InfoHub Logo

Nege bolsa da qyzǵanshaq bir kisiniń úıine bir jolaýshy kelip qonypty. Qyzǵanshaq jolaýshydan kózin almaı: «áldene qylyp júrgen adam» degen oımen tań atyp, úıinen ketkenshe ańdýmen bolypty. Keter mezgilinde jolaýshy jótelip qalǵanynda qyzǵanshaqtyń áıeli de jótelip qalypty. Odan jolaýshy túshkirip qalǵanynda, áıeli ádeıi keliskendeı túshkirip jiberipti.

Jolaýshy ketken soń qyzǵanshaq áıeline:

— E... seniń bul jolaýshymen bir shatasyń bar eken ǵoı. Áıtpese teginnen- tegin ol jótelse jótelip, túshkirse túshkirip jumbaqtasqandaryń jaı emes. Men bul qorlyqty kórgenshe qańǵyryp óleıin, — dep áıelin tastap, qańǵyryp otyryp bir elge qonypty.

Jolda tymaý tıip, qonǵan úıinde jótelip qalǵanynda, úı ıesiniń de áıeli jótelip jiberipti, odan endi túshkirip jibergeninde, ádeıi ańdyp otyrǵandaı áıeli de túshkirip qalypty. «Bul qalaı» dep tańdanǵan qyzǵanshaq baıqap otyrsa, ózi syqyldy áıel de tymaýratyp otyr eken. Sodan dereý áıeliniń sol kúni tymaýmen aýyrǵany esine túsip «men áıelimdi bostan bos qyzǵanǵan ekenmin ǵoı» degen oı aqyl-esine kirip, áıeline qaıtyp kelip, qyzǵanshaqtyǵyn qoıýǵa ant bergen eken.

---