InfoHub Logo

Jurtshylyǵymyzdyń sońǵy kezde mańyzdy maqalalardy oqymaıtyn bop ketkeni biz úshin orny tolmas ókinish ekeni ózinen-ózi túsinikti. Áıtse de, biz ózimizdiń basmaqalalarymyzben elimizdegi kúrdeli máselelerdi sheshý jolyndaǵy ortaq iske laıyqty úles qosyp kelemiz. Biz eń áýeli elimizdiń mádenı jáne ekonomıkalyq damýyn júzege asyrý úshin ne isteý kerektigin anyqtap alamyz.

Qazir bizge birdeńeler jetispeıdi. Al birdeńeler jetispegen elde bereke de, tártip te bolmaıdy.

Bizge birdeńelerdiń jetispeıtinin bıleýshi partıamyzdyń músheleri de, opozısıashyldar da — bári de jaqsy biledi. Biraq bizdegi alaýyzdyq birdeńelerdiń jetispeıtinin túsingendikten emes, neniń jetispeıtini árkimniń árqalaı túsinetindiginen shyǵyp keldi. Al endi neniń jetispeıtinin túsine bilýde aýyzbirlikke qol jetip otyrǵan qazirgi kezeńde bizge neniń jetispeıtinin anyqtap alý ońaı bolatyny bárimizge de úlken medeý. (Uqtyńyzdar ma?.. Óte jaqsy!)

Bizge birdeńelerdiń jetispeıtinin ońshyldar da, solshyldar da, progresshilder de, konservatorlar da, ıntellıgensıa da, qarapaıym kópshilik te túsinip otyrǵany — ulttyq birligimiz ben yntymaǵymyzdyń jarqyn kórinisi emes pe!

Bizge neniń jetispeıtinin túsingennen keıingi jerde ne jetispese de — meıli, elimizdiń eńsesi báribir kóterile bastaıtynyna shúbámiz joq.

Adam ataýlyǵa árqashan birdeńe jetpeı júredi. Sol sıaqty, qoǵamǵa da birdeńeler jetispeı jatady. Bul aqıqatty biz ózimizdiń búgingi qoǵamnan ǵana emes, elimizde bizge deıin ómir súrgen qoǵamdardan da kóremiz. Iaǵnı, budan: bizge birdeńeler baıaǵyda da jetispegen, qazirde de jetispeıdi, keleshekte de jetispeıtin bolady degen quryshtaı qorytyndy týady.

Sonda bizge naqty nemeneler jetispeıdi?

Mine, biz osy máseleni tolyń sheshken kúni, ıaǵnı, osy suraqqa tolyń jaýap tapqan kúni elimizdiń kúrdeli máseleleriniń bári de óz-ózinen retteledi dep batyl boljam aıta alamyz.

Bizdiń bárimizge birdeńeler jetispeı otyrǵandyqtan, biz alaýyzdyq ataýlyny túgel umytýymyz kerek te, bizge nemenelerdiń jetispeıtinin jatpaı-turmaı oılasýymyz kerek.

Qurmetti oqyrmandar, sizder mundaı «birdeńelerdi» budan buryn oqyp kórdińizder me, kórmedińizder me?

Orysshadan aýdarǵan Ǵabbas Qabyshev

---