InfoHub Logo

«Qazaqtelekom» AQ-nyń bastamasymen bıylǵy jyldyń tamyzynan Ismet.kz dep atalatyn bızneske arnalǵan ashyq sıfrly platforma iske qosyldy. Ol kásipkerlerge sıfrlyq qyzmetter men onlaın múmkindikterdi usynady: býhgalterlik esep júrgizý, elektrondy shot-faktýralar, onlaın-kassalyq apparat, onlaın-sharttar, qoıma esebi, onlaın qujat aınalym, baılanys quraldaryn uıymdastyrý, satylymdardy avtomattandyrý.

Sıfrlyq platforma usynǵan barlyq elektrondyq qyzmetter zańdy jáne olar QR kodymen rastalady. Ismet.kz-tiń kómegimen shaǵyn jáne orta bıznes sýbektileri óz ónimderin ilgerilete alady. Sondaı-aq, basqa jetkizýshilerden taýarlar men qyzmetterdi satyp ala alady. Portal ınterfeısine kelsek, SHOB ıelerine jeke kabınet beriledi. Buǵan qosa, sıfrlyq qyzmetterge, aqparattyq qyzmetterge qol jetkizýge qosymsha keri baılanys fýnksıasy usynylady.

Osyndaı sıfrlyq platformalar álem elderinde keńinen qoldanysta. Onyń arqasynda olardaǵy bıznes proses jaqsarǵan ári damyǵan. Sáıkesinshe, ekonomıkalyq áleýetteri artqan. Máselen, Úndistandaǵy «Aadhaar» aqparattyq júıesi kúrmeýi qıyn túıtkilderdiń túıinin sheshýge atsalysqan. Al M-Pesa degen sıfrlyq platforma bolsa Kenıa jáne kóptegen elderge qarjy jáne bıznes salasy boıynsha paıdasyn tıgizýde. Iaǵnı, búkil prosesti avtomattandyryp, qarjy salasyna aýqymdy ınovasıalar legin ákelýde. Nátıjesinde, memlekettiń damýyna jańa serpin berip, kompanıalar jumysynyń tabysy artýda.

Negizinen, álemdegi sıfrlyq ekonomıkanyń damýyna ınovasıalar yqpal etedi. Ásirese, bıznes salasyna ınovasıalardyń enýi — kóptegen oń ózgerister ákeledi. Sol sebepten halyqaralyq qaýymdastyqtar sıfrlyq platformalar boıynsha jumys jasaýdy údete túsýde.
Osyndaı formattyń arqasynda kásipkerler qaýymy bıznesine qatysty qyzmetterdi jeńil ári sapaly ala alady. Munda jas bıznes bastaýshy úshin de úlken múmkindikter qarastyrylǵan. Máselen, marketıń boıynsha tegin kómekter alsa bolady. Bul óz kezeginde jańa tutynýshylar legin qalyptastyryp, kásibiniń ilgerileýine yqpal etedi. Arnaıy oqytý kýrstary da qarastyrylǵan. Nátıjesinde, kásipkerlerdiń bıznes týraly bilimi men biliktiligi arta túsedi. Platformany komersıalyq paıdalanýǵa berý jumystary osy jyldyń sońyna deıin oryndalmaq.

Atalǵan ashyq alań arqyly bıznesti tıimdi basqarýǵa bolady. Atap aıtqanda, tasymaldaý salasyndaǵy elektrondyq baqylaýdyń arqasynda kóp kedergilerdiń aldyn alýǵa bolady. Bul boıynsha onlaın tártipte tasymaldaýshyny tańdap, júkti qadaǵalap, onyń qajetti jerige jetkizilýin tekserip otyrsańyz bolady.

Ózderińiz biletindeı, shaǵyn jáne orta bıznesti damytý — QR memlekettik saıasatyndaǵy basym baǵyttardyń biri. Ony ilgeriletý — ekonomıkalyq áleýet pen áleýmettik ál-aýqattyń artýyna arqaý bolady. Sondyqtan bul salaǵa jańashyldyqtar men sıfrlyq formattyń kelýi — bul salany odan ári damytyp, kásipkerler qaýymy úshin jaıly jaǵdaı jasaıdy.

Osy platforma arqyly «Qazaqtelekom» AQ qysqa merzimde B2B segmentten bar klıentterdi kompanıamen qaǵazsyz ózara árekettesý tehnologıalaryna aýystyrýdy josparlap otyr.

---