InfoHub Logo

Keshe keshke, Almaty aerovokzalynda, jarqyraǵan elektr nurynyń astynda eki halyqtyń úlken toby taǵy da bir kúlimdese, shurqyrasa qushaqtasty. Ystyq júrekten shyqqan eń qymbatty sózderimen bir-birine shashý shashty. Uly orys ádebıeti men kórkemóneriniń Qazaqstandaǵy onkúndiginiń bastamasy edi bul. Kórkemónershiler óz sózderin ózderi aıtar. Al, ádebıet dúnıesinde osy onkúndik búgin bizder úshin, erteń tarıh úshin úlken oqıǵa, halyqtar dostyǵynyń aıqyn bir kórinisi.

Ádebıet dostyǵy berik dostyq. Adam óneriniń ishinde eń uzaq jasaıtyndarynyń biri ádebıet. Ǵasyrlar ótedi, ómirge talaı urpaqtar kelip, talaı urpaqtar ketip almasyp jatady. Naǵyz ádebıet sonda da qalyp qoıady. Ómirdiń shejiresin keıingi urpaq, jańa qaýym ádebı muralardan kórip otyrady, jaqsysyna súısinse, jamanyna renjip otyrady.

Partıa, halyqtyq sovet ádebıeti óz zamanyn jyrlaýmen qatar, sol zamannyń beınesin keıingilerge, qazirgi syrtqy elderge kórsetetin naǵyz qudiretti ádebıet.

Sovet ádebıetiniń túri, syry, tili kóp. Solardyń ishinde osy orys ádebıeti úlken arna. Bári soǵan quıady. Ol arnadan sýsyndamaıtyn sovet jerinde eshbir halyq joq. Ári sýsyndaıdy, ári toltyrady osy arnany.

Bir kezde oıdaǵy orystyń Tatánasy men qyrdaǵy qazaqtyń Qyz Jibegi ún qosqan, ejelden sybaılas, muńdas eki el búgin ádebıet pen kórkemónerdiń saltanatty merekesin ótkizip jatyr. Bul mereke ádebıetimiz ben kórkemónerimizdi bir jańa beleske kóterip tastaıtynyna kúmán joq. İske sát, joldastar!

1964

---