InfoHub Logo

Álmerek batyrdyń joryqqa attanýdy múlde toqtatyp, el ishindegi tynysh tirshilik áreketteriniń qalyptasýyna birjola den qoıýǵa aýysqan kezi eken. Kúni-túni eldiń qamyn oılaıdy. «Az halyq edik, azyp ketpeıik» dep, jón siltep, aýyl-aımaǵynan uzap alysqa shyqpaıdy. Qatty-qaıyrymnan qalǵan qart kisiler de Álmerekti tóńirektep, qasyna kóbirek úıiriledi. Dana abyzdan turmys-tirshilik qubylystarynyń qyr-syryn jıi suraıdy, toqtaýsyz ashyla syrlasady.

Óziniń arqasúıer aıbyny, aqyldasy sanaıtyn aljannyń qas túlegi Syrymbet batyrdyń da úıde uıalap qalǵan kezi bolǵan soń, ózinen jasy kishi Álmerekti shaqyryp alyp, kún saıyn áńgime-dúken qurysady. Syrymbet batyrdyń balasy Hankeldi batyrdyń da aıbyny asyp, kúsh-qaıraty tolysyp turǵan shaǵy. Eldiń jaýy kóp. Tus-tustan ash qasqyrsha antalaıdy. Báriniń jaýlap alyp, qulǵa aınaldyrǵysy keledi.

Qarttar osy jaıdy aqyldasady da, jas batyrlarǵa jol nusqaıdy. Sondyqtan úlken-kishi batyrlar at ústinen túspeıdi, eli men jerin kúzetedi. Eldiń shetin barlap, alystan jaýdyń qybyr-qımylyn ańdıdy. Ózderi de saq júredi.

Jaz ótip, eldiń jaılaýdan oıǵa oıysqan mezgili eken. Qart Alataýdyń kók muzy siresip jatqan quzdarynyń eteginen tómen túsip, eńisti quldılaı oıǵa syrǵıdy. Shóbi sony saı-sala jandanyp sala beredi. Orǵı aqqan Taldybulaq jylǵasynyń jaıpaq jaǵasy elsiz, qulazyp jatqan, bir túrli súreńsiz edi. Bul kóriniske kóńili qońyltaqsyǵan, jan sezimi qobaljyǵan Syrymbet batyr:

— Elsiz jerde syn da, sán de bolmaıdy eken-aý! — deıdi qańyraǵan jazyqqa qarap. Qasyndaǵy abyzǵa burylyp, jabyǵa kúrsinedi. Sonda batyrdyń kirbeń kóńilin jadyratqysy kelgen Álmerek abyz tamaǵyn keneı jótkerinip alady da, oıdy sergitetin jigerli jubanysh sóz aıtady.

— Qamyqpańyz, batyr! Elimiz de, eńsemiz de ósip keledi. Eldiń sózi bar emes pe: «El kóshken soń jer qulazıdy, mal ketken soń bel qulazıdy. Qus ketken soń kól qulazıdy, qyz ketken soń el qulazıdy. Japyraǵy túsken soń tal qulazıdy, qatary ketken soń shal qulazıdy. Jaıylymy joq ań qulazıdy, qaıyry joq han qulazıdy. Susyn asyrǵan boran bozdaıdy, Shańyn sypyrǵan dala tozbaıdy». osy el, osy jer
qurymasa eken, shirkin! — dep aınalaǵa qumarta kóz júgirtti qart batyr.

— Myna dalanyń kelbetine qarap, eldiń bolashaǵyna senesiń!

Bul tujyrymdy estigen Syrymbet batyr:

— Oı, dúnıe-aı, el soǵan jetse eken! — dep taǵy da óksı kúrsinip, kúńirene kúızeledi.

---