InfoHub Logo

Aýyl keshi. Óristen qaıtqan mal tynyshtalyp, adam aıaǵy saıabyrsyǵan kez. Áldeqaıdan jarǵanattar paıda boldy.

Erteń ketemin. Taǵy qala. Tas úıler, tas kósheler, mashına gúrili, birin-biri tanymaıtyn adamdar álemi... Qala.

— Jınalyp jatyrsyń ba?

— Iá. Erteń jumys.

— Bir kún qala tursańshy.

Mamama tań qalyp qaradym.

— Erteń jumys qoı!

— Jumysyń eshqaıda qashpas. Seni Emshi apaǵa kórsetip alaıyn dep edim.

— Qoıshy, mama. Aty-jóni joq nemenege baramyn.

Budan ári sóıleskim kelmeı dalaǵa shyqtym. Qarańǵylyq qoıýlana bastapty. Sýyq. Oıda joqta paıda bolǵan Aqtaban aıaǵyma oratyla ketti. Júregim sý ete qalǵan.

— Esiń durys pa, Aqtaban? Ket!

— Qyzym, bir kún qalsań esh nárse etpes. Endi qashan kelem ǵoı deısiń...

Kúrsindim. Bastyǵymnyń tis arasynan syzdyqtap shyǵatyn zárli daýysy keldi qulaǵyma. Denem titirkenip ketken. Tipti erteńine aýyldyń ekinshi shetindegi Emshi apanyń úıine bara jatyp ta osy jaǵymsyz kúıden aryla almaı qoıdym. Aýyl syrtyndaǵy jalǵyz aıaq jol. Mamam aldyma túsip alǵan. Eńkish tartqan jotasyna, oramaldan qobyrap shyǵyp ketken aq shashyna qarap, kózimdi tómen salamyn. Meni ertip kele jatqanyna qýanǵan ol aıaǵyn shıraq basyp, alǵa qaraı umsynyp qoıady.

— Qazir kóresiń ǵoı. Jaqsy kisi. Ylǵı senderge qumalaq ashtyryp turamyn. Seni baıaǵydan kórsetkim kelip júr edi. Jaqsy boldy.

Úıine jaqyndaǵan kezde eńkeıip jerden shybyq ilip aldy.

— Itteri bar.

Qaqpasynyń aldyna kelgende aıqaılaı bastady.

— Apa, Apa!

Ystyq kúnniń astynda osynsha júrgendikten bolar, daýsy qarlyǵyp shyǵady.

— Apa!

Men de aıqaılaýǵa kiristim.

Sálden keıin qaqpa ashylyp, aq oramal salǵan kishkentaı kempir kórindi. Úp etken jel soqsa ushyp ketetin qaýyrsyndaı bir shókim kempir.

— Amansyz ba?

— Amansyńdar ma?

Ájim kómkergen kózderin syǵyraıtyp bizge zer sala qaraıdy. Sodan soń jaqyndap kelip betimnen súıdi:

— Qaladaǵy qyzym ǵoı. Demalysqa kelipti. Sizge kórsetip alaıyn dep...

— Kelińder, kelińder.

Qońyrqaı ǵana shaǵyn bólmege kirdik. Emshi apa tym jaı qozǵalatyn, tym jaı sóıleıtin kisi eken. Daýysy estiler-estilmes qana. Úıge kirip otyrǵannan keıin:

— Birtúrli aýyryp turmyn. Ustap kórshi, — dep qolyn mamama sozdy.

— Iá, dirildep tursyz ǵoı, tegi..

— Sýyq tıgizip aldym ba, bilmeımin.

Maǵan qarady.

— Endi qaıteıin, janym? Endi ne isteıin?

— Aýyryp tursańyz áýre bolmańyz.

— Sóıteıin be. Erteń kelińdershi, renjimeseńder. Erteń kelińdershi..

Ornymyzdan turyp esikke bettedik. Ol shyǵyp ketkenimizshe erteń kelýimizdi ótinip suraı berdi..

— Erteń kelińdershi...

— Jaqsy, jaqsy.

Jolda erteń kele almaıtynymdy oıladym.

— Jaqsy kisi eken.

— Taǵy bir kún qalasyń ba?, — dedi mamam.

— Joq, qala almaımyn.

— Qala salsańshy.

— Bastyǵym she?

— ... Erteń kútetin boldy ǵoı, balam-aı!

Emshi apanyń sábıshe jaýtańdaǵan janary oraldy oıyma. Biraq qala almadym.

Qalada da jup-juqa ájeniń qıylǵan kelbeti esime jıi túse bergen. Ondaıda ózimdi áldenege kináli, jaýapty sezinemin. Jaǵymsyz kúı. Sondyqtan oılamaýǵa tyrysatynmyn.

Aýylǵa kelesi kelgenimde eń aldymen Emshi apany suradym.

— Ol kisi qaıtys bolyp ketken, — dedi mamam.

Sóıtti de júzin teris buryp áketti.

---