InfoHub Logo

— Tur,— dedi ájesi Nartaıǵa.— Aýylda toı bop jatsa, jata ma eken bala?

Nartaı uıyqtap jatqan bolatyn. Bastapqyda ájesiniń ne aıtyp jatqanyn túsinbeı qaldy.

— Áje, kimniń toıy?— dedi tańyrqap.

— Tańerteń Erlan aǵań kelip shaqyryp ketti. Búgin bópeleri Erjandy qyrqynan shyǵarady eken. Tur, tezdetip baraıyq. Keshigip qalsaq, uıat bolady.

İs mánisin endi túsingen Nartaı ornynan turyp, kıine bastady. Beti-qolyn jýyp kelip, shaıǵa otyrdy. Kımeshegin kıip, daıyn bolǵan ájesi syrtqa qaraı aıańdady. Nartaı ere ketti.

Bári ájesin kútip otyr eken. Úıge kiricimen qyzyq ister bastalyp júre berdi. Nartaı sonyń bárine tesile qarap otyrdy.

Ájesi áýeli aldyna dáý tegene aldyrdy. Onyń túbine úı ıesi bergen kúmis bilezik pen júzikterdi saldy. Úlken qasyqpen ólshep, qyryq qasyq sý quıdy. Sonan soń janyndaǵy kelinshekke burylyp:

— Al endi áldıdi ákel,— dedi.

Besikke salǵan kezge qaraǵanda Erjan úlkeıip qalypty. Kishkentaı aıaǵy men qoly tyrbyń-tyrbyń etedi.  Jylaǵan joq. Ústindegi jeıdesin sheship alǵanda da qyńq etpedi. Ájesi Erjannyń jeıdesine neshe túrli tátti, qurt salyp, asyqpaı túıip, taıaý turǵan kórshi úıdiń balasyn shaqyryp, qoınyna salyp berdi.

— Al endi dalaǵa shyǵyp, bólisip jeńder,— dedi. Bala bosaǵaǵa jetip, tabaldyryqtan attaı bere, bosaǵada ańdyp turǵan basqa balalar ony tura qýdy. Nartaı ornynan qozǵalǵan joq. Óıtkeni oǵan ishtegi sharýalar qyzyq edi.

Ájesi endi Erjandy qolyna alyp, shomyldyra bastady. Erjan batyr eken, jylaǵan joq. Tek denesin jýyp bolyp, basyna sý quıǵanda ǵana sál qyńqyldady.

— Al endi balanyń shashyn qaısysyń alasyń,— dedi ájesi jan-jaǵyna qarap.

— Men alam,— dedi Bákir ata jaqyndap kelip. Ustarasy ózinde eken. Jeńine janyp-janyp jiberip, eńkeıip Erjannyń shashyn alýǵa kiristi.  Erjan sonda baryp shirenip, jylaı bastady. Biraq bul kezde shash sypyrylyp ta bolǵan edi. Sábıdi qurǵaq oramalǵa orap alǵan ájesi:

— Al, kelinjan, mine, bópeń qyrqynan shyqty. Ómir-jasy uzaq bolsyn! Teń qurbysynyń aldy bolsyn! Endi úlkenderge aparyp batasyn alyńdar. Berse, shúıinshisin de alyńdar. Meniń shúıinshim bir qozy,— dedi Erjandy anasyna qaıtyp berip jatyp…

---