InfoHub Logo

Jaqyn arada Qazaqstannyń Ortalyq Komıtetiniń (Qazorkomnyń) 2-jalpy jıylysynda aımaqtyq búdjeti (kiris-shyǵys esebi) qaralyp ótti.

Qazaqstannyń aımaqtyq qazynasyna túrli retten jınalǵan azyn-aýlaq qarajatty Qazaqstannyń óziniń túrli kerekti isterine jumsaı bastaǵanda, árıne, barlyq qarajaty myńnan birine jetpeıdi. Súıtse de qolǵa jınalǵan qarajatty aımaqtyq árbir eń kerekti isterge bóle-jara jumsaǵanda, eń aldymen oqý isi, halyq aǵartý isi eske alyndy. Kóp sóz, kóp yrtys-tartystan soń halyq aǵartý isterine kóbirek jumsalmaq boldy.

Qazaqstannyń halyq aǵartý komısarıatynyń ám ózge mekemelerdiń ashsam degen shkolalaryna, kýrstaryna, shyǵarmaq kitaptaryna ám basqa sondaı isterine qarajat aldymen berildi. Keńes úkimeti — eńbekshilder úkimeti. Turmystyń rahaty, ıgiligi eńbekshilder tabyniki. Mine,osy Qazaqstannyń ortalyq úkimetiniń jumsap otyrǵan, úzip-jaryp jınaǵan qarajatynyń jemisin eńbekshilder taby paıdalaný kerek. Eńbekshilder tabynyń balalary jetkinshek jas býyn paıdalaný kerek. Eńbekshil jarly tabynyń jol basshysy Marks aıtqan: «nadandyq eshkimge eshnárse bermeıdi» dep. Sol nadandyqty joıýǵa eńbekshil tabynyń balalary tez kirisý kerek. Tez umtylý kerek. Nadandyqty joımaı adam balasy turmystyń rahatyn, turmystyń ıgiligin kóre almaıdy.

Nadandyqty joımaı qazaqtyń eńbekshilder tabynyń balasy kúshtiler tabymen teńese almaıdy. Qatarǵa kire almaıdy. Nadandyqty joımaı nasharlar taby kúshtiler tabynyń qataryna kire almaıdy. Nadandyqty joımaı-aq nasharlar taby teńeledi deýshi adam bolmas.

Jer ústindegi eńbekshilder tabynyń nadandyqty joımaı qatarǵa kire almaısyń, qazaq eńbekshileriniń balasy, oqy, oqy! Jatpa, turma oqy, úıren, áıtpese qatarǵa kire almaısyń!

22.03.1923 jyl

---