InfoHub Logo

Ómirdi kórip júrip, ómirdi sýrettegen jazýshylardy oqyp júrip, men erkek ataýlyny bes topqa bólem:

Birinshi — áıeldi aýlamaıdy. Salqyn qandy, kóterem jandy. Ómirdegi áıelge bitken kóriktiń, jalyn qushaqtyń, názik sezim, qyzbalyqty qylyqtyń bireýi de qyzyqtyrmaıdy. Ózdiginen bas kótermeıdi. Ol ózimen ózi bolsa boldy. Birin súıdi, bolmasa qoıdy. Boı urmaıdy, joqtamaıdy. Ondaılarǵa áıel — áıel emes, aınaladaǵy aǵash, shóp, sý, mal sıaqty zattyń biri. Men biletin adamda bul — Baınazar.

Ekinshi — otty, jalyndy, áıelge qumar erkek. Áıeldi aýlampaz, áıeldi alǵyr, sypyra soǵar. Áıel artyna armansyz túsip, esalań sabylyp, esi shyǵa izdenedi. Biraq, birden birge kóshken, kóp áıeldi, jaqsy kórgish, bárin de sońyna túsip qyzyqtap, qydyryp tastap otyrady. Ylǵı sońyrqap, janyn janalap, jańadan jańany súıip lázzat alady. Aqylynan aıýandyq sezimi kúshti. Udaıy... bılegen qumarlyqtyń boranynda... Bul Stefan Sveıg jazǵan kisilerdiń kóbi — osy. Ásirese, Kazanova.

Úshinshi — áıeldi jaqsy kórmeıdi, jek kóredi. Jany súımeıdi... súımeı turyp súıkenedi. Alǵan úlgisi aınaladaǵy aıýan qylyǵynan — qustyń, qorazdyń, jylqynyń aıǵyrynyń eki aıaqty pendedegi úlgisi osylar. Bul, áıeldi kóp aýlaıdy, kóringenin atady, abıyryn alýdy maqsat qylady... Bul, Eýropa ádebıetine túsken Don-Jýan. Bul — ómirde tipti kóp...

Tórtinshi — áıeldi — áıel dep emes, adam dep ardaqtap, asyra siltep, jabaıy adamnan janyn joǵarylatam dep, ekinshi qarsyǵa shyǵyp ketip, erkektikten alystaǵan, sopylyqqa tereńdep, áıelge erkektik mahabbatyn muqaltyp, súıýin sóndirip alǵan abyzdar ómirde bolmaıdy emes, kóp zamannan bolyp ta keledi. Ǵylymı adamnyń kóbine osy minez ortaqtasady. Tolstoıdy osynyń qatarynan qarastyrý kerek shyǵar.

Besinshi — bar áıeldi emes, bir áıeldi súıetin, isin de, ishin de, qanyn da, janyn da sol súıgeni úshin baǵyshtaǵan, kórmese, saǵynatyn, kórse ot bop qabynatyn bireýler bolady. Ol súıgeni jalpynyń ishindegi jabaǵynyń biri bolsa da, jaman jaǵynyń birin kórmesten, jaqsylyǵyna qol qoıǵan, jany qumar, táni qurban ol erkektiń erekshe bir bitimi bolady. Shynaıy mahabbat ıesi. Men — osy!

---