ushqan edi. Qolynan aıyrylyp qaıtqan eri Salıhaǵa burynǵydaı súıkimdi kórinbedi. Búlkibaıdyń qolynyń syqyryn estigende Salıhanyń shekesine bireý bizdi suǵyp, qaıta sýyryp alyp, damylsyz osyny qaıtalap turǵandaı kórinetin boldy. Onyń ústine on shaqty kúnnen beri turmaı, tósek tartyp jatyp alǵany da etip ketti.

Erkegi joqta jol alyp, jaman úırengen Salıha Búlkibaı tósek tartyp jatqaly beri sholaq kúıeýdi mensinýdi qoıdy. Tipti ol keı kúnderi jarym túnde qaıtyp júrdi. Qasyp-qasyp aqyryndap aıtqan Búlkibaıdyń cosyn ol qulaǵyna ilmedi. Bir kúpi tipti eri qansha jalynǵanmen Salıha býynyp-túıinip birjola ketpek boldy. Kıimin tegis qattap, qol sandyǵyna salyp, esikke qaraı endi betteı bergende, kúıeýi Salıhaǵa tura turshy degendeı ıshara bildirdi.

Áıel jalt burylyp Búlkibaıdyń betine týra qarady. Salıhanyń jarq etken nurly júzi qyzaryńqyrap, qany syrtyna teýip, dolylyqtan qyzarsa da ádeıilep boıap qoıǵandaı kórindi. Onyń júzinin. sulýlyǵy sonsha — betinen ashý izi bilinbeı, qaıta syrtqa tepken qan ony sulýlandyra túsipti. Onyń ádemi qyr muryny, keskindi keıpine aıryqsha kórik berip turǵandaı. Eki tanaýynan kún kórinedi degen sulý da osy Salıha shyǵar. Qandaı kórkem kelinshek! Qaraqat kóz, jaınaǵan júz, totysha qubylyp tur. Endi osyndaı kelisti betti bireý aımalap, shıqandaı erindi, oımaqtaı aýyzdy bireý súıedi-aý!

Múgedektiń ishi qazandaı qaınady. Tipti ý iship óle ketkisi de keldi. Onyń ishin qyzǵanysh oty jegideı jep, álep-jalap jiberdi. Ne isteý kerek? Asyl erke alys saparǵa attanyp barady, osyndaı aı dese aýzy, kún dese kózi bar perızatty qandaı ǵana kózder qıady.

— Bir sát týra turshy,— dedi ol áıeline,— shyn ketemisiń? Men óz basym seni qımaımyn. Mynaý tatý kúnderdiń aıǵaǵy — eki balany kimge tiri jetim etip qoıamyz. Oılansań etti.

Áıel qatty ketti.

— Joq men jarym adammen týra almaımyn, men perishteniń balasyndaı kórkimmen qasqyrdyń asyǵyndaı mújıyp turǵan seni qaıtem. Bala bolsa, qalady da ákesin saǵalap.

Kúıeýiniń qyzǵanysh oty ishin jalap barady. Óle ketý ońaı emes, óz janyn qıa almaıdy. Áıeliniń ábden buzylyp alǵanyna, ketetinine Búlkibaıdyń kózi jetip kúıip ketti.

— Anyq keter bolsań— dedi eri,— on jyl birge turdyq qoı, eń bolmasa betińnen bir súıgize ketshi!

Áıel burylyp kúıeýiniń janyna keldi.

— Eńkeıseńshi beri taman, bir qushyp súıeıin.

Múgedek jalǵyz qolymen áıelin qapsyra qatty qushaqtady. Áıel de eńkeıip, otyrǵan kúıeýine betin tosa berdi. Osy kezde Búlkibaı súıe beremin dep ádemi qyr murynnyń ushyn qyrshyp, julyp aldy. Kelisti bettiń sánin keltirip turǵan muryn eken, keńireıip keńsirigi kórinip qaldy. Kókıgen tanaý budan keıin qansha kóterilmek bolsa da, túbin sý oryp ketken eski dýaldaı mujıyp, jyrymdanyp qala berdi. »

---