InfoHub Logo

Nartaı Erlan aǵalarynyń úıine erte kelip aldy. Óıtkeni kishkentaı Erjannyń tusaýyn keskeli jatqanyn ájesinen keshe estip alǵan bolatyn. Sol esinde, erteńgilik shaıyn ishti de, tartyp otyrdy.

Kelse kishkentaı Erjan da oıanyp alypty. Úıde sáki jaǵalap júr eken. Nartaıdy kórip, qolyn sozdy. Nartaı ony birden kóterip alǵan joq. Jaqyndap baryp, úsh-tórt qadam aralyq tastap turyp:

— Kele ǵoı, Erjan. Maǵan óziń júrip kel,— dedi eki qolyn jaıyp, ózine shaqyryp. Bulaı etýdi keshe ǵana úlkenderden kórgen bolatyn. Sony endi ózi istedi.

Erjan qulap qalýdan qorqa júrip aldymen Nartaıǵa qaraı buryldy. Ábden ornyǵyp turyp alǵan soń aıaǵyn apyl-tapyl basyp kelip

Nartaıdyń qushaǵyna qulady. Ózi áldenege máz. Nege ekenin, bul qylyǵyna Nartaı da qatty qýandy. Úlkender de máre-sáre kúlip jatyr.

— Búgin tusaýyńdy kesemiz, sosyn Nartaı aǵańa erip shaýyp ketesiń,— dedi qasynan ótip bara jatqan Erlan aǵasy.

Sálden soń mańaıdaǵy kórshiler de kele bastady. Uzamaı Nartaıdyń atasy men ájesi keldi aıańdap. «Áı, sen bizdi tastap, óziń ketip qalypsyń ǵoı»,— dedi buny kórgende. Keshikpeı dastarqan jaıylyp, shaı quıyla bastady. Sońyn ala «Tusaý kesý» rásimi de bastalyp júre berdi.

Adamdar eki jaqqa bólinip turyp, ortadan oryn qaldyryldy. İle eki áje Erjandy eki qoltyǵynan demep, tór jaqqa apardy. Sol sát kórshi úıdegi taǵy bir áje daıyn turǵan maıly ishekpen Erjannyń aıaǵyn tusady.

— Tusaýdy kim kesedi?— dedi artynan úı ıelerine qarap.

— Úlkendermen aqyldasa kele, tusaýdy demalysqa kelip jatqan Omar atanyń balasy, aýylymyzdyń maqtanyshy Berik kesse dep sheshkemiz,— dedi esik jaqta turǵan Erlan bir-eki qadam alǵa jyljyp.

— Áp, bárekeldi! Jón!

— Tabylǵan aqyl!

— Durys. Berik sekildi oqymysty jigit bolsyn degen ǵoı!— desti tórde otyrǵan úlkender.

Nartaıdyń júregin maqtanysh kernedi. Óıtkeni Berik onyń qalada turatyn kókesi bolatyn. Jaqynda demalysqa kelip, shóp shaýyp júrgen-di. İzdep edi, bosaǵa jaqta tur eken. İle sál yńǵaısyzdanǵan beınede júzi qyzaryp, tórge qaraı júrdi. Erjannyń aldyna kelgen soń, jaqyn turǵan áıeldiń qolynan báki alyp, júreleı otyrdy. Eńkeıip baryp «Bıssimılla! Júırik bol!» dep tusaýdy kesti.

Osy sátti kútip turǵan úlkender:

— Áı, bárekeldi! Berik aǵań sekildi elgezek azamat bol!

— Shaýyp ket endi súrinbeı!— dep tilek bildirip jatty dýyldasyp.

Tusaýy kesilgen Erjan máz. Aıaǵyn basyp ilgeri talpynyp edi, eki qoltyǵynan demep turǵan eki áje alǵa qaraı ala jóneldi.

— Qaz-qaz, balam, qaz, balam,
Qadam bassań máz bolam,
Qaz-qaz bolyp, tez basyp,
Qadamyńdy jaz, balam!
Tusaýyńdy kestik biz,
Kúrmeýińdi sheshtik biz,
Qadamyńa qaz basqan
Qutty bolsyn destik biz.
Qaz-qaz, balam, júre ǵoı,
Balaǵyńdy túre ǵoı,
Taı-qulyn bop shaba ǵoı,
Shaýyp báıge ala ǵoı!
Júgir jyldam, qulynym!
Jelbiresin tulymyń.
Elgezek bol, erinbe,
İlgeri bas, sheginbe!
Ala jipti alaıyq,
Aq ájeńe baraıyq,
Erjetti dep aıtaıyq,
Shashýyn jep qaıtaıyq,—

dep ándetip barady jatty ekeýi. Qarap turǵan Nartaı ań-tań.

---