InfoHub Logo

Ómir degenniń ǵıbraty kileń kereǵarlyqtan tura ma, qalaı ózi? Mysaly, meniń velosıpedim bar da, esegim joq. Qaısardyń esegi bar da, velosıpedi joq. Qyzyqty hıkaıaǵa bergisiz oqıǵa da, mine, osy biri kem dúnıeden bastalǵan.

Qylqıǵan moınymdaǵy káýek basqa adasyp qonǵan baq qusyndaı jeldeı esken «dóńgelektiń» qojaıynyna aınalýym úsh uıyqtasam túsime kirmegen bedel men baılyq, mansap pen mańǵazdyq syılady. Qalaı deısiz be? Qalaıy sol, bári ózim quralpy qarasıraqtardyń, tipti burymdary selteńdegen qyz-qyrqyndarǵa deıin, Qaısardyń salpań qulaǵyna emes, meniń alqyzyl boıaýy jalt-jult etken «asaýyma» qyzyǵýynan týdy.

Ózim de besikten belim shyqpaı jatyp ádis-aılanyń túr-túrin bir kisideı meńgergem, mysaly, shý-shý etken óńsheń shıbut alańǵa jınalyp, fýtboldyń qyzyǵyna endi kiristi-aý degen kezde «temir tulparymnyń» kúmisteı jarqyraǵan sym shybyqtaryn kúnge shaǵylystyryp, jetip kelem. Sosyn ala doptan góri alqyzyl dúnıege tańdanyp, jaltaq-jaltaq qaraı bergen ańǵyrttarǵa alańdy bir aınalyp kelýge tizgin usynsam boldy, «Barselonanyń» dúldúlderine «aınalǵan» shaldýarlar dopty tastaı salyp, kezekke talasady.

Biraq, ókinishke qaraı, aqyndarǵa arnaý aıtqyzyp, jazýshylarǵa tarıhymdy jazǵyzatyn Atymtaı jomarttardyń aýylynan emespin. Keýde kerip, qyr kórsetýdi jaqsy kórem be, álde basqalardyń ózime jalynyp-jalbarynǵanyn unatam ba, áıteýir, «Qulagerimniń» jalynan óte sırek sıpatam. Olar da aılaker, shyq bermes Shyǵaıbaı sıaqty meniń berish bop qatyp qalǵan júregimdi Samarqannyń kók tasyndaı balqytý úshin syı-sıapattyń neshe atasyn oılap tabady. Mysaly, bireýi boıaýǵa salǵan túrli tústi asyqtaryn syılasa, endi bireýi sol asyqtardy «atatyn» qorǵasyn quıǵan saqasyn tartý etedi. Keıbireýi qolyma 100 teńge qystyrady. Nesin jasyraıyn, bul qoshamettiń janyma maıdaı jaqqany sonsha, teń-teń bop kelip jatqan tartý-taralǵylardy erte, erte, ertedegi dúnıeqońyz hannyń urdajyq ýáziri sıaqty taltań-taltań basyp, mańq-mańq sóılep, mańǵazdana qabyldaıtyn boldym.

Al Qaısardy mondybastardyń eshqaısysy bulaı tóbesine kóterip, álpeshtemeıdi. Óıtkeni, aýylda ne kóp, kózin tómen salyp, mólıip turatyn esek kóp. Shilde aıynda olardy kez kelgen úıdiń kóleńkesinen op-ońaı ustap alýǵa bolady. Sosyn oǵan mingisi kelgeni minedi, al mingisi kelmegeni qoń etin kesip alsań da bylq etpeıtin haıýandardy ishterinen «yńq» etkizip bir teýip, kóleńkeden qýyp jiberedi. Salqyn jerde shúıirkelesip otyrýdy kózdegen sotanaqtarǵa oryn bosatqan janýarlardyń arasynda, álbette, keleke-mazaq úshin «qara jorǵa» atanyp ketken momyn da bar. «Jýas túıe júndeýge jaqsy» dep Qaıyrbek kókem aıtpaqshy, keıde kishkentaı mátibıler onyń arqasyna symǵa qonǵan qarlyǵashtar sıaqty tizilip otyryp alady da, qoldaryndaǵy sámbi taldyń solqyldaǵan jas shybyǵymen obal-saýapty oılamastan basy men qulaǵyn bozboran soqqynyń astyna alady. «Aqyryp teńdik surarǵa» tili joq baıǵus máý demesten birde qoı baqqan bala-shaǵanyń taqymynda tepeńdep bara jatsa, endi birde shóp artqan arbany shabyndyqtan myqshıa súırep kele jatqany. Iesi Qaısar da aty arymaıtyn, tony tozbaıtyn aqkóńildiń ózi, laý suraı kelgenderdiń saǵyn syndyryp, betin qaıtarǵan emes. Al meniń tórde ǵana turatyn jap-jańa «tulparymdy» álgi qazanbuzar, úı tentekter «yńq» etkizip teppek túgili, boıaýy ketip qalmasyn dep abaılap qana ustap, eppen ǵana qozǵaıdy.

Biraq, bir túsinbeıtinim, barlyǵy, tipti burymdary selteńdegen qyz-qyrqyndarǵa deıin jalynyp-jalbarynyp, hal-qaderinshe shashbaýymdy kóterip jatqanda, Qaısar ǵana jaǵy qarysyp qalǵan adamdaı qasarysyp úndemeıdi. Úndemeı qoısa jaqsy ǵoı, bir shetke shyǵyp alady da, ala dopty aıaǵynyń ushymen ilip alyp tizesine, tizesinen keýdesine, keýdesinen ıyǵyna, ıyǵynan basyna, odan qaıtadan ıyǵyna, odan qaıtadan ókshesine sekirtip, asa bir eptilikpen neshe túrli qyzyqtar kórsete bastaıdy. Sodan keıin týrnıktiń beltemirine asylyp shyr kóbelek aınalǵanda bar ma, bári, ıá, burymdary selteńdegen qyz-qyrqyndarǵa deıin dý qol shapalaqtap jiberedi. Sol kezde jer-jahandy jaýlap alǵan Eskendir Zulqarnaıyndaı demime nan pisken men de, meniń júzden júırik, myńnan tulpar «Qulagerim» de tars umytylyp, óziniń «qara jorǵasyna» uqsaǵan qaıdaǵy bir mojantopaı «juldyzǵa» aınalady. Nemene, sonda shýda jippen oınaǵan mysyq sıaqty sekirip, dop qýý da óner bolyp pa? Ol munymen ne aıtpaq? Álde veloshabandoz sportshylarǵa arnalǵan júırigimdi qyzǵanyp júr me? Bálkim, balaqaılardyń meni han kóterip, sońymnan shubyryp júrgenin kóre almaıtyn shyǵar?

Sonymen ne kerek, alaqandaryna sap áldılegen «sarbazdarymnyń» arqasynda ýaıym-qaıǵysyz shalqyp júrip jatqam. Bir joly ózenge shomylýǵa bardyq. Kún shyjyp tur, aspan shaıdaı ashyq. Biraq arada bıe saýymdaı ýaqyt ótkende batys betkeıdiń reńi kúrt buzylyp, túndigin japqan kıiz úıge tap bolǵandaı tumshalanǵan kúńgirt dúnıeniń ishinde qaldyq. Eki keshtiń arasynda shaqpaq jaǵyp oınaǵan áýmeserdeı shálkem-shalys naızaǵaı túnergen aspandy jarq-jurq osqylap, záremizdi alady.

— Daýyl! — dedi Qaısar ózenge birte-birte jaqyndap kele jatqan tozańǵa úrke qarap. — Daýyl kele jatyr. Jel men jańbyrdyń astynda qalmaı turǵanda tez aýylǵa jetip alaıyq.

Biraq biz ózenniń jaǵasyna shyǵyp, kıimderimizdi kıip úlgergenshe qyrdyń shań-tozańyn kókke kótere julqynǵan doly jel jalmaýyzsha bas salyp, nóser jańbyr tóńirekti sart-surt sabalady da ketti. Jańa ǵana shańy aspanǵa shyǵyp jatqan jol zamatta laısańǵa aınalyp, mal izinen túsken shuńqyrlar shúpildegen sýǵa móımildedi de qaldy. Qańyltyrdaı shatyrlaǵan aspanǵa jaltaqtaı qarap, quıryq-jaly sýǵa malshynǵan janýarlarymen shoqyraqtata shaýyp bara jatqan balalardan á degende ozyp ketkem, biraq jol tabanyndaǵy borpyldaq topyraqtyń qamyrdaı ılenip qalǵany sonsha, «dóńgelegim» ilgeri jyljýdyń ornyna keri aınalǵandaı, kópe-kórineý keıindep qala berdim. Ásheıinde qaýyrsyndaı jep-jeńil seziletin zymyranym zilbatpan temirge aınalǵan. Buryn basqa túspegen soń bilmeppin, quıyndaı uıtqıdy dep maqtanyp júrgen myqtym dóńgelegine saz balshyq saǵyzsha jabysqan kezde júrý bylaı tursyn, qozǵalýdy múlde toqtatady eken. Ony aıtasyz, balshyqtan bes batpan bolǵan aıaǵymdy kóterip júrýdiń ózi muń edi. Bul kezde balalardyń qarasy birtindep alystaı bergen. Biraq olarǵa «kómektesińder» dep jalynýǵa namysym jiberer emes.

Mıbatpaqtyń qursaýynan qalaı qutylarymdy bilmeı, yzaǵa býlyqqanym sonsha, janarymnan byrt-byrt jas shyǵyp ketti. Jańbyr tamshylarymen birge betimnen taram-taram bop aqqan jasty súrtip turyp, kóz ushynda ketip bara jatqan «qara jorǵanyń» júrdektigine, shyny kerek, qatty qyzyqtym. Sortań jerdiń sýy sıaqty kermek dám óksikke toly ókinishimdi odan beter ulǵaıtty. Qol ushyn sozbastan taǵdyr tálkegine tastap ketken «satqyndarǵa» da ókpeleı almadym. Óıtkeni, bárine kináli ózim. Ásirese, birge oınaıtyn qurby-qurdastarymnan dúnıe dámetip, fýtbol dese ishken asyn jerge qoıatyn jazyqsyz janǵa qaraptan-qarap óshigýim japadan-jalǵyz qalǵan sátimde kóz aldymnan tizbektelip ótip jatyr.

— Oý, Tastemir, bul senbisiń? — degen daýysqa jalt qarasam, qınalǵan janǵa qol ushyn berý úshin kenetten paıda bola ketetin Qyzyr ata sıaqty Qaıyrbek kókem aýyzdyǵymen alysqan sary jal atymen arqa tusymnan ekpindetip kelip qapty.

Janym qınalyp turǵanda janashyr sóz estigen soń ba, kóńilim bosap, óksip-óksip jiberdim.

— Alda, aınalaıyn-aı, jylama, qazir kómektesem.

Ol, ózi aıtpaqshy, «shaıtan arbamdy» atynan túspeı-aq kóterip aldyna óńgerdi de, meni er-turmannyń artyna jaıǵastyrdy.

— Al, jol bolsyn, qaıdan kelesiń?

— Ózenge shomylyp...

— Óziń be?

— Joq, balalarmen.

— Anaý ketip bara jatqan solardyń shoǵyry ma?

— Iá.

— Alda, bar bolǵyrlar-aı. Jalǵyz qaldyryp ketkeni nesi seni?

— ?..

— E, Alla, isimniń sońyn qaıyrly qyl. Áıt, shý.

Sary jal taıǵaq joldy kibirtiktep basyp baryp, júrip ketti. Oqystan tap bergen jaý áskeri sıaqty batys jaqty qap-qara tozań men túnergen bultqa orap bas salǵan daýyl men jańbyr ótkinshi eken, birazdan keıin kún jarqyrap qaıta kórindi de, tóńirek nurlanyp sala berdi. Áne, kókjıekten ájem toqyǵan órmekke uqsas túrli-tústi kempirqosaq paıda boldy. Býsanǵan daladaǵy jyńǵyl, sheńgel, jantaq, jýsandardyń butaqtary men japyraqtary battasqan shańynan arylyp, jasyl boıaýyna qaıta malynǵan. Áli keýip úlgermegen jańbyr tamshylary tańǵy shyqtaı tup-tunyq. Alashabyr bulttan arylmaǵan aspanǵa boztorǵaılar ushyp shyǵyp, tátti áýenge basqan. Shópten shópke sekirgen shegirtkelerdi qýalaǵan aqbaýyr qarlyǵashtar ersili-qarsyly zýlaıdy.

— İnim.

— Áý, kóke.

— Sen osy uıatpen kezdesip kórdiń be?

— Uıat deısiz be? Joq.

— Al men kezdestim.

— Qashan, kóke?

— Búgin, týra búgin kezdestim. Osydan bir jyl buryn seniń ákeńnen bir aıǵa dep qaryzǵa aqsha alyp, ýaqtyly qaıtara almaı-aq qoıǵanym. Sodan kezdesýden qashyp júr em, jańa álginde juma namazyn oqyp, meshitten shyǵyp kele jatqanymda oıda joqta kezdese ketpesi bar ma? Betimniń oty lap etip, ne dep aqtalarymdy bilmeı, qaqqan qazyqtaı qalshıdym da qaldym. Ózime de obal joq, aqyry qaıtaratyn aqsha bolǵan soń, myna sary jaldy satsam da, ýaqtysynda berýim kerek eken...

— Ákem ashýlanyp, artyq ketken joq pa áıteýir?

— Joǵa, Allanyń úıiniń aldynda aıǵaısyz-aq abyroıdan aıyrylyp, kirerge jerdiń tesigin tappaı qınalyp turǵan jaǵdaıymdy túsinip, «Oqasy joq» dedi de qoıdy. Uıatpen kezdesý degen, mine, osy bolady, inim...

Kókem uıat týraly ǵaqlıasymen meniń qylyǵymdy meńzep kele jatqan joq pa degen kúdikten júregim atqaqtap qoıa berdi. Biraq, abyroı bolǵanda, osy kezde meni de, meniń batpaqqa oranǵan zil batpan «temir-tersegimdi» de shybyn ǵurly kórmeı kóterip kele jatqan sary jal laısańnan ada qumdaýyt jolǵa jetipti.

— Kóke?

— Áý, inim.

— Sizge kóp-kóp rahmet, endi ózim-aq júre alam.

— E-e, jaraıdy onda. Qane, túse ǵoı, aınalaıyn. Abaıla, bir jerińdi aýyrtyp alma.

Aldymen aldyna óńgergen velosıpedti jerge eppen qoıdy da, sodan keıin atynan meniń túsýimdi kútti.

— Al, qane, «shaıtan arbańmen» jerdiń apshysyn qýyryp bir quıyndatshy!

Qumdaýyt joldyń oıpańdaý tusyna tunyp qalǵan sýmen dógelektiń balshyǵyn jýyp alyp, yzǵyta jóneldim. Jańa ǵana yzalanyp, jańa ǵana qorlanyp jylaǵanym esimnen shyǵyp, máz-máıram bop kúlip kelem. Myna qyzyqty qarańyz, kóp uzamaı balalarǵa da jetip aldym. Qastarynan zý etip óte shyqqan maǵan olar da «bizge ókpeleıtin jóniń joq, kiná ózińnen» degendeı, beıbit ısharamen qol bulǵap qala berdi.

Biraq fýtbol alańyna jete bergende tizgin men tejegishten bólek bir qýatty kúsh meni de, «Qulagerimdi» de kilt toqtatty. Tula boıymdy tokpen urǵandaı dir etkizgen tosyn kúshtiń qaıdan, neden paıda bolǵanyn anyqtaýǵa týra sol sátte mursham joqtuǵyn. Sońyma burylyp qarasam, balalardyń aldynda qasqaıyp №1-shi «jaýym» keledi. Kútip turmyn. Onyń «qara jorǵasy» mánjýbas bolǵanymen, ushqyr. Ásirese, aýylǵa qaraı aryndap, des bermeıdi. Bul joly da qulaǵyn jymıtyp toptyń aldyna shyǵyp alypty. Qasymnan satyr-sutyr shaýyp óte bergende álgi beımálim kúsh tańdaıyma jabysyp qalǵan tilimdi burap, kálımaǵa keltirgendeı:

— Lıonel! — degizgeni.

Ol tańdana jalt qarady. Kózqarasynda «Meni shynymen solaı dediń be?» degen saýal bar. Únim qumyǵyp:

— Lıonel Messı, — dedim taǵy da, — velosıped aıdaǵyń kelse, birazdan keıin úıge kel.

Menen alaryn alyp áldeqaıda taıyp turǵan alaıaqtaı baıaǵy taltań-taltań basyp, mańq-mańq sóıleý, mańǵazsý degen tákápparlyq jym-jylas joǵalǵan. Daýsym ózimdiki emes sıaqty. Qarlyǵyńqy jáne... jasqanshaq.

Ol «maqul» degendeı basyn ızedi. Onyń «maqul» degenine menen basqa balalar da qýanǵandaı kórindi. Arqasyndaǵy zil batpan júkten arylǵan kezde «qara jorǵa» tura qap dúr silkinýshi edi, sol sıaqty boıym da, oıym da bir serpilip, kádimgideı jeńildep qalǵan. Osy ýaqytqa deıin túk bilmeı kelippin, balalar menen góri ala doptyń sheberi Qaısardy es tutady eken. Al meni... eh, meni tek qana... qyzyldy-jasyldy dúnıem úshin syılap kelipti.

Ǵaıyptan tap bolatyn Qyzyr ata sıaqty Qaıyrbek kókem taǵy paıda bola ketti. Bul joly, árıne, sanamda. Qoly bosta fýtbol tamashalaıtyn ádeti bartuǵyn. Telesholýshylardyń tilimen aıtsaq — jankúıer! Sol jankúıerimiz, ásirese, Qaısardyń sheberligine qatty rıza. Ol da óziniń oıyn-órnegin arnaıy kelip tamashalaıtyn kókesiniń janyna lázzat syılaý úshin qarsy shyqqan qorǵaýshyny aldap ótip, odan búıirden tap bergen ekinshisin qapy qaldyryp, eń aıaǵynda jekpe-jek qalǵan qaqpashyny san soqtyryp, tor qaqpany topyrlaǵan golǵa toltyrady. Kókemiz bolsa álemdik deńgeıdegi machtan jer-jahanǵa maǵulym «juldyzdyń» oıynyn tamashalap otyrǵandaı qol shapalaqtap, máz-máıram bolady. Qaısarǵa degen bul qurmet pen qoshamet keýdemniń qýysynda ary-beri júgirip, alasurǵan qyzǵanysh atty ıtimdi qaradaı yzalandyra bastaıdy. Sondyqtan álemdik deńgeıdegi machqa jahan jurty atynan kelgen jalǵyz ókildiń nazaryn ózime aýdarýǵa tyrysyp, «Qulagerimmen» neshe túrli «trúkter» jasaýǵa kóshem. Biraq, ókinishke qaraı, ol báribir óziniń súıikti shabýylshysynan kóz aıyrmaıdy.

Fýtboldy támámdaǵan balalar alań shetine jıylyp, oıyndy talqylaýǵa kirisken sátte áńgimege kókem aralasady.

— Men senderge bir ańyz aıtyp bereıin. Qulaq qoıyp, muqıat tyńdap alyńdar. Baıaǵyda Baq pen Qyzyr únemi qol ustasyp júredi eken. Únemi qol ustasyp júretin sebebi, Baqtyń qabaq eti salbyrap, janaryn jaýyp turǵandyqtan, ózdiginen eshteńeni kóre almaıdy desedi. Bir kúni baıdyń maqtanshaq balasy Baqtyń kózine túskisi kep júırik tulparymen olaı bir, bylaı bir shabady. Beıbaq balanyń kókeıin túsingen Baq «Mynaý qaı shabandoz, kózimdi ashshy» deıdi. Qyzyr atamyz Baqtyń qabaǵyn kóterip, kózin ashqan kezde janary baıdyń álgi dańǵoı ulyna emes, anandaı jerde sadaq atyp, oınap júrgen qarshyǵadaı qarsur balaǵa túsedi. Ol bala keıin aty ańyzǵa aınalǵan batyr Baýyrjan Momyshulyna aınalady! Kórdińder me, ne nárseni de halyq tarazylaıdy. Halyq baǵasy da Baqtyń kózi sıaqty. Kimge túsedi, kimdi baǵalaıdy ózi biledi. Sondyqtan baǵy janǵan dostaryńdy qurmettep, qadirleı bilińder. Erteń osy at tóbelindeı aýyldyń atyn álemge tanytatyn sol bolady...

Bul ańyzdy biz jatqa bilemiz. Qaharmandary da ózgerip turady óziniń. Mysaly, ańyzyn burymdary selteńdegen qyz-qyrqyndarǵa arnasa, Baqtyń kózi sadaq atyp júrgen qarasur balanyń ornyna, bulaqtan sý alyp jatqan aqquba qyzǵa túsip, ol keıin elge belgili Umaı ana, Domalaq ana nemese Dına kúıshi bolyp shyǵady. Maqtanshaq qaharmandarynyń «óneri» de jıi aýysady. Mysaly, ótken joly túıe kótergen alańǵasar týraly aıtyp edi, bul jolǵy shalaǵaıy maǵan uqsas pa, qalaı? Shynynda, ózim de Baqtyń kózine túskisi kelgen shaldýardaı endi qyzyp kele jatqan oıyndy talaı ret tas-talqan qylǵan joqpyn ba? Al ol bolsa ashýlanyp, bir ret qarsy kelmepti. Jasóspirimder komandasynda el namysyn qorǵap, jeńimpaz atansa da betegeden bıik, jýsannan alasa.

Al men bolsam... osy ýaqytqa deıin túk bitirgen joqpyn. Óleń jazyp kórip em, gazettegi aqyn aǵaılar synap-minep, búkil mektepke kúlki qyldy. Matematıka páninen olımpıadaǵa qatysyp em, odan da ońbaı súrindim. Baǵymdy endi nemen synaımyn? Álde veloshabandozdar klýbyna jazylsam ba? Biraq ákem «jal-quıryqsyz jalǵyzym» dep oǵan da jibermedi.

Kelgen bette «temir tulparyma» sekirip minip, júıtkite jóneletin shyǵar dep oılaǵam. Joq, ol ershikke taqym artqanymen, aıaǵynyń ushyn jerge tirep, birazǵa deıin ary-beri yrǵalyp turdy. Oıy júırikte emes, basqada.

— Tastemir, men búrsúgúni qalaǵa júrem. Jattyǵý jıynyna shaqyryp jatyr. Odan ary Argentınaǵa ketem... oqýǵa.

Osy sát men de, meniń velosportshylarǵa arnalǵan bul óńirde joq qas júırigim de «ejelgi dushpanymnyń» aldynda qı domalatqan qońyzdaı kishireıip sala berdik. Basqa basqa, dál qazir osyndaı tosyn jańalyqty kútpep em odan. Aty ańyzǵa aınalǵan Lıonel Messıdiń otanynda oqý degen ekiniń biriniń mańdaıyna jazyla bermeıtin baqyt qoı!

Osy kezde manaǵy belgisiz «tejegish» qan tamyrlarymdy qýalap kep, qyzyp turǵan útikti júzime taqaǵandaı betimniń ushy ózinen ózi ysı jóneldi. Bul ne? Taǵy da qyzǵanysh pa? Qyr sońymnan qalmaı qoıǵan bul páleden qalaı qutylsam eken? Abyroı bolǵanda, álgi belgisiz kúsh keýdemdi tyrnalap, abalaı bastaǵan yzaqor ıttiń arynyn basyp, «ket», «kettep» jatyr.

— Aıtaıyn degenim, byltyr jasóspirimder arasynda ótken álem chempıonatyna barar kezde Qaıyrbek kókem «jolyńa» dep júz elý myń teńge bergen. Sóıtsem, seniń papańnan alypty ǵoı qaryzǵa, endi ýaqtyly qaıtara almaı uıattan órtenip júr. «Qaıtem, amal joq, sary jaldy satam da...» deıdi.

Kókemniń uıat týraly áńgimesi esime sart ete túsip:

— Bilem, — dedim.

— Sen papańa aıtshy, sary jaldy satsa, kókemiz jaıaý qalady ǵoı.

— Aıtqanda qandaı. Odan keıin sary jaldyń aldynda men de boryshtar boldym búgin.

Meniń aıtqanymnan shyqpaıtyn ákemniń balajan minezine qanyq onyń kóńili osydan keıin ornyna túskendeı boldy. Maǵan degen rızashylyǵyn kózimen uqtyryp, «Al endi myna keremetińmen armansyz yzǵytýyma bola ma?» degendeı kúle qaraıdy.

— Ruqsat berseń, Qaıyrbek kókemniń úıine baryp keleıin.

— Ruqsat, bul endi seniń quzyryńda. Qalaǵa júrgenińshe armansyz serýende.

Buryn sanamda «Qaısar jalynsa eken» dep sýmańdap turyp alatyn saıtan oı seıilgen tumandaı ózinen-ózi joq bolyp ketti de, endi men onyń aldynda qoǵadaı japyrylyp, jalpaqtap jatyrmyn. Bizdiń aýyldan Argentınaǵa oqýǵa baratyn eń alǵashqy balaǵa mysqaldaı bolsa da jaqsylyq jasaýdan basqa dál qazir eshqandaı mańyzdy is joq sıaqty. Et-baýyrymdy eljiretip, tilimdi ýyljytqan mundaı tátti sezimdi buryn-sońdy bastan keship kórmeppin. Kóńil bultyn shaıdaı ashyp, júrek qyjylyn maıdaı eritken bul ne sonda?..

Álde, Qaıyrbek kókem kezdesken uıat degen osy ma?!

---