InfoHub Logo

Aıagóz aýdanynda qus jumyrtqasynan balapan shyǵaratyn ınkýbator stansıasy ashylatyn boldy. Aıagóz aýdandyq aýyl sharýashylyǵy bóliminiń meńgerýshisi Jumataev joldas Ábdiresh Balǵymbaevty stansıa dırektorlyǵyna taǵaıyndaýdy surap, Semeı oblystyq aýyl sharýashylyǵy basqarmasynyń bastyǵy Korobovqa hat jazdy. Bul qus ınkýbator stansıasynyń respýblıkalyq tresiniń dırektory Fılımonov joldasqa osy jaıynda málimdep Balǵymbaev joldastyń dırektorlyqqa belgilengendigin habarlady.

Habar qaıta alynǵan kúni Balǵymbaev janynan qus ınkýbator stansıasy ashylatyn jerge keldi.

— Siz kim bolasyz?— dedi esik aldynda turǵan kúzetshi.

— Osy stansıanyń dırektorymyn,—dep Balǵymbaev esikke kirip kete bergende, qolynda chemodany bar taǵy bireý keldi. Kire beriste álgi kúzetshi ony toqtatyp:

— Siz kim bolasyz?—dedi.

— Osy stansıanyń dırektory bolamyz,— dedi de, ol da júre berdi.

— Bolsań bol! Sizben dırektor ekeý,— dedi kúzetshi.

Buǵan túsine almaǵan jáne ózi jol júrip sharshap kelgen adam basyn shaıqap, qaqpadan kirip, boıy jasyryna berdi. Osy kezde bir mashına zyr etip kelip toqtaı qaldy. Kabınadan shyqqan kisi toqtaýsyz qaqpaǵa keldi.

— Jolyńyz bolsyn?— dedi kúzetshi taǵy da.

— Meni osyndaǵy jańa ashylar stansıaǵa dırektorlyqqa bekitken eken.

— Jaqsy, sizben úsheý,— dedi sózdiń aıaǵyn aıtpaı kúzetshi.

— Qalaı, menen buryn basqa bireýler keldi me? — Ia, siz úshinshi dırektorsyz!

Úshinshi dırektor keńsege kirip oryndyqqa otyra bergende, qaqpa aldyna arbaly bireý kelip toqtady. «Bul da kóp dırektordyń biri bolyp júrmesin» dedi kúzetshi kúlip. Shynynda da solaı bolyp shyqty. Bul da dırektor eken!

Sonymen tórt dırektor stoldyń tórt jaǵyna otyryp keńes qurdy. Árıne, tor jaǵyna buryn kelgen Balǵymbaev ıe boldy.

— Meni Korobov biledi, Fılımonov bekitken deıdi,— Balǵymbaev.— Mine, buıryq. Sol, sol-aq eken kelgenderdiń árqaısysy ózderiniń jaıyn sóılep júrip berdi. Jaǵdaı bylaı bolǵan eken:

Semeı oblystyq aýyl sharýashylyǵy basqarmasynyń bastyǵy Korobov Fılımonovqa jańa qus ınkýbator stansıasyna dırektorlyqqa Balǵymbaevty usynady. Fılımonov ony bekitedi. Munymen birge oblystyq aýyl sharýashylyǵy basqarmasy bastyǵynyń kadr jónindegi orynbasary Kolmogorov dırektorlyqqa Qarataı Saǵyndyqovty usynady. Fılımonov muny da bekitedi. Bul eki dırektor mekemeni uıymdastyryp bolmaı-aq úshinshi dırektor jiberiledi. Muny oblystyq aýyl sharýashylyǵy basqarmasy bastyǵynyń mal sharýashylyǵy jóninde orynbasary Ábdildın joldas usynady. Ol — Jaǵypar Aıdarhanov. Muny da Fılımonov bekitken bolady.

Tórtinshi dırektor Ananın áńgimesin aıtqanda bárinen osynyń sózi oryndy sıaqty bolyp kórindi. Muny oblystyq aýyl sharýashylyǵy basqarmasy bastyǵynyn taǵy bir orynbasary Sıkýnov usynbaq bolyp, al Fılımonov bekitemin dep daıyndalyp otyr edi. Bul arada Ananın erekshe eptilikpen saqtyq istep, keıin birdeńe bolyp qalmasyn dep aldyn ala stansıanyń uıymdastyrý jumysymen, bolashaǵymen tanyspaq bolyp kelipti. Biraq stansıaǵa kelgen soń ózinin dırektor bolatyndyǵyna kózi jetpeı, bastyq bolýǵa kúmándanyp, sesi qaıtyp qaldy.

Respýblıkalyq qus-ınkýbator stansıalary tresiniń dırektory Fılımonov pen Semeı oblystyq aýyl sharýashylyǵy basqarmasy basshylarynyń rezervte taǵy da úsh-tórt dırektory bar eken. Olar da búgin-erteń jana stansıaǵa bastyq bolyp kelmekshi.

1951

---