InfoHub Logo

Eliniń irgesine jaýdyń tabanyn tıgizbegen, halqynyń abyroıyn asyrǵan aıbarly Syrymbet batyr toqsan úsh jastan asyp baryp dúnıe salypty. Sonda da batyrdyń azaly qaıǵysyna kúlli el kúńirenedi. Bul tusta bet-bedeli myǵymdalǵan, abyroıy asqaq, aýyzy dýaly qarıalardyń danasy sanalatyn, abyz atanǵan Álmerek bıdiń de seksenge qadam basqan shaǵy eken. Jan seriginen, syrlas-muńdas janashyrynan aıyrylý bul kisiniń de qabyrǵasyna batady. Syrymbet batyrdyń aýylyna qara kórinetin taı shaptyrym jerden «oı, baýyrym!» dep at qoıyp barady.

Azaly aýyldyń kári-jasy botadaı bozdap, aıbary astam batyryn joqtap kúńirenedi. Attan aýnap túsken Álmerek abyz eń aldymen eki qolyn búıirine taıanyp, esik aldynda jylap turǵan Hankeldimen kórisedi. Sodan ári «basqalarǵa da jubanysh bolsyn» degen oımen bir shetinen túgel kórisip shyǵady. Bul mindetin ótep bolǵannan keıin baryp kóńil aıtady:

— O, jurtym, asqar taýdaı aıbarly Syrymbet batyr endi bul dúnıede joq. Biraq eldiń kókeıinen onyń aıbaty óshpeıdi. Qarama, jurtym, mólteńdep. Attyń ornyn taı basady. Erdiń jolyn el qýady, dańqyn saqtaıdy. Syrymbet batyrdyń tuıaǵy muqalǵan joq. Hankeldi shyraǵym, eldiń arqa súıer beli endi ózińsiń. Elińdi móndi-móndi etpe! Ákeńnen kórgeniń, úırengeniń bar. Jebeńniń oǵyn jon, elińdi saq kúzet, Qudaı jebesin!

Abyzdyń sózin arqalanyp, basqa qarıalar da oı qozǵaıdy, yqylas-peıilmen qostaıdy.

— Aıtqanyńyz haq, abyz ata! Perishteniń qulaǵyna shalynsyn! — desip, ıgi iske qulshynysady. Álmerek abyz endi Hankeldi batyrdyń ózine burylady.

— E, shyraǵym, ótpeıtin ómir joq, synbaıtyn temir joq. Er ótedi, el qalady. Qalǵan eldi óksitpeı, berekesin saqtaıtyn — er. Qalyń elińniń endigi qorǵany ózińsiń. Tas bas, asqar as, mańdaıyń kúnge kúısin, paıdań elge tısin! Sonda eliń Syrymbettiń sıpatyn seniń boıyńnan, oıyńnan tapsyn. Áke jolyn tý qyp usta!

Abyzdyń ósıetine eldiń kóńili aýady, oıǵa shomady. Ár adam óziniń aldaǵy kúnine ár alýan qıalmen sholý jasaıdy. Sony sezgen abyz oıyn ári qaraı shırata túsedi de, shyjymdap baryp túıinin túıedi:

— Jel — jeliktiń jelisi,
Jol — eldiktiń órisi.
Daýyl — dabyra, dúrligedi,
Shoshytyp eldi búldiredi.
Ótken ómir — óshken shoq,
Elden arys kóshken joq.
Ómirdiń aqyry — ólim,
Máńgilik ornyń — kóriń.
Búgingi bar — erteń joq,
Bıikteı bersin — óriń!

— Syrymbet armanda ketken joq, — deıdi taǵy bir etjendi qart sózdi jalǵap, — asaryn asady, jasaryn jasady, eli úshin ómir súrdi. Sol úshin qasterli, topyraǵy torqa bolsyn!

— Endi, — deıdi abyz, — buqara halyqtyń buıyqpaı, oı toqtatar tuǵyry osy.

Azanyń ústinde abyz kópshilikke arǵy-bergi zamanda bolyp ótken talaı áreketter men qubylystardy sıqyrdaı quıqyljyǵan qalpymen aıtyp, uǵyndyrady.

---