InfoHub Logo

Mekteptiń esigin qondyrtyp, ishin sylatyp, edenin tegistetkizdim. Taqta jasatqyzdym. Úlken úsh dóńgelek ústel qoıdyrǵyzdym (balalardy aınaldyra otyrǵyzyp oqytý úshin). Qabyrǵalarǵa áripter jazylǵan kesteler, kórneki qural, sýretter qadap, ózimshe edáýir retke keltirdim.

Tóńirektegi aýyldy aralap, oqyǵysy keletin balalardyń tizimin de aldym. Meniń oıymsha, mektep mańyndaǵy aýyldyń balalary túgel oqyǵany durys edi. Óıtkeni alystaǵy aýyldardyń balalary qystygúni oqýǵa kele almaı qalýy yqtımal.

Men mektepte, kúndegi ádetim boıynsha, oqý jabdyqtaryn rettep júr edim, bir bala kelip:

— Bolys keldi, baıdyń úıine túsip, qymyz iship otyr. Sizdi shaqyrady, — dedi.

— Qazir qolym tımeı jatyr, keıin bararmyn — dedim men. Biraq barǵam joq.

Birazdan keıin bolys, anada kóretin starshyn men Ospan degen sharýa, bolystyń hatshysy, baı jáne birneshe adamdar keldi. Bolys jýań qysyq kóz, qara saqaldy byrtıǵan adam eken. Sálemdeskennen keıin:

— Qaıyrly bolsyn mektep sańǵyrlap tur eken — dedi bolys.

— Nesin aıtasyń?.. — dedim men kekep.

Kekep aıtqanymdy bolys túsingen joq. Starshyn taǵy da mektepti maqtaı ala jóneldi.

— Sirá, bul mańda mundaı mektep bolmas! — dep aıaqtady ol maqtaý sózin.

Meniń qaı eldiń adamy ekenimdi, ata-tegimdi, qaıda oqyǵanymdy surastyra kelip:

— Qaradan han boldym de... — dep bolys yrjıyp bir kúlip qoıdy.

— Han da emespin bolys ta emespin ýchıtelmin — dedim men.

— Bul jigit ázildi kótere almaıdy, ázildep birdeme aıtsań, shamdanyp qalady, — dedi baı bolysqa qarap.

— Jas adamnyń bas asaýy bolady ǵoı, — dedi bolys.

— Árıne, bylaısha aıtqanym ǵoı... — dep baı myrs etip bir kúlip qoıdy.

— Káni, — dedi bolys hatshysyna qarap, — myna oqytýshyǵa oqıtyn balalardyń tizimin ber.

Hatshy tes qaltasynan alyp tórt búkteýli bir qaǵazdy usyndy. Tizim eken. Birden «jasy neshede» degen syzyqshaǵa kezim tústi. Bul syzyqshada... «15, 20, 25, 30» degen sıfrlar jazýly eken. Men hatshyǵa qarap:

— Myna «20, 25, 30» sıfrlary balalardyń jasy ma? — dedim.

— Iá, — dedi hatshy maǵan tańdanǵandaı.

— Kelisken eken! — dedim men.

Bolys maǵan ajyraıa bir qarady da, shyǵýǵa yńǵaılandy.

— Bala, sen de júr, — dedi baı maǵan.

Úıge kelip otyrǵannan keıin baıdyń báıbishesi as daıar boldy dedi. Baı qaqyrynyp, bir yrǵalyp qoıyp:

— Káni, bala, quman alyp, myna bolystyń qolyna sý quı, — dedi maǵan qarap.

— Jo-joq... men quıamyn — dep sharýa jigit túregeldi.

— Joq, balanyń ózi quısyń — dep baı ony qaıta otyrǵyzdy da, — tur, shyraǵym, kisilerdiń qolyna sý quı, — dedi taǵy maǵan qarap.

— Keshirińiz, baı. Men munda bolystardyń qolyna sý quıýǵa kelgem joq, bala oqytýǵa keldim, — dedim de ornymnan turyp shyǵyp kettim.

— Áı, mynanyń kisimsinýin qaraı gór! — degen sózderdi qulaǵym shalyp qaldy.

Mektepke qaraı ketip bara jatyr edim, bireý júgire bastap, menimen qatarlasa berdi de:

— Qaıda barasyz? Sizdi shaqyryp jatyr ǵoı, — dedi. Burylyp qarasam, Ospan degen sharýa eken.

— Kim shaqyryp jatyr?

— Baı da, bolys ta...

— Qolǵa sý quıýǵa ma?

— Joq, bolys menimen tabaqtas bolsyn — deıdi.

— Raqmet, — dep men ári qaraı júre berdim. Ospan ilese júrip:

— Barmadyńyz ba? Barsańyz edi.. — dep kúbirlep qala berdi.

Men mektepke kelip kirdim. Bul joly mektep shynynda da maǵan sańǵyrlap turǵan sáýletti saraıdaı bolyp kórindi.

---