InfoHub Logo

Ol televızordy sóndirip, meniń qasyma keldi.

— Kitap oqyp otyrsyń ba?

— Iá.

— Úndemeı otyra turaıynshy.

— Tek bóget jasama.

— Jasamaımyn.

Stoldyń ekinshi shetindegi oryndyqqa jaıǵasyp, jaǵyn taıandy.

— Búgin túnde qar aralas jańbyr nemese jańbyr aralas qar jaýady.

Kúlip jiberdim. Ol da kúlip, aldyǵa qaraı umsynyp qoıdy.

— Óziń kitap oqı beredi ekensiń.

— Iá.

— Dalaǵa shyqpaısyń ba?

— Joq.

— İshiń pyspaı ma?

— Jańa bireý bóget jasamaı tynysh otyramyn degen sıaqty edi.

Úndemeı qaldy. Sodan soń sóredegi eń úlken kitapty tańdap alyp, paraqtaı bastady.

— Sen meni túk jaqsy kórmeısiń.

Betine qaradym. Qabaǵy túıilip, sarǵysh óńi qyzaryp ketipti. Ashýlanyp otyr.

— Jaqsy kóremin.

Basyn úzildi-kesildi shaıqady.

— Jaqsy kórseń, kitap oqymaı, menimen seıleser ediń.

— Sen de kitap oqysańshy.

— Meniń sóıleskim keledi.

Kitabymdy keri ysyryp, júzine zeıin qoıa qaradym.

— Al, sóıleseıik, ne aıtasyń?

— Sen meni jaqsy kórmeısiń.

— Qandaı qyzyqsyń. Jaqsy kóretinimdi dáleldeý úshin ne isteýim kerek, senińshe?

— Sóılesýiń kerek.

— Sóılesip otyrmyz ǵoı.

Qabaǵyn shytty. Sodan keıin úlken kitaptyń betin sart etkizip jaýyp, ornynan turdy.

— Bulaı sóıleskeniń maǵan kerek emes.

— Kerek bolmasa, basymdy aýyrtpaı, bar. Óz jumystaryńdy iste.

— Barmaımyn.

Ornyna qaıta jaıǵasty. Kitabymdy qaıta qolyma aldym. Birshama ýaqyt ótti. Ol sóıler emes. Tipti bolmaǵan soń, qasyna baryp tizerlep otyrdym da:

— Monshaǵymdy sheship bershi, — dedim.

Ol kútkenimdeı-aq qasaryspaı jyldam, lyp etkizip aǵyta qoıdy.

— Pysyqsyń ǵoı óziń.

— Sen joqta Názıranikin júz ret aǵytyp bergenmin.

Qyzǵandyrmaq bolǵan túri.

— Jaraıdy. Endi úndemeı otyr.

Qaıtadan kitabyma qaradym.

— Shashyńdy tarap bereıin be?

— Keregi joq.

— Tarap bereıinshi.

— Ózińdikin tara.

— Senikin taraıynshy.

— Ne degen adamsyń! Tynyshtyq beresiń be, joq pa?!

Kitabymdy aldym da, kelesi bólmege ótip, tósekke qısaıdym.

— Tursyn, bar, dalaǵa shyǵyp, taza aýa jutyp kelshi...

— Dala sýyq.

— Onda sóılemeı tynysh otyr.

— Televızor qosamyn.

— Kitap oqy.

Úlken kitapty sartyldatyp paraqtaýǵa kiristi. Sálden soń aýyr kúrsinip japty da, ún-túnsiz qaldy. Úıdiń ishin óli tynyshtyq kernegen. Kózimdi jumyp qalǵı bastadym.

— Men senimen ómir súre almaıdy ekenmin.

Daýysy alystan talyp jetedi..

— Mineziń nashar. Adam sıaqty sóılese de almaısyń. Senen Názıra myń ese jaqsy. Názıramen karta, shahmat oınaýǵa bolady. Názıra senen myń ese sulý...

— Aýzyńdy jap.

— Jappaımyn.

Shalqamnan aýdarylyp tóbege qaradym. “Názıra, árıne, sulý”. Kirpikterim jumylyp, denemdi uıqynyń tátti salmaǵy basyp bara jatyr. Ol taǵy úndemeı qaldy. Alystan ıtterdiń jarysa úrgeni, mashına gúrili estiledi. Kitabymdy ashyp, maǵynasyz úńildim. Tósek salý kerek shyǵar.

— Tursyn, saǵat qansha boldy?

Úndemeıdi.

— Tursyn...

Daýysym erkimnen tys aqyryn shyqty. Ornymnan turyp, saǵatqa qaradym. On bir jarym. Tursyn basyn stolǵa qoıyp uıyqtap qalypty. Qabaǵy túıýli. Aqyryn baryp shashynan súıdim. Ol bar bolǵany toǵyzda edi.

---