InfoHub Logo

Myń shaqyrymdaı jol júrip, kóshpeli qazaq eliniń shel saharasyn kókteı etip kelgen maǵan Kishiqumdaǵy aýyldar onsha tosyrqarlyqtaı bolyp kórinbedi: Beles-beles qumdary ǵana bolmasa, qalpy da, salty da biryńǵaı, mal baqqan bytyrańqy aýyldar eken.

Jeriniń ereksheligi tek qana qyr emes, beles-beles, qyzylshaǵyl qum bolady eken. Sol qumdardyń keń qoınaýlaryn jaılaǵan shoǵyr-shoǵyr aýyldar. Qum qoınaýynyń shebi shúıgiń oty mol bolady eken. Qoınaý tabanynyń sýy da jaqyn kórinedi. Jarty metr qudyq qazsań, tup-tunyq, móp-móldir muzdaı sýyq sýy shyǵa keledi.

Jeriniń taǵy da bir ózgesheligi — jazy uzaq, qysy ári qysqa, ári jyly bolady eken. Az jaýǵan qary kóp jatpaı erip ketip, tútegen boransyz, ysqyrǵan aıazsyz qara sýyq bolady da turady. Qysy beıne bizdiń jerdiń qońyr kúzi sıaqty.

Elinde qystaý bolmaıdy. Eli jazynda da, qysynda da kıiz úıde otyrady eken. Biren-saran baılarda ǵana maldyń tóline arnap salynǵan kirpish úıler bolady eken.

Kishiqumdy jaılaǵan el Tolaǵaı bolysyndaǵy maldy aýyldar eken. Kishiqumnyń qoınaýynan úıir-úıir jylqy, qora-qora qoı óredi.

Sonshalyqty tóńkerilip jatqan qyrýar maldyń júzden sekseni baılardiki. Árbir baıdyń úıiniń qasynda 15-20 qarasha kıiz úıler otyr. Bári de baılardyń tegin malshylary; biri qoıshy, biri jylqyshy, biri túıeshi, baıdyń malyn jaıyp, sýaratyn da solar. Baıdan alatyn aqysy jartymsyz saýyń biren saran at maıy. Biraq baı, kedeıge búıirin shyǵarý úshin emeksitedi. Qytymyr baıdyń tastaǵan súıegi sorlylardyń eki búıirin emes, eki kózin shyǵarardaı edi. Kishiqumdaǵy meniń kórgen aýyldarymnyń tabıǵı jáne áleýmettik jaǵdaılary osyndaı edi.

---