InfoHub Logo

Arǵy zaty, rýy — Qozǵan, onyń ishinde Oraz deıtin taptan shyqqan Qora deıtin óte nashar, kedeı adam bolypty. Bylaısha aıtqanda Qoranyń minerge aty, isherge asy bolmapty. Atsyz bolǵandyqtan, ógizge minip el aralaıdy eken. Biraq Qora ózi kedeı, nashar bolsa daǵy el ishinde pysyqsha tildi, sheshen, ótkir adam eken deıdi.

Bir kúni Qora ógizge minip, kádimgi ataqty Tánti degen bıdiń aýlyna kelgen eken. Sonda Tánti aıtqan eken:

— Eı, Qoram, seniń munyń qalaı? Seniń kelgeniń jaqsy. El aman, jurt tynyshta ógizge minip júrgeniń qalaı? Rýly el Qozǵannan, onyń ishinde Orazdan, Raqym men Tuıaqtan seni kóteretin jylqynyń bir taıy tabylmady ma? — degen eken.

Sonda Qora turyp aıtqan eken deıdi.

— Qaraǵym, Tánti, sen bı bolsań da, myrza bolsań da, óziń esiń. Men seniń jáne analardyń eshqaısysynan qystap at suramadym. Biraq rýly el Orazdy osy astymdaǵy ala ógizben birneshe ret aralap aınalyp shyqtym. Onyń ishinde óziń aıtqan Raqymnyń aýlyna da bardym. Itteri qamalap, úzeńgimnen aldy, olaı bolsa daǵy meni bulardyń eshqaısylary kózin salyp kórmedi. Kúnim týsa, bir kezde kórermin dep ógizimdi sanǵa bir salyp, júre bergen kúnim boldy, — depti.

Sonda Tánti bı aıtqan eken:

— Qoram, seniń sóziń ótti. Endi osy ógizben qaıda bara jatyrsyń? — depti.

Sonda Qora aıtqan eken:

— Bir jerde eki tyrnaǵym qalyp edi, sol tyrnaǵymdy izdep baramyn, — depti. Qoranyń bul sózine Tántiniń qasynda otyrǵan keıbir adamdar túsinbeı, bir-birine qaraı bergen eken deıdi. Biraq Tánti Qoranyń bul jumbaq sózin qatty túsinipti. Sebebi, Qoranyń bul sózi Qarakesekke bergen bir qyzy bolǵan eken. Ol qyzy sol bergen jerinde qaıtys bolyp, sol qyzynan eki jıen jas bala bar eken. Sony kórip qaıtýǵa izdep baramyn degen sózi eken.

Sonda Qoraǵa Tánti aıtqan eken:

— Qoram, erdi namys óltiredi, qoıandy qamys óltiredi. Astyńdaǵy ógizińdi tastap, ornyna bizden bir at minip ketińiz. Atasy basqa jat elge bara jatyrsyń ǵoı, — dep Qoranyń ógizin alyp qalyp, Tánti jylqysynan bir at aldyryp, Qoraǵa mingizip jibergen eken deıdi.

Sonymen Qora Qarakesekke baryp baǵanaǵy tyrnaǵym degen jıenderin kózimen kórip, amandasyp qaıtqan eken deıdi.

---