InfoHub Logo

Bir jasqa áli tolmaǵan balalardyń 2%-inde kóz jasy qaltasynyń qabynýy kezdesedi. Jańa týylǵan náresteniń bir nemese qos kózinde azdaǵan, tipti keıde kóp iriń bolady. Bul ne, jáı dáneker qabyqtyń qabynýy (konúktıvıt) ma, álde kóz jasy qaltasynyń qabynýy (dakrıosıstıt) ma? Anyqtaý úshin balany dárigerge, onyń ishinde balalar nemese kóz dárigerine kórsetken jón.

Adamnyń kóz jasy bezi dúnıege kelgennen keıin 1-2 aıdyń ishinde jas shyǵarady. Mine, sondyqtanda kóz jasy qaltasynyń qabynýy belgisi kóbine nárestege 1-2 aı tolǵannan keıin paıda bolady. Keıde kóz jasy qaltasynyń qabynýy dúnıege kelgen soń dereý nemese 10-15 kúnnen keıin bastalýy da múmkin.

Aýrýdyń bastapqy kezinde kóz jasaýrap, jas aǵady. Sodan soń kóz jasy shyryshqa, irińge aınalady. Keıde kózdegi iriń tańerteńgisin baıqalady.

Ony súrtip tastaǵannan keıin, iriń qaıtyp bilinbeıdi. Osyndaı jaǵdaıda kóz jasy qaltasy tusyn saýsaqpen bassa, kózden shyrysh ne iriń burq ete qalady. Osy bólingen zat az bólinse de, kóz jasy qaltasynyń qabynýy dıagnozyn qoıýǵa bolady.

Eger kóz jasy qaltasynyń qabynýyn emdemese, qasań qabyq jalaqtanǵan kózde qaltadaǵy iriń jalaqty irińdi jaraǵa aınalady. Nemese, aýrý asqynyp, kóz jasy qaltasynyń tusyndaǵy teri sheli irindep qabynady. Bul kezde dene qyzýy kóteriledi, kóz sańylaýynyń muryn jaq bóliginde teri qyzaryp, isinedi. Ol murynnyń qyryna, betke taraýy múmkin. Mundaıda kóz jasy qaltasy tusyn basýǵa bolmaıdy. Sebebi, irińdi isikti qozdyratyn ınfeksıa tarap, kóshirindi iriń ortalyq júıke júıesine jetýi ǵajap emes. Sondyqtan da kóz jasy qaltasynyń qabynýyn jáı aýrý demeı, der kózinde emdeý kerek.

Kóz jasy qaltasynyń qabynýy asqynbasa, onda qalta tusyn ýqalaǵan durys. Ýqalaýdyń ereksheligi mynada: Eń aldymen qoldy, bas barmaqty tazalap, sabynmen jýý kerek. Sodan keıin bas barmaqqa maı (vazelın) jaǵady. Náresteniń kózine eki tamshy 2%-tik kollargol eritindisin tamyzady. 3-5 mınýt ótken soń bas barmaqty murynnyń kóz jasy qaltasynyń qabynýy bar tusyndaǵy kóz sańylaýy jaǵyna, qastyń astyna tik ustaıdy. Sóıtip barmaqty joǵarydan tómen jáne syrtqa qaraı 5-6 ret jyljytady. Osydan keıin kózge jáne tanaýǵa 2 tamshydan 2%-tik kollargol eritindisin tamyzady. Bul emdi naýqas balanyń ata-anasy balalar dárigeriniń úıretýimen 7-10 kún júrgizedi. Osy ýaqyt aralyǵynda kóz irińdegenin qoımaı, jasaýraı berse, balany mindetti túrde kóz dárigerine qaratý qajet.

---