InfoHub Logo

Birde kógershin shóldep, sý ishpekke jerge túskende, ańdyp turǵan mysyq kepterdi ustap alady.

— Seni me, pálem. Qazir men seni jeımin.

— Jemeshi meni. Sen odan da tyshqandy nege aýlamaısyń?

— Maǵan aqyl úıretpe. Kimdi jeıtinimdi ózim bilemin.

Jany alqymyna kelgen kógershin qudaıdan kómek suraı bas-taıdy. Bir kezde qaıdan ekeni belgisiz egeýquıryq shyǵa keledi.

— Áı, mysyq, kógershinge tıispe. Aldymen menimen alysyp kór. Eger jeńseń, meni jeısiń. Jaraly kógershin qaıda keter deısiń. Ony da qosa azyq etersiń.

Mysyq jalt etip burylyp qarasa, alyp deneli egeýquıryq tur eken aldynda. Egeýquıryqqa áli jetpeıtinin ishteı sezgen mysyq kógershindi tastaı sala qasha jóneledi.

— Raqmet saǵan. Sen meniń ómirimdi qutqardyń.

— Oqasy joq, dostym. Alaıda men seni jegeli turmyn.

— Qalaısha?

— Solaı, dostym. Menen bári qorqady. Kerek deseń, eń kúshti degen adamdy da jeımin. Sen meniń azyǵyma aınaldyń.

— Mysyqtan da qaýipti bolǵanyń ba?

— Men mysyqpen tóbelesip, onyń sazaıyn bereıin degenmin. Mysyqty da, seni de jegendi jón sanaǵanmyn, — dep egeýquıryq jaraly kepterge tónip kele jatady.

Osy sátte bir ıt paıda bolyp, egeýquıryqqa shap beredi. Egeý­quıryq jaralanyp, qasha jóneledi.

— Raqmet saǵan, — deıdi kepter taǵy da. — Meni jegeli turǵan joqsyń ba?

— Joǵa. Men jyrtqysh emespin. Adamnyń dosy men bolamyn. Qazaqy tazy tuqymynanmyn. Esimim — Jolaıaq.

— Al meni jaı ǵana Darı deseń bolady.

— Jaqsy. Endi ushpaısyń ba?

— Jaralymyn.

Bul ýaqytta «Jolaıaq, Jolaıaq» dep ıttiń ıesi de kele qalady. Jaraly kógershindi kórgen adam kepterdi qolyna ustaı ketedi. Sóıtse bul adam zoolog eken. Úıine kele sala kógershindi emdeıdi. Kóp uzamaı kógershin jazylyp usha jóneledi.

Osylaısha kógershin adam balasynyń bergen nan qıqymyna qoryqpastan jerge túsetin bolypty. Adam men ıtti dosyndaı kóretini osydan qalsa kerek. Alaıda jerge qonar aldynda mysyq nemese egeýquıryq joq pa eken dep jan-jaǵyna sholyp qaraıdy eken. «Saqtyqta qorlyq joq» degen sózdi esten shyǵarmaı júrgen kógershin árdaıym oılanyp ushatyn kórinedi. Al adamǵa qalaı jaqsylyqpen qaıtararyn bilmegen kógershin únemi alǵys aıtýmen keledi. Sonyń áserinen bolar, kepter júrgen jerde tynyshtyq ornaıdy eken. adamdar bolsa kógershindi beıbitshilik qusy dep sanaıdy.

---