InfoHub Logo

2015 jyl elimizdegi mańyzdy oqıǵalardyń jylyna aınalǵany belgili. Ótken qoı jyly Qazaq handyǵynyń 550, Qazaqstan halqy Assambleıasynyń 20, Uly Jeńistiń 70, klasık aqynymyz Abaıdyń 170 jyldyǵy merekeleri  keńinen atalyp ótilip, ulttyq rýhymyzdy jańǵyrta tústi.

Osyndaı merekeler sherýi 2016 jyly da jalǵasyn tappaq. 1991 jylǵy 16 jeltoqsan kúni  jarıalanǵan  táýelsizdik kúni elimizdiń tarıhyna altyn árippen  jazylǵan edi. Mine sol ataýly merekege bıyl 25 jyl tolmaq.

Bul merzim tarıhı turǵydan alǵanda  uzaq ta emes. Biraq osy shırek ǵasyr aıasynda elimizdiń qol jetkizgen tabystary tań tamasha qaldyrady. Elimizde osyndaı uly ózgeristerdiń jasalýyna asa qurmetti Prezıdentimiz  Nursultan Nazarbaevtyń qosqan úlesi ushan-teńiz.

1991 jyly Qazaqstannyń táýelsizdigi jarıalanǵannan keıin «Qazaqstan syrtqy kúshterge súıenbeı jeke memleket retinde ómir súre almaıdy» degen sáýegeısymaqtar shyqty. Mundaı dańǵaza maqalalar kórshiles Reseıdiń gazet-jýrnaldarynda jıi jarıalanyp, elimizdiń táýelsizdiginiń baıandy bolatynyna kúmán keltirildi. Imperıalyq maqsatty kózdegen Reseıdiń belgili bir saıası toptarynyń elimizge bulaısha saıası qysym kórsetýi tegin emes-ti.

Óıtkeni táýelsizdik alǵan toqsanynshy jyldar ishinde keńestik bir ortalyqtan basqarylatyn ekonomıkalyq damý júıesi buzylyp, kóptegen óndiris oryndary jartylaı jumys isteýge kóshse, qaısybiri tarqap jatty. Elde berekesizdik beleń alyp, jekeshelendirý saıasatyn óz maqsatyna paıdalanyp qalýǵa umtylǵandar  da az bolmady.Syńarjaq saıasatshylar osy qıynshylyqty óz  maqsattaryna paıdalanyp qalǵasy kelgeni de anyq.

Elbasymyz osy syn kezeńde asa kóregendik tanytyp, «Aldymen—ekonomıka, sodan keıin - saıasat» degen  qaǵıdany alǵa tartty. 1997 jyldan bastap respýblıka ortalyǵyn Almaty qalasynan Aqmola qalasyna  aýystyrýdyń is-sharalary júzege asyryla bastady. Keıin oǵan Astana degen at berilip, qazir onyń turǵyndarynyń sany bir mıllıonǵa jaqyndady.

Sol kezeńde elimizdiń ekonomıkalyq-áleýmettik  áleýetin kóterý úshin jol qatynasyn jaqsarýǵa týra keldi. Táýelsizdik alǵan  jyldary  Aqtoǵaı - Moıynty,  Altynsarın - Hromtaý, Óskemen - Shar, Jezqazǵan - Beıneý temir joldary salynyp, respýblıkanyń ishki júk tasymaldaý jumystary jaqsartyla tústi. Sonymen  birge Aqtaý temir doly túrkmen, Iran elderiniń terıtorıalary arqyly Parsy shyǵanaǵyna shyǵaýǵa múmkindik aldy. Al  bul kúnde «Jibek jolyn» jańǵyrtýǵa oraı «Batys Eýropa - Batys Qytaı avtojolynyń» qurylysy qyzý qarqynmen júrgizilýde.

Elimizdi  ındýstrıalandyrýdyń alty jyly  ishinde ındýstrıalandyrý kartasy aıasynda barlyǵy 890 joba  iske  qosylǵan. Sonyń nátıjesinde 85 myń turaqty jumys orny ashylypty. Sóıtip Qazaqstan óz tarıhynda alǵash ret álemniń elý jetekshi eksporttaýshylarynyń  qataryna qosylyp, 43-shi orynǵa taban  tiredi.

Prezıdentimiz «Qazaqstan - 2050» strategıasymen birge damyǵan 30 memlekettiń qataryna qosylý mejesin belgilegen edi. Sonyń mańyzdy bir qadamy retinde 2015 jyly Qazaqstan Dúnıejúzilik saýda uıymyna kirgenin de ataı ketken oryndy.

Qazaq jeriniń asty da, ústi de ken baılyqqa toly. Keleshekte sol baılyqty ıgere otyryp, halyq ıgiligine jarata bilsek, bolashaǵymyzdyń nurlana beretinine kúmán joq.           

---