InfoHub Logo

Nursultan Ábishuly Nazarbaev – Qazaqstan Respýblıkasynyń tuńǵysh prezıdenti, elimizdi joǵary halyqaralyq deńgeıge shyǵarǵan tulǵa. Memleket basshysynyń kóregendiliginiń arqasynda Qazaqstan álem tanyǵan el boldy, memleketimizdiń damytýdyń dańǵyl jolyn saldy.  «Qazaqstan-2030» strategıasy álem saıasatkerleriniń nazaryn aýdardy. Aıaqtalý merziminen buryn óziniń mejelegen maqsatyna jetken Qazaqstan damyǵan 30 eldiń qataryna qosyldy. Bul birden-bir tuńǵysh Elbasynyń eren eńbegi desek qatelespeımiz.

Elbasy ómir joly talaı kitapqa arqaý bolarlyq dúnıe. Ol 1940 jyly 6 shildede Almaty oblysyndaǵy Shamalǵan aýylynda dúnıege kelgen. Oqýda ozat, bilimge qushtar boldy, ásirese kitap oqýǵa jany qumar edi. Ol ejelgi ańyzdar men babalardyń nanym-senimderi týraly úlkender aıtatyn áńgimelerdi yqylaspen tyńdaıtyn. Eńbek jolyn 1960 jyly Qaraǵandy oblysynyń Temirtaý qalasyndaǵy «Kazmetallýrgstroı» tresiniń qurylys basqarmasynda bastady. 1989-1991 jyldary Qazaqstan KP OK birinshi hatshysy qyzmetin atqardy. 1991 jyly jeltoqsannyń 1-inde tuńǵysh ret Qazaqstan Respýblıkasy Prezıdentiniń jalpyhalyqtyq saılaýy ótti. Saılaý nátıjesinde Nursultan Ábishuly Nazarbaev basym daýyspen (98,78 %) jeńiske jetti. Ol el basqarǵan 30 jylǵa jýyq ýaqytta Qazaqstan kóptegen jetistikterge qol jetkizdi. Elimizdiń ekonomıkasyn jaqsartyp, halqymyzdyń ál-aýqatyn kóterdi.

Ál-Farabı atyndaǵy Qazaq ulttyq ýnıversıtetinde stýdentterdiń bilimdiligin arttyrý maqsatynda túrli sharalar, merekeler ótkiziledi. Atap aıtar bolsaq, ýnıversıtetimizdiń profesory Qozybaqova Fatıma apaıdyń uıymdastyrýymen «Elin súıgen, eli súıgen Elbasy» atty taqyrybynda fılologıa jáne álem tilderi fakúltetiniń Shetel fılologıasy mamandyǵy stýdentteri arasynda konferensıa ótkizildi. Konferensıa maqsaty – Nursultan Ábishuly Nazarbaevtyń eńbekterin, onyń halyqaralyq deńgeıde jasaǵan eleýli isterin taldaý. Konferensıada stýdentter prezıdenttiń «Tarıh tolqynynda», «Táýelsizdik belesteri», «Syndarly on jyl», «Qazaqstan joly» sekildi eńbekteriniń búgingi kúnde úlken mańyzy bar ekenin ashyp kórsetti. Halqymyzdyń uly tulǵasyna aınalǵan tuńǵysh prezıdentimizge degen qurmetin kórsetti. Sonymen qatar onyń «Rýhanı jańǵyrý» jáne «Uly Dalanyń jeti qyry» maqalalary da taldandy. Bul shara stýdentterdiń mádenı jáne rýhanı damýyna yqpal etti, ulttyq sana-sezimin damytty. Mundaı bastamalar stýdentterdiń shyǵarmashylyq qabiletin arttyryp, ǵylymı izdenisine sebepker bolady.

Elbasynyń el basqarar qabiletin baǵalaı kele, Reseı Federasıasynyń prezıdenti Vladımır Pýtınniń aıtqan mynadaı pikiri bar: «Nursultan Ábishuly — saıasatta kópten, Keńes dáýirinen kele jatqan tulǵa. Meni qatty tańǵaldyratyny — onyń zaman tynysyn tap basyp tanıtyny. Bul qasıet — búgingi álemdi dóp basyp sezine alatyn qasıet oǵan qaıdan daryǵan?.. Ol adal da ádil. Bir máselelerdi talqylaǵanda, árdaıym qatardaǵy adamdarǵa bul qalaı tıedi dep oılap turady».

Nursultan Ábishuly Nazarbaevtyń álem jurtyshylyǵynyń nazaryn aýdaratyn eleýli isteri kóp. Ol elimizdiń damý jolyn kórsetetin «Qazaqstan-2030» jáne «Qazaqstan-2050» strategıalaryn qabyldady. Bul josparlar Qazaqstannyń damýyna úlken úlesin tıgizedi. Qazirgi tańda Respýblıkamyzda on beske jýyq Nazarbaev Zıatkerlik mektepteri jáne Nazarbaev ýnıversıteti qurylǵan. Osynyń barlyǵy prezıdent jumysynyń nátıjesi.

Tuńǵysh prezıdenttiń elge jasaǵan jaqsylyǵyn, eldi damytýǵa baǵyttaǵan jumystaryn jas urpaqtyń sanasyna toqýy óte mańyzdy. N.Á.Nazarbaev bizdiń elimizdiń damýyna orasan zor úles qosty. Árbir qazaqstandyq tuńǵysh Elbasymen maqtana otyryp, ıgi isterin jalǵastyra alýy  kerek. Nursultan  Nazarbaev – qazaq eliniń maqtanyshy, kózdegen maqsatyna jetetin órshil rýhty, bilimdi, birtýar perzenti.

F.Qozybaqova, Ál-Farabı at. QazUÝ tarıh kafedrasynyń dosenti

G. Mamythan, 1-kýrs stýdenti

---