InfoHub Logo

Erkin men Erik áldenege kerildesip qaldy. Birin-biri ıterip, eregisýleri toqtar emes. Bir kezde Erik yzalanyp qolyndaǵy oıynshyq temir qalaqpen Erkinniń tizesinen salyp qaldy. Erkin shyńǵyryp jylaı bastady.

— Erik, sen ne istediń? Erkinniń tizesinde jara bar edi. Minekı, sol jaryldy. Endi qaıttim? — Erkinnen eki jas úlkendigi bar Aısha shyr-shyr bolyp, tyzaqtady.

Muny estigen Erik qatty qorqyp ketti. Úńilip qarasa, shynymen-aq, oımaqtaı jaradan qan aralas iriń aǵyp tur eken.

— Men kez kelgen jarany jaza alamyn. Áke-sheshem dáriger ǵoı. Endeshe, maǵan senińder, — dedi anandaı jerde turǵan Aıgúl júgirip kelip. Ol aldymen jaraqattanǵan jerdi taza maqtamen súrtti. Áldeqandaı qyshqyl ıisi bar suıyq qospamen qotyrdy jýdy. Sonan soń úıinen ákelgen jaraǵa arnalǵan maıdy jaqty. Sosyn aq dákemen Erkinniń tizesin orap-orap tańyp tastady.

— Sen jaqsy qyzsyń. Ne isteý kerek ekenin bilesiń, — dedi Erik qýanǵannan yrjalaqtap kúlip. Ol sonan soń da Aıgúldi qalaı maqtaryn bilmeı, oıyna kelgen jaqsy sózderin aıtyp, jalbaqtaı berdi. Eń bastysy ol kóńildi edi.

— Aıgúl asa meıirimdi. Men dosymdy maqtan etemin, — dedi Aısha qurbysyn qushaqtap, betinen súıip.

— Men óskende dáriger bolamyn. Bálkim, atam sekildi synyqshy bolarmyn. Eger kóshede qulap qalsańdar ne jaraqat alsańdar, maǵan kelińder. Men synyqty salamyn, jaralardy tańamyn.

Baǵanadan beri qabaǵyn ashpaı otyrǵan Erkin osy kezde ǵana Aıgúlge qarap ezý tartty.

— Raqmet saǵan, dáriger qyz, — dedi shynaıy kóńilmen.

Erkin jadyrap edi, bólme ishi de jarqyrap ketkendeı boldy.

---