InfoHub Logo

Búgin armansyz oınadym. Balalarmen birge Túıemoınaqtyń toǵaıyna baryp, qaraqatqa ábden toıdyq. Kókem men apam bolsa, qansha jalynsam da, jibermes edi. Olar tań alakeýiminen turyp aýdan ortalyǵyna ketken. Erteń bir-aq qaıtady. Al ájem óte jaqsy adam. «Birdeńege urynyp qalmasańdar boldy. Barsań, baryp kel» degen.

Kúni boıy baıqamappyn, úıge ábden sharshap qaıttym. Ájem aldyma ákelip qoıǵan asty ishýge shamam kelmeı, otyrǵan jerimdegi kórpeshege qısaıa ketippin. Ájem meni qalaı kótersin? Tek basymnyń astyna jastyq salyp, ústime kórpe jaýypty.

Túnniń bir ýaǵynda shyrt uıqydan oıanyp kettim. Keshke deıin jegen qaraqattan bolsa kerek, tilim aýzyma syımaı shóldep jatyr ekenmin. Bólme tastaı qarańǵy. Kózge túrtse kórgisiz. Ashyq terezeden salqyn samal esip tur. Bizdiń úıdiń janynan aǵatyn kishkentaı aryqtyń sýy syldyrap jatyr.

Sýsyn iship keleıin dep ornymnan kóterilgenim sol edi, edenge birdeńe jalp ete qalǵandaı boldy. Qorqyp qaldym. Kórpeshege júreleı otyryp alyp, tyń tyńdaı bastadym. As úıden ájem jatqan bólmege baraıyn desem, ornymnan turýǵa batylym jetpedi. Tipti shóldegenimdi de umytyp kettim. Oıyma ertegilerdegi qubyjyqtar orala beredi. Oılamaıyn desem, bolmaıdy. Bireý túrtip qalsa, baj ete qalaıyn dep otyrmyn. Áıteýir ne kerek, kórpeshege kómilip, tańdy da atyrdym.

Ornymnan turyp bir attap edim, dál túndegideı birdeńe edenge taǵy da sart ete qaldy. Selk etip, dybys shyqqan jaqqa qaradym — qurbaqa. Kádimgi qurbaqa. Maǵan tesireıe qarap qalypty. Alqymy búlk-búlk etedi.

Men kúlip jiberdim. Qurbaqa edendi sartyldatyp, esikke qaraı sekekteı jóneldi.

---