InfoHub Logo

Bizdiń jaqta búldirgen adyrda bolady. Jartastardyń astyna ıakı bulaq boıyna shyǵady. Jylda búldirgen piskende adyrǵa ádeıi atpen kelip, búldirgen terip qaıtatynbyz.

Búgin de búldirgenniń qalyń shyǵatyn jerine kelsek, qara qoshqyl bop pisip, tunyp tur eken. Janymda ózimmen birge oqıtyn Raqtaı degen joldasym bar. Ekeýmiz:

— Opyraı, qalyńyn-aı!

— Byjynap tur ǵoı, tegi, — dep tańdanysyp, attan asyǵyp-úsigip qulaı túsip jattyq.

Sol eki arada qalyń búldirgenniń arǵy shetinen bir elik kórindi.

— Elik, elik, — dep aıqaı saldyq. Sóıtip máz bop turǵanda, ile-shala dál álgi jerden eliktiń laǵy atyp shyqqany. Júgirińkirep baryp, kóp uzamaı-aq qalyń shóptiń arasyna qoıyp ketti. Bes-alty metr jerdiń shóbi qımyldap baryp tyna qaldy. Ekeýimiz bir sát ańqıyp turyp qaldyq ta, attardy tastaı salyp, júgirip sol jerge keldik. Raqtaı eliktiń laǵyn alǵashqy kórgen jerden izdeı bastady. Men júgirip, shóp qımylynyń toqtaǵan jerine kelsem, eliktiń laǵy jermen-jeksen bolyp, qulaǵyn jymqyryp búk túsip jatyr. Bas salyp ustaı aldym. Eliktiń laǵy aıanyshty daýyspen baqyryp jiberdi.

Raqtaıǵa qarap edim, ózi taba almaı qalǵanyna ókingendeı bop tur. Sony bildim de, laqty oǵan ustata saldym.

— Má, sen-aq usta. Ekeýmiz birigip asyraımyz.

Raqtaı meniń qolymnan ala bergende, eliktiń balasy taǵy baqyrdy. Osy daýysty estidi bilem, enesi shyǵa keldi. Bizge qaraı jasqanbaı salyp keledi. Shabýyl jasar ma eken dep shoshyp qaldyq. «Aıtaq, aıtaq, aıt!» dep, joq ıtti kómekke shaqyryp, ótirik kúsheıdik, baqyraýyn qoımady. Biz qansha aıqalasaq ta, elik uzamady. Balasymen birge ólmek túri bar. Barǵan saıyn bizge jaqyndaı beredi. Birese balamdy jiberińdershi dep jalyna suraǵandaı tynshı qalady, birese taǵatsyzdanyp, ashýlanǵandaı bir orynda typyrshıdy. Bir ret tipti jaqyn keldi. Móldiregen tanadaı qara kózderinen jas tamshylaryn kórip qalǵańdaı boldym.

— Beıshara, jylap tur eken, — dedi Raqtaı julyp alǵandaı. Ol da baıqap qalǵan eken.

— Jibersek, jibereıik.

Eliktiń balasyna qanshama qyzyǵyp qaraǵanymyzben, qımaǵanymyzben, anasyn aıap kettik te, bosatyp jiberdik.

Ekeýi shubyrǵan kúıi kezeńge shyqty. «Balalar, senderge rahmet» degendeı bizge qarap sál turdy da, qyrdan asyp kete bardy.

---