InfoHub Logo

Shata[nyń týǵan jeri] qazirgi Pavlodar oblysy, Baıan aýdany, rýy — Aıdabol. Shatanyń shyn aty Jalmaǵambet eken. Ákesiniń aty — Dúrildek degen adam. Shatanyń ákesi jasynda ólip qalyp, sheshesi Aıdana deıtin adam jesir qalyp, Shatany tárbıelep, arqasyna arqalap asyrap ósirgen eken deıdi.

Shatanyń ózi de, ákesi de óte kedeı bolǵan. Bylaısha aıtqanda saýarǵa sıyry da, minerge aty da bolmaǵan. Shatanyń ózi de, sheshesi Aıdana da baılardyń esiginde bolǵan. Bertin kele Shata er jetip, at jalyn tartyp minip, halyq qatarly adam bolady. Shatanyń bul halge jetýi anasy Aıdananyń arqasynda deıdi. Jalmaǵambet eldegi ekiniń biri, bylaısha aıtqanda ónerli, pysyq bolypty. Shata jasynan joqshylyq, zorlyqty kóp kóredi. Baılardyń, basqa bolǵandardyń kórsetken qıanattaryna shydaı almaı júredi.

Bir kúni Shata oılaıdy. Osy baılardan bolǵandardan kegin alýdyń jolyn qarastyryp, izdeıdi. Ákesi Dúrildek tiri kúninde Aıdabol Áıtenniń Ábishi deıtin kisiden ákesiniń kórgen qıanaty, zorlyǵy Shatanyń esine túsedi. Sonymen, Shata bir kúni burynǵy ýrádnıktiń kıimderin kıip alyp, beline qylysh baılap, qas qaraıyp, tún bola baǵanaǵy Ábishtiń úıiniń qasyna ózi sekildi aýyldaǵy 2-3 jigitti ertip alyp, ýrádnık bop kelip qalady.

Kelisimen Ábishti aıaq-qolyn bir ýys qylyp, jaýapqa shaqyryp, anany-mynany qysyp surap, onymen qabat:

— Sen bir kezde Baıan Dúrildek degen nashar adamǵa qalaısha zorlyq jasadyń? — dep suraqty kóbeıtip qysady. Sodan keıin Ábishti tal qoraptyń astyna jaýyp qoıady. Birazdan keıin Ábishti qoraptan shyǵaryp alyp, taǵy da qosymsha jaýap alǵan kisi bolyp, Shata Ábishke aıaǵyn sıpatyp, arqasyn qasytady. Sonymen tún ishinde eshnársege qaramastn Ábishke bar bilgenin istep, istegen qıanatyn qaıtardym degen eseppen
ótken istiń kegin Ábishten bir qaıyrǵan eken deıdi. Bylaısha aıtqanda, Shata ózi kedeı, eldegi ekiniń biri bolyp, ónerli, óte tildi, qýlyqshyl, taqpaqshyl, kúldirgish, ánshi, elden shyqqan qýtaban, alaıaq qýdyń naǵyz ózi dep esepteıdi eken. Shata — kek alýdyń jolyn ol kezdegi zorlyq ıelerine aqysyn jibermeýdiń jolyn kóp izdegen adam.

---