InfoHub Logo

Nartaı búgin úıden jalǵyz shyqty. Betalysy kórshileri Erlan aǵalarynyń úıi. Ara jaqyn, ázir-aq jetip barady.

Negizi Nartaı álginde ájesin de ertip almaq bolǵan.

— Áje,— dedi ol tańerteńnen beri syrmaq syryp otyrǵan ájesine qarap. Kıiz oıýlardyń jıeginen tebenin kósteńdetken ájesiniń oımaqty qolyna qarap otyryp ábden zerikken edi.

— Aý,— dedi ájesi nazaryn aldyndaǵy jumystan almaǵan kúıi.

— Erlan aǵalardyń úıine baraıyqshy!

— Nege… jaı ma?

— Barǵym kelip tur. Kishkentaı Erjandy kórgim keledi…

— A… onda óziń baryp kel… meniń qolym bos emes. Myna sharýany tezdetip bitirýim kerek.

— Uıalam.

— Uıalǵany nesi… kúnde baryp júrgen úıiń ǵoı…

Úndemeı qalǵan Nartaı oılanyp biraz otyrdy. Azdan soń ornynan turǵan. Kishkentaı Erjandy kórgisi keledi. Ótkende ájesi qolyna alyp, besikke salǵanda, onyń kip-kishkentaı qolyn, tyrbańdaǵan bolpaq aıaǵyn kórgen. Sol kóz aldynda qalyp qoıypty. Sodan beri taǵy bir kórgisi kelip júrgen.

Nartaı kelip, tabaldyryqtan attaǵanda kishkentaı Erjannyń apasy ony jańa bólep bolyp, emizip otyr eken. Nartaıdy kórip:

— Kele ǵoı, otyr, — dedi jymıyp.

Erjannyń anasy besikke asylyp otyryp, yńyldap án aıta bastady:

— Áldı-áldı, aq bópem,
Aq besikke jat, bópem!
Balapandaı muzbalaq,
Qanatyńdy qaq, bópem!

***
Áldı-áldı, áldı-aı,
Aspandaǵy juldyzym,
Sýda júzgen qundyzym,
İzgi isińe el súıiner,
Qas qyrandaı shúıiler,
Azamat bol, áldı-aı!

Tyńdap otyryp Nartaıdyń uıqysy kelgendeı boldy. Kelinshektiń maıda úni qulaǵyna maıdaı jaqty. Boıy maýjyrap, tyńdaı bergisi keldi.

— Balǵyn qolyń is alyp,
Baldyr moınyń kúsh alyp,
Bizdi baǵar ma ekensiń?!

***

Dúıim eldi bastaıtyn,
Qıyn jerde saspaıtyn,
Baq-dáýletke bastaıtyn,
Kósem bolar ma ekensiń?!

Boıyn alyp bara jatqan sıqyrly áýendi taǵy da tyńdaı túskisi keldi. Ádemi áýen baryp-baryp aqyryn aıaqtaldy.

Erjan uıyqtap qalypty. Besikti jaılap japqan apasy keri shegindi.

— Nartaı, jaısha keldiń be?— dedi sonda baryp sybyr etip.

Nartaı úndegen joq. «Áldıdi kórgeli keldim» degisi keldi, biraq aıta almady.

— Onda júr, shaı isheıik,— dedi kelinshek. — Birazdan soń Erjan oıanady. Sonan soń kóteresiń.

Ekeýi shaı ishti. Azdan keıin Erjan qyńqyldap oıanǵanyn bildirdi. Besikke baryp, kórpeni ashqan apasy ony birden sheship alǵan joq. Tizerlep otyryp taǵy da yńyldap ánge basty.

— Bópemdi sheship alaıyn,
Nur júzine qaraıyn.
Emin-erkin kerilip,
Qýandyrsyn mańaıyn.
Atasyn izdep barsa eken,
Baryp asyr salsa eken,
Qaıta kelip jatqansha,
Besikte uıqy qalsa eken! — dedi.

Besikke jaqyndaǵan Nartaı qol-aıaǵyn tyrbańdatyp jatqan Erjandy kórdi. Keremet jaqsy kórip ketti. Súıip alǵysy keldi. Sol oıyn sezgendeı anasy tynymsyz tyrbyńdaǵan Erjandy Nartaıdyń aldyna salyp berdi.

Nartaı ony qushaǵyna qysty. Bópeni ustaý qıyn eken. Jybyr-jybyr etedi. Biraq sondaı jaǵymdy. Nartaı rıza bolyp kúle berdi.

---