InfoHub Logo

Qazaqstannyń memlekettik saıasatyndaǵy basym baǵyttardyń biri — shaǵyn jáne orta kásipkerlikti damytý. Ony ilgeriletý — ekonomıkalyq áleýet pen áleýmettik ál-aýqattyń artýyna arqaý bolady. Iaǵnı, el turǵyndarynyń jaǵdaıy jaqsaryp, turmys sapasy ósedi. Eldegi jumyssyzdyqty joıatyn da dál osy shaǵyn jáne orta kásipkerlik. Nege deseńiz, ekonomıkany turaqtandyrýshy ári sheshýshi faktor osy baǵyt sanalady. Osyǵan baılanysty, elimizde keshendi jumystar legi jasalyp jatyr. Sondaı isterdiń biri — shaǵyn jáne orta kásipkerlikke arnalǵan sıfrlyq platforma (Ismet.kz). Kásipkerlerdiń jumysyn jeńildetýge baǵyttalǵan isti «Qazaqtelekom» AQ bastaǵan bolatyn.

«Biz shaǵyn jáne orta bıznestegi birneshe máselelerge nazar aýdardyq. Olardyń biri — prosesti avtomattandyrýdyń tómen deńgeıi bolyp otyr. Al Ismet.kz-tiń áleýeti óte joǵary. Bizdiń platforma arqyly qoldanýshylar men jetkizýshilerdi elektrondy komersıaǵa tartqymyz keledi. Ol barlyq jaǵynan yńǵaıly, mundaı jaıly alań áli oılap tabylǵan joq», — deıdi «Qazaqtelekom» AQ bıznes-sheshimder jáne ınfokommýnıkasıa departamentiniń dırektory Qýat Sandalov.

Bul júıeniń basty artyqshylyǵy — ýaqytty únemdeýi ári qolmen jasalatyn jumystardy boldyrmaı, paıda ákelýi. Mundaǵy barlyq operasıalar tapsyrys boıynsha kompúter nemese smartfon arqyly júrgiziledi. Elektrondy sıfrlyq qoltańbamen rastalady. Atalǵan platforma 2018 jyldyń tamyzynan bastap iske qosylǵan bolatyn.

Ismet.kz-tiń ereksheligi bıznes qaýymdastyq úshin úlken dıalog ornata alýynda bolyp otyr. Nátıjesinde, qajetti jańa naryq kózderi ashylatyn bolady.

«Bizdiń esebimizshe, sıfrlyq platformanyń basty tapsyrmasy — bul ekojúıelerdi qurý. Biraq bizge kedergilerdi joıýǵa týra keledi. Artynsha shaǵyn jáne orta kásipkerlik úshin sıfrlyq qatynas jasalady. Bul óte qıyn mindet sanalady», — dedi Q. Sandalov.
Bolashaqta 250 qyzmet túrin usynýdy kózdep otyrǵan bul joba búginde mynadaı qyzmetterdi kórsetýde: marketıń (tegin júrgiziledi), elektrondyq saýda, zańdyq qyzmetter, onlaın qujat aınalymdar, keden prosedýralary, kadrlyq máseleler, sýbsıdıalaý, nesıe alý, aýdıt, ulttyq býhgalterlik esep pen aparattyq kasalyq esep jáne t.b.

Ismet.kz bıznesti búge-shúgesine deıin josparlaýǵa, ony taldap zertteýge kómek beredi. Bir sózben aıtar bolsaq, kásipker úshin taptyrmas bıznes-keńesshi. Olaı deıtin sebebimiz, bıznes boıynsha týyndaıtyn kez kelgen máselege tótep bere alady. Iaǵnı, qazirgi shyndyqtarǵa jaýap berýge qaýqary bar. Budan bólek, onyń aýqymy men aıasy óte keń. Paıdasy da orasan. Iaǵnı, eldegi elektrondyq qyzmet pen elektrondy saýdanyń damýyna yqpal etedi. Elektrondy memlekettik qyzmet damıdy. Bastysy — shaǵyn jáne orta kásipkerlerdiń sany artyp, olardyń isi órkendeıdi. Bunyń nátıjesi — ekonomıkalyq jáne áleýmettik ósim arqyly kórinis tabady.

---