InfoHub Logo

"Paıǵambar da kúıeýin syılapty" degen bar. Bul meniń qurdasym Darhannyń jaqsy kóretin maqaly. Onyń paıdasyn da kórip júr. Ásirese, qaıyn jurtyna barǵanda, bul maqaldy aýzynan tastamaıdy. Buǵan olar máz. Barynsha syılap jatady. Aýdandyq aýyl sharýashylyǵy basqarmasyn basqaratyn Ahmet Qubaıuly rýy jaǵynan alsaq, Darhanǵa qaıyn aǵa. Ol bastyq ta, Darhan onyń júrgizýshisi. Biraq oǵan qarap jatqan Darhan joq Keıde kósteńdep, qaıynaǵasynyń aldyna túsedi, aıtatyny álgi maqal.

Birde alystaǵy keńshar ortalyǵyna Ahmet aǵaımen saparlas boldym. Keńsedegi sharýamyz bitken soń keńshar dırektory túski úzilistiń bolǵanyn aıtyp, shaıǵa shaqyrdy. Darhanym baıaǵysy, eki ezýi eki qulaǵynda. Qol jýyp úıge kirerde ádettegi ádisine saldy. Bastyǵynyń aldyn orap, tórge oza bergende, bileginen tartyp, úlken kisige jol ber degen yńǵaı tanytyp em, ol:

— Oı, Ahań qaınaǵam ǵoı, paıǵambar da kúıeýin syılapty de-gen, aha — ha-a... a, — dep kúlkige jeńdirdi.

— Shyraǵym, osy sen ylǵı "paıǵambar da kúıeýin syılapty" degendi qoımaısyń ǵoı, — dedi Ahań — Paıǵambarymyz Muhammed bolsa, onyń kúıeý balasy Áziret-Áli ǵoı, ol ony ne úshin syılaǵan, sony bilesiń be? Óıtkeni Áziret-Áli ıslamnyń jaýlaryn tapap, jaýjúrektigimen qyzylbasty musylman dinine kirgizgen, sondyqtan paıǵambarymyzdyń ony syılaýy, ár kez qurmet tutýy quptarlyq delik. Al, seni ne úshin syılaımyz?

Osydan keıin-aq darhan óziniń súıikti maqalyn aýyzǵa almaıtyn boldy.

— Qazir áıel basqa shyqqan zaman boldy ǵoı. Uıat, ıba, tártip-tárbıe degen adyra qaldy. Naǵyz erkek dep júrgenderiń áıeliniń aldynda qurdaı jorǵalaıdy. Nanbasańyz, áıelińizge qattyraq aıtyp, zekip kórińizshi, jerden alyp, jerge salyp, áýseleńdi tanytsyn — dep Jákeń aǵaı kópshilik jınalǵan bir jerde sózden sóz týǵyzǵany bar.

— Áıelge qarsy tipti áńgime aıtpańyz, olar myqty ǵoı, — deıdi onda Orynbaı degen jigit.

— Jáke, ózińiz oılap kórińiz, olar sizdiń shalbar-kóılegińizdi aldy, shash qoıý mánerińizdi aldy, araq-sharap, temekińizdi aldy, mashınańyzdyń rýlin aldy, aıta berse, kóp...

— "Balany jastan, áıeldi bastan" demeı me, bári ózimizden, — dedi Jákeń, — baıaǵy tekti shaldarǵa uqsap, bosaǵaǵa qamshyny ilip qoıyp, sondaı kezde sydyrtyp turmaǵasyn, áıel basqa shyqpaı qaıtsin?

— Munyńyz durys endi, Jáke, ózińiz aıtqandaı árbir úıde bir-bir qamshy ilýli turmaǵasyn, — dep jatyr Orynbaı da ony qoshtap.

Qamshy tabylar-aý, deımin, men ishteı, ony bosaǵaǵa ilip te qoıarsyz. Biraq qur ilýli qamshydan ne qaıyr? Áńgime júrekte ǵoı, ol joq qoı qazir...

---