InfoHub Logo

Aıaýly İlıas!

Aqtóbe osy kúni tipti sýyq. Kúnde boran, kóz ashyp júrip bolmaıdy. Áleýmet jumysy degen bastan asty. Bir saǵat ıa bir mınýt qolym bos bolmaıdy.

İlıas! Seniń «shamam kelse tilegińdi atqaram... Mynaý qyzmet arasynda ondaı tolǵaný qıyn da bolsa isteýge tyrysam» degen sózderińdi oqyǵanda, tóbem kókke jetkendeı boldy. Jas balasha qýandym. Ras, qazirgi kúni qyzmet óte aýyr. Ony bilmeı otyrǵanym joq, bárin de bilem. Osy kúngi bar sengenim sensiń. «İlıas qaıtse de birdeńe jazar, sony oqysam kóńilim tynyshtalar» degen úmitim zor.

Almatyǵa ıýnniń bas kezinde barmaqshymyn. Bararda Termezden ne Tashkennen telegramm berermin.

Kóriskenshe kún jaqsy bolsyn.

Patıma. 10/ III - 1930 j. Aqtóbe

İlıas!

Myna búgin Tashkenge kelgenime ekinshi kún. (17 aprel, túngi saǵat 3-te kelgem). Jol boıy aýyryp keldim. Mundaǵylar saý, aqyryndap sóılesip jatyrmyn. Ekeýmizdiń qosylýymyz týraly habarlary joq kórinedi. Qaıtyp bastap, ne dep aıaqtarymdy bilmeı otyrmyn. Qarsy alýlary jaqsy, ózderi ábden saǵynyp qalypty.

Al saǵan jáne bir jumys: sen maǵan ózińniń atyńnan Tashkendegi ádebıet jınaǵyńdy taýyp alǵa birer qaǵaz jiber. Neshinshi jyly, qaıda berilgeni týraly barlyǵyn anyqtap jaz.

Men keterde seniń Asqar týraly jazǵan synyńdy oqyǵam. Syn durys sıaqty. Tegi keleshegi bar, nede bolsa birdeńe shyǵady-aý degender týraly syn jazǵan durys-aý deımin. Eshteńe shyqpaıtyndar týraly ázirge qoıa turǵan maqul sıaqty. Óıtkeni olardy maqtap bolmaıdy, boqtaýǵa taǵy turmaıdy.

Patımań. 19 / IV -1933 jyl

İlıasym!

Joldan jazǵan eki otkrytkeńdi aldym. Búgin Máskeýden jibergen telegrammańdy alyp, myna hatty jazyp otyrmyn.

Balalar ádebıetine báıge jarıaladyq. Mezgili birinshi fevral. Taqyryby: qyzyl ásker turmysynan, burynǵy eski turmystan, osy kúngi turmystan.

Jýrnalǵa tapsyr degen materıaldardy tapsyrdym. Eki bólik baspaq baldy. «Úrıt soq-soqty» bir, «Masqara» men «Tún qarańǵy, túndik jabýlyny» bir nómirge jibermek boldy. Beıimbet jaqsy. Kúni-túni jazýda. Keńsege kóp kelmeıdi. Úı-ishin taýǵa shyǵarǵan. Ábdilda da «Medeýde» jatyr. Birdeńe jazam deıdi.

Áli umytyp bara jatyr ekemin: men jaqynda «Zelenoe ıabloko» degen roman oqydym. Amerıkada 2 jyldyń ishinde 625 ret basylyp shyqqan eken. Óte jaqsy roman, taýyp alyp oqy! «Zolotoı telenok» degen romandy taýyp alyp qoı. Ony da jaqsy dep maqtap júr.

Saǵynǵan Patımań. 25. VII — 1934 Almaty

---