InfoHub Logo

Erke qyz óte aqyldy, elgezek qyz. Árıne, keıde erkelep, bolmashy nársege burtıyp ókpelep qalady. Biraq onysy uzaqqa sozylmaıdy. Kúni boıy ókpelep júrgenniń nesi jaqsy? Eshkimmen oınaı da almaısyń. Onan da tez arada tatýlasyp alǵan jón. Erke qyz anasynyń tapsyryp ketken jumystaryn tap-tuınaqtaı etip oryndap qoıdy. Óz bólmesin jáne inisi shashyp tastaǵan oıynshyqtardy jınaý sonshalyqty qıyn jumys emes qoı. Ony tipti sen de isteı alasyń. Sonda anań «Qolqanatym» dep qýanatyn bolady.
—  Mysyǵym, júrshi, «Ǵajaıyp dúkenge» baryp keleıik, - dedi Erke qyz bir kezde. «Ǵajaıyp dúkende» tek paıdaly zattar ǵana satady. Ol jerdegi Dúkenshi aǵaı óte meıirimdi. Balalardy qatty jaqsy kóredi. Ekeýi dúkenge kelgen kezde Dúkenshi aǵaı kóńildenip, ándetip otyr eken:
Bul ǵajaıyp dúkenge,
Keldińder me, al,turma
Ne qalasań bereıin,
Tek paıdaly zat munda.

Densaýlyqqa paıdaly,
Sút pen qymyz bolyp tur,
Jemis degen ánekeı,
Kókónis te tolyp tur.

Aınalyssań sportpen,
Deniń saý bop jaınasań
Asyq ta bar, dop ta bar.
Shahmat bar oınasań.

Aýyrmaısyń eshqashan,
Taza júrseń balaqaı,
Shetka, jóke, sabyn bar,
Alaqaı-aý, alaqaı!
—  O, Erke qyz kelipti ǵoı!- dep erke qyz ben mysyqty kórip, dereý ánin aıaqtady. Árıne, olar kelmegende áli de biraz ándeter edi.
—  Sálemetsiz be aǵaı,- dep Erke qyz ben mysyq Dúkenshi aǵaıǵa sálem berdi.
—  Sálemet pe, Erke qyz. Qalyń qalaı, Mysyqjan. Dúkenime qosh keldińder! Al, ne qalaısyńdar, aıta qoıyńdar.
—  Aǵaı maǵan gazdy sýsyn men qytyrlaq kartop berińizshi.
—  Jo-joq, mende ondaı densaýlyqqa zıan taǵamdar joq. Erke qyz, bilesiń be, gazdy sýsyn da, qytyrlaq kartop ta sen sıaqty ósip kele jatqan kishkentaı balalarǵa óte zıan. Deneńdegi barlyq dárýmenderdi joıyp jiberedi. Sen onan da, qarashy, munda tátti aıran, sút, kepken jemisten jasalǵan sýsyndar bar. O! Bulardyń ishseń deniń saý, aqylyń kóóóp bolady.
—  Solaı ma? Jaraıdy, onda aqyldy qyz bolyp ósýim úshin maǵan áne bir ádemi qutydaǵy aıran, qurt jáne tátti bálishten  berińizshi.
Ekeýi dúkennen shyqty. Aıran shynymen de dámdi eken. Biraq, júrip bara jatyp as ishýge, tipti sý ishýge bolmaıdy. Otyryp ishý kerek. Olar dúken janyndaǵy saıabaqqa baryp, sol jerdegi sákige otyryp, qoldaryndaǵy táttilerin jep aldy. Árıne, sol jerde oınap júrgen dostarymen de bólisti. Úılerine kele jatyp, Erke qyz mysyǵynyń birnárse shaınap júrgenin baıqady.
—  Sen saǵyz alǵanbysyń? Ol zıan ǵoı!
—  Joq, bul tiske naǵyz paıdaly, shaıyrdan jasalǵan saǵyz, -dep mańǵazdana jaýap berdi mysyǵy.
Iá, balaqaı, aqyldy, shymyr bolyp ósý úshin tek qana paıdaly as ishýge daǵdylan.

---