InfoHub Logo

El, jer, er. Qudiretti úsh uǵym. Qasıetti úsh taǵan. Óıtkeni El qudiretti. Jer kıeli, Er qasıetti bolmaq. Kıeli topyraqqa kindik qany tamǵan ardaqty azamatyn Eli alaqanynda aıalaıdy. Sondyqtan kıeli Jerdiń qasıetti Eri Elin qudirettendiredi.

Búgin erkin eli eńiregen Erin kıeli topyraqty týǵan Jerinde qaıta týǵyzyp otyr. Ol -eldiń erine degen ótelgen boryshy. Ol - eliniń asyl ulyna degen súıinishi. Ol - eljiregen eliniń Azamat qalamgerine, qaıratker qaharmanyna degen úzilmes, óshpes mahabbaty!

Óıtkeni Ǵabıt aǵa Músirepov elin súıgendikten ǵana, ultyn ardaqtaǵandyqtan ǵana qaıratker bolǵan. Kenjelep qalǵan qazaǵyn keýdeletip ilgeri umtyltqan kóshbastaýshy bolǵan. Bilim-ǵylymǵa talpyntyp, óner-mádenıetke jetkizý úshin qalamger bolǵan.

Ǵabeń iri tulǵa edi. Eskiniń tozyǵyn buzyp jańanyń ozyǵyn halqyna ustatý úshin respýblıka mádenıetiniń tutqasyn ustady. Sol úshin biz oǵan boryshtar edik.

Ǵabeń pań asqaq edi. Otarlyq ezginiń shyrmaýyndaǵy ultyna tákappar qaısarlyq, erkindikke degen ójet senim egý úshin de órshil rýhyn barynsha tik ustady. Sol úshin de biz oǵan boryshtar edik.

Ǵabıt aǵa syrbazdyq úlgisi edi. Eliniń názik jany, ǵajap syrynyń belgisindeı etip óz kókireginiń ásem nazyn áserli áńgimelerimen, syrshyl pesalarymen, ǵajap romandarymen halqyna taratyp edi. Sol úshin de biz oǵan boryshtarmyz.

Ǵabıt aǵa ádildik pen tazalyqtyń ónegesi de edi. Qırakezik zamanynyń dúleı daýylynyń ótinde qasqaıyp qarsy júrip, ıilse de synbaı, súrinse de jyǵylmaı, ádilet týyn shaıqaltpaı alyp ótken. Ol aıtyssa da Muhańdy, Áýezovty, Sábeńdi, Muqanovty qatty syılaǵan. "Beıimbet halyq jaýy bolsa, men de halyq jaýymyn!" dep qasıetinen aınymaı, Maılındi erekshe qudiret tutqan. Sol úshin de biz oǵan boryshtymyz.

Ǵabeń kúresker edi. Goloshekınniń qandy qyrǵynyna qarsy batyl aıqasqa shyǵyp, "Beseýdiń hatyn" jazyp, qazaǵynyń tozaǵyn toqtatpaqqa barynsha kúsh salǵan bolatyn. Sol úshin de biz oǵan boryshker edik.

Mine, kıeli topyraqqa uly Ǵabeńniń búgin kindik qany qaıtadan bir tamǵandaı. Júz jyldan soń táýelsiz eliniń tórinde óz shildehanasyn ózi tamashalap otyr. Jer kıeli degenim osy. Uly perzentin ekinshi ret týǵyzyp otyr. Er qasıetti degenim osy. Dúnıeni túgel dúbirletip: "Birigińder! İrilenińder! Kóbeıińder! Kórkeıińder!" dep toıyna shaqyrdy. El qudiretti degenim osy! Ulan dalasynda ulan balasyna - uly danasyna máńgilik oryn berdi. Endeshe El de, Jer de, Er de máńgiliktiń ózi. Osy úsh taǵan uǵym birikken kezde álem-bolmys eshqashanda irimeıdi.

Toılaryń qutty bolsyn aıaýlym, ardaqtym, asqar belim - Týǵan halqym! Uly Ǵabeńniń urpaq, jerlesteri!

2002 jyl

---