InfoHub Logo

Almatyda QR Parlamentiniń Senat depýtattary Q.I.Sátbaev atyndaǵy Qazaq ulttyq tehnıkalyq zertteý ýnıversıtetinde respýblıkalyq jáne halqaralyq deńgeıdegi ǵylymı jáne bilim berý salasynyń tehnologıalary kórmesimen tanysty.

Kórmege qoıylǵan 10-nan astam jobany tamashalaǵan depýtattar ǵylymı jetistikterdiń óndiriske engizý, ǵylymı jumystary komersıalandyrý máselelerin tilge tıek etti.

«Bizde ǵylymı jetistikter kóp. Olardyń kóbi ekonomıkada óndiriske engizilmegen. Bizdiń maqsatymyz - osynyń quqyqtyq, ekonomıkalyq, uıymdastyrýshylyq mehanızmderimen ǵalymdardy, bıznesti sol jumysqa yntalandyrý. Parlamentte  «Ǵylym» týraly zań shyqty. Ǵylymı tehnologıalyq jumysty komersıalandyrý týraly zań shyqty. Ol qalaı engizilip jatyr? Qandaı nátıje beredi? Úkimet, mınıstrlikter, ǴZI tarapynan tıisti zańdy aktiler, reglamentter kerek. Zańdy kóbi bile bermeıdi. Instıtýttarda, JOO,  mekemelerde tıisti trenıń, semınarlar atqarylýy kerek. Ǵylymdy qarajattandyrýǵa memleket tarapynan jylda kóp bólinedi. Biraq bıznes oǵan bet burmasa nátıje bolmaıdy. Sol úshin arnaıy Ulttyq tehnıkalyq ýnıversıtetke kelip, ǵalymdarmen aqyldasyp jatyrmyz. Qarjylandyrýdyń arnaıy ekonomıkalyq, quqyqtyq mehanızmderi bar. Ǵylymı jumysty komersıalandyrý týraly zańda qarastyrylǵandaı, eń aldymen ǵylymı zertteý jumysynyń nátıjesin óndiriske engizip jatqan ujymdarǵa tıisti salyqtyq jeńildikter beriledi», - dedi Senattyń salalyq komıtetiniń tóraǵasy Aqan Bıjanov.

Aıta ketý kerek, QazUZTÝ-da ótken kórmege ǵalymdar men stýdentterdiń 10-nan astam jobalary qoıyldy. Atap aıtqanda taý-ken óndirisindegi, metalýrgıa, gıdrogeologıa salalaryndaǵy jobalar kóp.

«Óndiriske engizilip jatqan jobalar bar. Aldymen aprobasıadan ótedi. Olardyń biri komersıalandyrý tehnologıasy boıynsha munaı qaldyǵyn jerden sorý, gıdrogelmen polısaharıdti qubyrǵa jiberip, tesikterdi bitep, joǵaryǵa syǵyndy retinde ıterip shyǵarady. Bul joba «Qarajambasmunaı», «Torǵaıpetroleým» óndirisinde testileýden ótip jatyr. Al elektrzarádtaý stansıasy jobasy keshe Megasentrde ornatyldy. Bizdiń ýnıversıtette de bar. Bul jobanyń da bolashaǵy zor. Barlyq qazaqstandyqtar túbi áıteýir ekologıalyq qaýipsiz qýat kózine kóshetini belgili», - dedi ýnıversıtettiń kommersıalandyrý tehnologıa bóliminiń bastyǵy Aldońǵarov Esen.

Búgin atalǵan oqý ornynda «Ǵylymnyń ekonomıkaǵa ıntegrasıalanýy» taqyrybynda konferensıa ótedi. Jıynǵa QR BǴM Erlan Saǵadıev, JOO basshylary, ǵalymdar men iri bıznes ıeleri qatysady.

Derekkóz: inform.kz

---