InfoHub Logo

Dala qarańǵy. Biraq alystan eleýsiz ata bastaǵan tańnyń demi seziledi. Syrtqa qulaq túrdim. Tynysh. Sálden keıin qoraz shaqyrady, sodan soń ıt úredi, torǵaılar shyryldaıdy.

Dálizde áldekimniń ary-beri júrgeni estildi. Ájem. Aıaǵyn neǵurlym aqyryn basýǵa tyrysqan saıyn eski eden soǵurlym qatty syqyrlaıdy.

Turyp dalaǵa shyqqym keldi. Salqyn shyǵar. Ájemdi oıladym. Nege uıyqtamaıdy. Nege dem almaıdy. Ólip qalsa qaıtedi? Ájem ólse ne isteıtinimdi oıladym. Denemdi sýyq tolqyn shaıyp ótti. Uıqym ashylyp ketken. Erte me kesh pe bári óledi ǵoı. Syǵymdalǵan júregim aýzyma tyǵyldy. Ájem ólmese eken. Kórgim kelmeıdi sol kúndi. Kózime jas keldi.

— Áje! Áje deımin!

— Ne kórindi tań atpaı?

— Nege uıyqtamaı júrsiń?

— Áli erte. Jat.

"Al sen ólip qalmaısyń ba?" dep suraǵym keldi. Qaıtadan óksik tyǵyldy tamaǵyma. Nege adamdar óledi? Ájemniń ólgenin kórsete kórme, Jaratqan ıem. Jalynamyn. Ájem ólse qaıda baramyn, Jaratqan ıem, myna úıde kim qalady, kim meni qarsy alady, kim shyǵaryp salady, Jaratqan ıem. Kim?

Betimdi jýǵan jas jastyqqa tyrsyldap tama bastady. "Odan da men óleıin"...

....Túsime úlken úı kirgen. İshinde tanys emes adamdar júr. Al men nege ekeni belgisiz sharap iship otyrmyn. Óte jaqsy sharap.

---