InfoHub Logo

Adam balasynyń óner-bilimi, oqýy, ádebıeti, saıasaty, mádenıeti — barlyǵy sharýashylyq kásipten týady.

Óner-bilimniń, oqýdyń, mádenıettiń, ádebıettiń, saıasattyń, — báriniń negizi, irgesi, tireýi sharýashylyq kásip.

Óner-bilim retinde artta qalǵan halyq eń aldymen sharýashylyq turmysyn ekinshi jańa órnekpen jóndeý kerek.

«Qazaq kedeıi qaıtse teńeledi?», «Qazaq kedeıi pálen qylsa teńeledi», «Qazaq kedeıi túlen qylsa teńeledi», — dep aıtqanda, eń aldymen «Qazaq kedeıiniń sharýashylyq turmysyn jańa órnekpen jóndeý kerek» dep aıtý kerek. Ám sol aıtqan sózdi árbir kózi ashyq, keýdesi sanaly kedeıdiń balasy iske asyrýǵa barlyq kúshin salyp tyrysý kerek. Qazaq eńbekshiliniń sharýashylyq turmysy ózgerip, burynǵy eski túrdi tastap, ekinshi jańa órnekpen sharýashylyq turmysy qurylmaı, ónerli halyqtardyń eńbekshil tabynyń qataryna kirip kete almaıdy. Árıne, sharýashylyq turmysty ózgertip jóndegenshe basqa isterdi qoıa turmaı, basqa isterdi de kúshti azaıtpaı júrgize berý kerek. Sharýashylyqty jańa túrge salyp jóndeý degen ne? Ol kóshpeli turmysty, kóshpeli osal sharýashylyqty tastap, otyryqshy turmysqa aınalý, jer sharýashylyǵyna aınalý degen sóz.

Jer júzinde qazaqsha kóship júrgen halyqtyń óner-bilim retinde otyrǵan eldiń qataryna kirgeni jón. Qazaqtyń kedeıleri osy kúni ár jerde, ár qalada shubyryp qańǵyryp júr. Mine, solar aldymen poselke bolyp, jer sharýashylyǵyna aınalý kerek, uıymdasý kerek. Uıymdasyp poselke bolamyn degen nasharlarǵa keńes úkimeti qashan bolsa da aıamaı járdemin berip baqpaq. Jáne sharýashylyqtyń eń zory ónerkásip dúkenin (promyshlennost Fabrıka-zavodtar) qurý. Mine, qazaq kedeıine, qazaq jarlysyna eń kerekti nárse osy.

Endi bizdiń Qazaqstandaǵy jergilikti gazetterge tapsyratynymyz mynaý:

1) Partıa isin, keńes qurylysynyń isin, oqý, halyq aǵartý isterin ám basqa osy tárizdi isterdi álsiretpeı, kúnnen-kúnge basymyraq qylyp gazetter júzinde jazyp otyrý, qazaq kedeılerin aldymen barlyq qazaqty jalpy qala qylýǵa shaqyrý kerek. Bul isti únemi júrgizip otyrý kerek.

2) Qazaqstanda ónerkásip dúkenin (promyshlennost ornatýǵa bet alyp, gazet júzinde tynbaı jazyp otyrý kerek. Ám muny júzege asyrýǵa tyrysý kerek. Bul Qazaqstannyń barlyq gazetterine mindetti is. Ám barlyq eńbekshil tabynyń azamattaryna mindetti is.

12.05.1923 jyl

---