InfoHub Logo

XX ǵasyrdyń anasy ótken ǵasyr Analaryna qarata sóıleıdi:

Ýa, Ana!

Sender óz ulttaryńnyń maqtanyshyna aınala alǵan ul-qyzdardy dúnıege ákeldińder. Olardy besik áldıimen ósirdińder. Tún uıqylaryńdy solar úshin tórt bóldińder.

Qazaq ulty ótken ǵasyrynda alasapyran shaıqastardy basynan ótkerdi. Sonda sender dúnıege ákelgen uldar óz ultynyń Azattyǵy men Táýelsizdigi úshin jan aıamaı kúresti. Sender úshin kózdiń qarashyǵyndaı bolyp kórinetin uldaryńnyń denesine jaýdyń ótkir jebesi kelip qadaldy, ýly naızasy túıreldi. Biraq sender el qorǵar oǵlan uldardy ósirgen edińder. Olarǵa únemi besiginen batyrlyq pen erlik týraly jyrlardy aıttyńdar. Olardyń jany men júregi ana áldıimen besiginde-aq shyńdalǵan edi. Sonan soń olarǵa ákeleri qylysh ustaýdy úıretti. Osy sebepten de sender ósirgen uldardyń rýhy ámanda ústem turdy. Olardyń erlikteri jaý áskeriniń qutyn qashyrdy, mysyn basty. Senderdiń ósirgen uldaryń óz halqynyń Azattyǵyn san márte qorǵap qaldy. Sondyqtan da ulttyń rýhy keıingige saqtalyp jetse, osy jolda sender ósirgen batyr uldarmen birge, olardyń Analary - senderdiń de úlesteriń basym, Ana!

Tarıh sóıleıdi:

Bári de ras, Analary batyr bolar ul tapty,
"Beril", - dedi jaý áskeri, menmensýmen ún qatty.
Ana ósirgen oǵlandar sonda mynaý Dalaǵa
Óshpeıtuǵyn erligimen ólmes ándi shyrqatty.

Asqaq ánnen Dalanyń da janarynda shyq turdy,
Batyr uldar sonda olarǵa kim ekenin uqtyrdy.
Pushaıman bop jaý batyry sonda mysy quryǵan,
Aýdara almaı tulparynan taqymdary myqty uldy.

Men tarıhpyn, sonyń bárin kókiregimmen uǵamyn,
Azattyǵyn jaýlaımyn dep salǵanda jaý lańyn,
Batyr uldar qorǵap qalǵan denesimen qalqan bop,
Sol isterdiń, sol erliktiń bárine de kýámin.

XX ǵasyrdyń anasy sózin jalǵaıdy:

Ýa, ótken ǵasyrdyń Analary!

Sender Azattyq úshin bolǵan shaıqastarda uldaryńdy joǵalttyńdar. Biraq sender únemi asqaq turdyńdar. Óıtkeni senderdiń uldaryń batyrlyq pen erliktiń úlgisin kórsetip, eli úshin qurban boldy. Sender osyndaı ul ósirgenderińdi maqtanysh ettińder. Bul sender úshin jarasymdy maqtanysh edi, Ana!

Senderdiń boılaryńdaǵy qasıetti biz, XX ǵasyrdyń Analary, ózimizge qabyldap aldyq. Biz de anamyz. Sender qaldyrǵan qasıetterge laıyqty ómir súre aldyq. Keshegi Jeltoqsandaǵy alańda turǵan ul-qyzdardy ómirge biz alyp kelip edik, Ana! Biz de olardyń qasıetti Azattyqqa jol salýshy ul-qyzdar bolǵandyǵyna olardyń anasy retinde maqtanamyz.

Tarıh sóıleıdi:

Bári de ras, óz sanańda baǵamda,
Erlik týdy muz qursanǵan alańda.
Sonda olardyń uldary men qyzdary
Uqsaǵysy keldi baba oǵlanǵa.

Mine, analar taǵy batyr ul tapty,
Elemesten olar sýyq, burqaqty,
Sol alańda turyp sonda ul men qyz
Taǵy da asqaq erlik jyryn shyrqatty.

XX ǵasyrdyń anasy sózin jalǵaıdy:

XXI ǵasyrdyń Analary! Sózimdi endi senderge arnaımyn.

Biz óz álemimizge laıyqty ómir súre aldyq. Bizdiń ul-qyzdarymyz da óz zamanyna laıyqty ómir súre aldy. Erliktiń de, batyrlyqtyń da, bilimniń de, aqyldyń da úzilmes altyn arqaýyn saqtap qalý - endi senderge amanat!

XXI ǵasyrdyń anasy sóz alady:

Ýa, XX ǵasyrdyń Analary!

Sizder aldyńǵy tolqyn Analardyń ultymyzǵa tán aıryqsha qasıetterin boıǵa saqtap qala alǵan Anasyzdar! Soǵan laıyqty ómir súre aldyńyzdar. Sizderdiń ózderińiz de keshegi 1941 - 45-jyldardyń arasyndaǵy soǵysta uldaryńyzdy joǵalttyńyzdar. Bul soǵysta Sizderdiń qyzdaryńyz da boldy. Olar óz ultyna tán jaýyngerlershe shaıqasty. Sol ul-qyzdar Sizderdiń qursaqtaryńyzdy jaryp shyqqan perzentterińiz edi. Biz Sizderge bas ıemiz, Ana!

Sizder ómirge eki ǵasyrdyń toǵysyna ákelip qasıetti Azattyqty ushtastyrǵan ul-qyzdardy alyp keldińizder. Biz sizdermen maqtanamyz!

XXI ǵasyr qazaq Analaryna burynǵydan da jaýapty, burynǵydan da sergek, burynǵydan da batyldaý bolýdy júktep otyr. Sebebi biz ósirip jatyrǵan perzentter aqparat maıdanynyń ortasynda ómir súrýde. Bul maıdannyń jebesi tánge emes, sanaǵa baǵyttalady. Osy jolda bizder, qazaq analary, ózimizdiń ul-qyzdarymyzdy ultyna laıyqty perzent etip tárbıeleý jolyndaǵy baǵytta únemi Sizder qaldyrǵan baı tájirıbeni boıymyzǵa serik etip kelemiz. Olardy zamanyna saı ǵylym-bilimmen qarýlandyra otyryp, olardyń boılarynda ulttyq qundylyqtardyń saqtalýyna olardyń anasy retinde sizder qaldyrǵan qasıetterdiń bıiginen mán bermekpiz.

Bizdiń Otanymyz - álem tanyǵan Táýelsiz Qazaqstan. Bizdiń perzentterimiz ony únemi maqtanysh etedi. Olar óziniń qasıetti kók Týyn asqaqtata beredi. Olar Azattyqty tuǵyrly etý jolyndaǵy kúreske óz bilimimen úlesin qosa alady. Osy joldaǵy bilim jarystarynyń "júzden júırik, myńnan tulparlary"  - bizdiń ósirgen ul-qyzdarymyz. Biz olardyń ustazdarymen birge anasy retinde muny da maqtanysh etemiz.

Qazaq Arýlary qashanda óz ultyna laıyqty ómir súre alǵan. Búgingi Arýlar - erteńgi Ana. Olar da asyl analar salǵan altyn izdi jalǵastyra beredi.

Bolashaq sóıleıdi:

Keleshegi keledi ósip kúnbe-kún,
İrgeli ispen artqa tastady kúnderin.
Dál osyndaı Analary bar kezde,
Men de únemi osy jurtpen birgemin.
Tek osyndaı Arýlary bar sátte,
Osy elmen birge ótpekshi kúnderim!

---