InfoHub Logo

QR Bilim jáne ǵylym mınıstri Ashat Aımaǵambetov bilim salasynda qazaq tili álipbıin latyn grafıkasyna kóshirý úrdisi týraly túsinikteme berdi.

«Qanatqaqty jobanyń maqsaty tıisti nátıje alýǵa negizdelgen. Qazirgi kezde Mádenıet mınıstrligine osy baǵytta pysyqtaý sharalaryn júrgizý týraly tapsyrma berildi. Iaǵnı erejeler bekitilgennen keıin, biz qajetti jumystardy iske asyramyz», - dep toqtaldy mınıstr.

Osy oraıda latyn grafıkasyndaǵy jańa álipbıge kóshý prosesi uzaq ekenin atap ótti.

«Búginde bul baǵytta tıisti jetildirý jumystaryn júrgizý týraly Prezıdenttiń tapsyrmasy bar. Ázirge, jan-jaqty pysyqtalǵan ári bekitilgen nusqasy joq, sondyqtan 2020 jyly mektepte latyn grafıkasyndaǵy álipbımen oqytylady dep aıta almaımyz. Bul baǵyttaǵy jumystar tıisti ýaqytty qajet etedi. Aldymen erejelerdi bekitý kerek, keıinnen qanatqaqty joba júrgiziledi. Tek osydan keıin ǵana biz qajetti daıyndyqty júrgizemiz. Osy sharalar atqarylǵannan soń, oqý-ádistemelik quraldar men oqýlyqtar ázirlenedi», - dedi Aımaǵambetov.

---