InfoHub Logo

Men ózim jýrnalısik qyzmetimdi «Lenınshil jastan» bastaǵanyma qýanam. Óıtkeni munda jastyq jalyndy otqa da, sýǵa da salasyn, tynym tappaı udaıy izdenýde bolasyń. Al izdený degen — tvorchestvo tolǵaǵy, qaı jaǵynan bolsa da qamshylaıtyn kúsh. Ol boıyńa sińip alǵan soń, qaıda júrseń de saǵyndy syndyrmaıdy, júzińdi jarqyn etedi eken. Bul bir ǵana meniń pikirim emes. Al kollektıvtik izdenis bolsa she! Úlken baqyt, úlken tvorchestvolyq laboratorıa sonda. Buǵan kezinde olaı dep qaramaýyń da múmkin. Ómirdiń, býyrqanǵan jastyqtyń qajettigi, úırenshikti is dep qana bilesiń. Esil dertiń sol qajettilikti ótesem - aý, qatardan qalmasam - aý degen oıda ǵana bolady. Al sol úırenshikti iste úlken ónege jatsa she! Qaz qalpynda bárin qaǵazǵa túsire almaǵanyńa ókinesiń. Degenmen keı sátterge búgingi bıik deńgeıinen qarasań, ózgege de ulaǵat bolarlyq ómir izderin baıqaǵandaısyń, talpynys izderin kórgendeısiń.

Sonymen kezinde Sattar Erýbaevtaı, Baýbek Bulqyshevtaı or minezdi órender qalamyn qaıraǵan respýblıkalyq jastar gazetiniń redaksıasyna elýinshi jyldardyń bas kezinde ýnıversıtettiń, bir top túlegi kelip qaldyq. Soǵys jyldary shyǵýyn toqtatyp, 1946 jyly qalpyna keltirilgen bul gazet bizdi qyzyqtyrdy da, qunyqtyrdy da.

1952 jyly ıanvarda ádebı qyzmetker bolyp redaksıanyń esigin ashqan, odan keıin bólim meńgerýshisi, jaýapty hatshynyń orynbasary, sosyn jaýapty hatshy bolǵan maǵan «Lenınshil jas» ámse ystyq kórinedi. Mynaý joldar gazettiń 50 jyldyǵyna baılanysty arnaýly nomer úshin jazylǵan, onyń «ardagerleriniń» biri dep toıǵa shaqyrylǵan adamnyń keıbir este qalǵandary bolatyn. Qysqa jazylsa da birsypyra syrlar bar sıaqty.

Maı. 1955 jyl. Kúndelik jazý buryn daǵdymda joq-ty. Osy sapardan keıin jazǵym keldi, ańsarym qatty aýdy. Barlyq bastan keshirgenderińdi este saqtap qala alasyń ba. Al qazir qandaı mándi oqıǵalardy kórip júrsiń. Bárin bolmaǵanmen negizgilerin túrtip júreıin, kúnde kórgendi estigenderdi tizip jaza almaspyn. Degenmen, shama kelgenshe eleýlisin eske saqtaýǵa erinbeıin.

Mine tyńǵa shabýyl bastalǵaly ekinshi jyl. Osy sapar qatty áser qaldyrady. Ǵajap kórinis. Ǵajaptyq shalqar teńizdeı ushy - qıyrsyz tolqyǵan eginde emes, osy óńirge kelgen bólekshe bir ómir lebinde.

Tusalmaı, qysylmaı jazsyn degendeı tyń ıgerýmen baılanysty gazetimizdiń de kólemin ulǵaıtty. Jetisine úsh ret shyqsa da, burynǵydaı býlyqpaı, arqamyz keńip qalady. Jigitter «kósiletin boldyq endi» dep qýanysyp júr. Eńsemiz joǵary, etekteı gazet shyǵaryp, el qataryna qosylǵandaımyz. Osy úlkeıýdiń ózi kollektıvke bólek bir jiger ákelgendeı. Iá, endi barymyzdy salyp kóreıik. Burynǵy ókpe gazettiń shyndyǵy edi ǵoı.

12-fevral, 1956 jyl. Úlken oqıǵa. Partıanyń XX seziniń qarsańy. Búrsigúni nomer soǵan arnalmaq. Qalaısha ádemi etip shyǵarý kerek? Bul oqıǵanyń ózi halqymyzdyń ómirindegi eleýli kezeń bolsa, oǵan arnalǵan nomer eleýli bolýǵa tıis qoı. Osy oı bárimizdi baýraǵan. Sapar, Bekmyrza, Baıanjan janyn salyp ishki eki betti jazyp jatyr. Taqyryptary jaqsy: «Búgingi bizdiń joba — erteń ómir shyndyǵy». Aıtar oı kóp, syımaıdy, — dep júr olar. Biraq úsheýi de birimizden - birimiz jaqsy shyǵarsaq degendeı ishteı básekelesýi. Bul nomer bul úsheýine ǵana emes, búkil kollektıvke syn sekildi. Mine maketpen bas qatyp men otyrmyn. Birinshi betke plakat, ortasynda notasymen partıa týraly on. Osy varıanty ózime unaıdy. Óıtkeni, plakatty notamen berý jańalyq. Taǵy da qandaı jańalyq tabylady, oılaný kerek.

25-mart, 1956 jyl. «Syn semseri» keldi ómirge. Sońǵy ýaqyttaǵy súbeli jańalyqtyń biri. Búgin alǵash berilgendikten be, osy betke qaıta-qaıta qaraı bergim keledi. Taqyryby aıbyndy - aq: «Sóz qysqa: búrokrattyqty kedergi, keselimen, Túıreımiz ótkir synnyń semserimen».

Qolynda naızasy, júıtkip bara jatqan atty. Onyń eshkimmen taısalar túri joq. Iá, qazir osyndaı tilip túsetin semserdeı ótkir syn kerek qoı. Kemshilik ataýlyǵa qyrǵıdaı tıetin qural gazet betinen kórindi me deımin. Endi osy semserdi maıyryltpaı silteı bilsek, «Syn semseriniń» alǵashqy betin ázirlegen Ábilpeıiz Ydyrysov. Endi bul semserdi árqaısymyz qolǵa alsaq shirkin.

14-fevral, 1957 jyl. Kún artynan kún, aı artynan aı, jaqsy máseleler týyp keledi. Bıylǵy jyldyń ózi kollektıv úshin tvorchestvolyq órleý jyly bolǵaly turǵandaı. «Gazetteriń barǵan saıyn qulpyryp barady» degen áńgimeni jıi estımiz. Jaqsy lebiz — jarym yrys demekshi, bul sózder qanat bitirgendeı. Mine, osy bir másele de taǵy bir bedel qosty - aý deımin. Jaraısyń Kamal! Seniń "Qyz namysyń" shyrqaý bıigine jetti. Osyndaı sezimtaldyǵyń, baıqaǵyshtyǵyń unaıdy - aý bárimizge.

Tamasha, shynynda da jaqsy másele. Bul áńgimeniń kóterilýi tek qyzdardyń ǵana namysyn oıatyp qoıǵan joq. Bizdiń jigitterdiń de «namysyn» qozǵaǵan sekildi. Baıqaımyn, bul kúnderi árkim de osyndaı jańa máseleni jazýǵa tyń másele kóterýge nıetti.

3-mart, 1957 jyl. Baıanjannyń ulandyq dostary meni de sharshatty. Biraq búgin nomerdi qarap otyrsam, eńbegimiz zaıa ketpepti. Birinshi bettiń ózinde - aq búkil klassymen malǵa attanǵan Shyǵys Qazaqstan oblysy, Ulan aýdanyndaǵy jas jalyndardyń ıgi isi jarqyrap kórinip tur. Tórt bettiń tórteýi de osylarǵa arnalǵan. Turady arnaýǵa. Úlken istiń qarlyǵashtary ǵoı. Sol qarlyǵashtardy qalaı qondyram, qalaı ushyram dep maketpen biraz áýre bop em. Bir qaraýǵa jaman emes sekildi.

1-aprel, 1957 jyl. Jigitter bizdiń taý qopar deseń taý qoparady «Jańa, tyń másele» dep jan ushyrady. Osy órleý barǵan saıyn bárimizdi baýrap barady. Tizseń biraz máseleler qatar túzegen sekildi. Kamaldyń «Qyz namysy», Ábilpeıizdiń «Syn semseri», Baıanjannyń «Ulany», Bekmyrza men Sattardyń «Komsomoldyq istiń syrlary», Haıdollanyń «Malǵa 15 myń jasty jibereıigi» — bári-bári sala-sala bolyp oryn alady. Buryn bir nomerge bir qyzyqty materıaldy berýge zárý bolsaq, endi mine meni jiber, dep talasyp turatyn materıaldar kóbeıdi. Ásirese Haıdolla, óz sózimen aıtqanda mashınka janynan shyqpaı «bajyldap» otyryp alady.

6-ıiol, 1957 jyl. Festıvál! Festıvál! Festıvál! Osy úsh sóz jyl basynan gazet betinen túspedi. Festıvál jumysymyzǵa da bólek serpilis ákeldi. Birinen-biri ótken birneshe nomerler shyǵaraıyq dedik. Kóregen Aqıqatuly da osy festıvál kúnderi týdy. Mine «Kóregen» boı bas maqala jazyp otyrmyn. Jigitterdiń oıynan shyǵa alamyn ba, Kóregenniń atynan sóıleýdi maǵan tapsyrdy. Bas maqalany bitken soń maketke kirisýim kerek. Keńsede úlgere almaı úıge ákeldim maketti. Bar «ónerińdi sal» dedi jurt. «Festıvál kúnderin qatyryp shyǵarý kerek» dep jatyr. Kóreıin endi shamam kelgenshe.

Bul jolǵy Telmannyń kómegi úlken boldy. Baǵanaǵy jasaǵan maketteri ádemi - aq. Sekretarıatqa jańa bir lep ákelgen sekildi. Festıvál kezinde «Shattyq» dıspecheri bolýdy da soǵan tapsyrdyq. Sekretarıatqa ǵana emes, bıyl osy bir jańa lep, redaksıadaǵy jas tolqynmen birge kelgendeı. Telman, Sherhan, Seıdahmet, Qalıhan, Sovhozbek, Baıbolsyn... Osy tolqyn —ózindik órnegi bar, úlken úmit kúttirer tolqyn. Qyrandaı qanattaryn qomdap, bıikke ushqysy keledi. Festıvál bárimizge de úlken syn bolǵaly tur.

7-ıýl, 1957 jyl. Búgin bárimiz de kesh qaıttyq. Jumys kúndegiden kóp boldy. Biraq sharshamaǵan sekildimiz. Qyzyǵyp istegendikten bolý kerek. Erteń taǵy da festıvál «áýresi». Bárimiz de ashana aralap kettik. Onyń sebebi de bar. Óıtkeni, redaktorymyz Abaı Beısembaevtan basqa eshqaısymyzda úı joq. Jigitter ózara qaljyńdaǵanda:

— Tyń ıgerýshiler de túgeldeı páterli boldy. Biz áli palatkada turamyz, — deıdi.

Biraq bul jaı eshkimdi de renjitpeıdi. Bárinde de — bólekshe bir órlik. Jumystyń qyzyqtyǵy basqa olqylyqtyń ornyn toltyrǵandaı. Shirkin-aı, osyndaı jigitterge bir-bir páterdiń kiltin ustata salar ma edi.

10-oktábr, 1957 jyl. Bıyl Uly Oktábrdiń 40 jyldyǵy. Bes nómirdi qatar ázirlep jatyrmyz. Birinen-biri ótsin — uran osy. Jigitter ıdeıa izdep, materıal izdep jan-jaqqa ketti. Jańa bedel, jańa abyroı ákeletin nómirler bolsyn. Árkimniń alǵa qoıǵan maqsaty osy.

Gazetke jazylýdyń alǵashqy kúnderi de qýantty. 1955 jyly tırajdy 40 000-ǵa jetkizý arman edi. Mine 70 000-nan asyp ketipti.

Tamasha! Pátersiz - aq bolaıyq, tırajymyz óssinshi, gazetimiz kemeldensinshi.

13-maı, 1958 jyl. Búgin Sovhozbektiń Zeınolla Shúkirov jóninde jazǵan ocherk - betin talqyladyq. Jaqsy jazylǵan. Sonyń ózinde shıraı tússin dep kóp pikir aıttyq. Taǵy da ónde dedik. Sovhozbek qınalsa da kelisti. Óıtkeni, jigitterdiń nıetin túsindi. Jaqsara tússe oǵan da abyroı ǵoı.

Osy bir talqylaý dástúrge aınaldy. Kimde-kim tyń másele kóterip, qyzyqty dúnıe jazsa, jınalamyz da oqımyz, oqımyz da talqylaımyz. Sovhozbek te, mine, osy talqylaýdan ótti, dostardyń, qalamdas joldastardyń qaltqysyz pikirin tyńdady.

Baılyq degen jaqsy ǵoı. Biraq dástúr baılyǵyna, izdený baılyǵyna, ne jetsin. Bir jańaǵa bir jańa, bir oıǵa bir oı quıylsa gazet dástúri bolyp qalyptasa bermeı me!

27-sentábr, 1958 jyl. Shirkin-aı, alty jylǵa jýyq ýaqyt qalaı zyr etip óte shyqqan. Búgin tolqý ústindemin. Biz de «káriler» qataryna qosylyp, endi basqa jumysqa aýysý qamyndamyn. Jyl saıyn jas tolqyn, jaqsy tolqyn kelip qosylyp jatyr. Sony qımaımyn. Áli isteı tursam deımin. Demalysqa shyqqanmen eshqaıda barǵam joq. «Kelinniń betin kim ashsa, sol ystyq» degendeıin ushqan uıany qıyp ketkim kelmeıdi. Jigitter de qıatyn jigitter emes. Bárinen de ystyǵy solardyń móldir dostyǵy, jastyq otymen jarqyraǵan tamasha jarastyǵy.

Jarastyq demekshi... reaksıada keıingi kezde komsomoldyq toılar kóbeıdi. Ol zańdy da. Jas jigitter boıdaq bolyp qashanǵy júre beredi. Úıi bolmasa da úılenetin mezgilderi jetti. Páterdiń joqtyǵyna qaratatyn emes. Ómirdiń jarasymdy jaqsy talaby. Kóńildi bir toılar naýqany bastalǵandaı. Nyǵmet Ǵabdýllındi, Rahmetolla Ydyrysovty, Myńbaı Rashevti, Bekmyrza Baımahanovty, Sapar Baıjanovty, Sherhan Murtazaevty ózimizshe bar sán - saltanatymen qutty oryndaryna qondyrǵandaımyz. Bir-bir qyzǵa qosaqtadyq ta jiberdik. Baratyn úıler kóbeıdi. Buryn salmaq Haıdollaǵa, onyń kelinshegi Máýlege túsýshi edi. Boıdaqtar dámdi as ishkisi, demalǵysy kelse, sonda aı-shaıǵa qaramaı jınalyp qalatyn. Endi Máýleniń de júgi jeńildedi, kel dep úıge shaqyrar kelinshekter kobeıdi. Páter jaldap turǵanmen báriniń de peıili keń. Ony «Lenınshil jastyń» qalyptasa bastaǵan taǵy bir dástúri dep sanadyq.

Toılar da birinen soń biri qyzyqty bolyp barady. Ándetip baramyz, ándetip qaıtamyz. Jańa túsken kelinderge aıtar betashardyń mazmuny: jýrnalıske qosyldyń, shydamdy bol, ol eldi kóp aralaıdy, túnde baspahanada túneıdi. Jumysynyń sıpaty — ýaqytpen sanaspaý, biraq týra joldan adaspaý. Sosyn óleńdetip jónelemiz:

Keshigip qalsa tyrjıma,

Kúlip júr úıde ylǵı da.

Gazetińdeı jigitiń jalyn bop júrsin,

Jurt izdep oqyr daryn bop júrsin,

Sońyra pensıaǵa shyqqanyńda,

Aty áıgili jýrnalıs shalyń bop júrsin.

Qalamaqyny da kúıeýiń kóp taýyp,

Kelinjan, qaltań ámse qalyń bop júrsin.

Jańadan túskenderdiń bárine «Lenınshil jastyń» kelini degen arnaıy ataq berildi. Óleńdi redaktorymyz Abaı Beısembaevtan bastap bárimiz aıtamyz. Sovhozbek Toǵysbaevtyń (keıin ol Bek boldy) neopalıtan ánderin aıtýy tipti ańyz bolyp ketti. Osyndaı toılardyń erteńinde kollektıv burynǵydan da tutasyp, burynǵydan da sulýlana túskendeı. Búrkit Ysqaqov pen Baıbolsyn Jumataevtyń, Bek Toǵysbaevtyń úılený toılary da bólekshe este qaldy. Toı ótkizýdiń ózinde de «Lenınshil jastyń» qoltańbasy kórine bastady. Sol jarastyqty qımaımyn.

Sóıtip tolqyp júrgen kezimde Sapar «Jańa lep» degen kitabyn Kolyma ustata saldy. Onyń alǵashqy betinde: «Kákimjan! Osy bolymsyz enbegime kóziń túskende «Lenınshil jasta» birge istegen otty jyldardy, ondaǵy tamasha jigitterdi esińe alarsyń!» depti. Osyndaı aıaýly kollektıvten túbi ketetinimizdi bilip jazǵanyn kórdiń be.

Joq, men odan kettim dep eshýaqytta sanamaımyn. Qalam ustaýdy úıretip, boıdaǵy otty tutatqan, tusaýyńdy kesip, turlaýly jolǵa salǵan gazetten, onyń jaqsy dástúrli kollektıvinen qalaı ǵana kettim dersiń!

Bul kúnde «Lenınshil jasta» sol jyldary istegenderdiń aldy alpystan asyp ketti. Biraq sonaý bir qımas jastyq shaqty bári de saǵyna eske alady. Ádemi ómirler órilip, talanttar kásip shyǵypty. Basqany bylaı qoıǵanda sol jigitterdiń ishinen «Lenınshil jas» ózine úsh redaktordy tańdady. Sattar Bóldekbaev, Sherhan Murtazaev, Seıdahmet Berdiqulov. Jastar gazetine tán jaqsy dástúrlerdi damytýda bulardyń sińirgen eńbegi az emes. Sherhan júrgen jerden, ol basqarǵan basylym betterinen «Lenınshil jastyń» órligin árqashan kórgendeımiz. Seıdahmet bolsa, osy gazetti qımaı, jıyrma jylǵa taqaý bir tolqynnan soń bir tolqynnyń jastyq otyn boıyna jınaýmen boldy. Redaktorlyq rekord degen bolsa, ol sonyń ıesi. Al aramyzdan erte ketken Sattardyń qazasy lenınshil jastyqtardy taǵy da uıystyryp ketti desem, bul artyq aıtylǵan sóz emes. Sol bir 1967 jylǵy 25 martty qaısysymyz bolsaq ta umytqan joqpyz. Qımas qalamdas dostyń, ári jas ketken azamattyń qazasy meıilinshe aýyr boldy. Jıyrma jyldan soń papasynan alty jasynda qalǵan Muratty úılendirdik. Ol da áke jolyn qýyp jýrnalıs mamandyǵyn tandap aldy. Bul toıǵa da sonaý elýinshi jyldardaǵydaı bárimiz túgel jınaldyq. Sonda jazylǵan mynaý óleń joldary biraz jaıdy ańǵartady - aý deımin.

Sattardyń balasy Murattyń úılený toıyna.

O, Sattar, basyń kóter kór mynany,
Ah uryp, artyń seniń kóp jylady.
Muratyń muńdaryńdy tıyńdar dep,
Er jetip, otaý tigip bas qurady.
Aldymen ata bolyp al sózińdi,
Batany aıt balalarǵa bal sezimdi.
Senimen birge ótken sonaý kúnder,
Terbeıdi - aý, tolqytady - aý jan sezimdi.
Qudańdy, qudaǵıdy qushty káni,
Úlbirep Svetań da týr ǵoı áni.
Burylmas ol dúnıeniń kemesinen —
Bir sátke, myna toıǵa tússhi káne.
Bul toıda bal kúnder diń izderi bar,
Bul toıda bal kúnderdiń kúzderi bar.
Bul toıda óziń bilgen qurbylardyń,
Bul kúnde qartań tartqan júzderi bar.
Bul toıda aq tileýli anań otyr,
Bul toıda Sebep, Málik panań otyr.
Bul toıda qanshama jyl qaıyssa da,
Otyńdy óshirmegen Janar otyr.
Bul toıda Ábekeńdeı aǵań otyr,
Bul toıda Gúljan gúliń balań otyr.
Bul toıda kópten kútken týma-týys,
Keler dep bir ózińe qarap otyr.
Bul toıda Tóleýhandaı shaldar otyr,
Bul toıda abzal nebir jandar otyr.
Bul toıda Muratyńnyń qurbylary,
Jaqsylap ótkizýdi qamdap otyr.
Bul toıda joq bolsa da Jákeń otyr,
Bul toıda Sherhan, Seıdash, Kákeń otyr.
Ázińniń ámirińe ózek bolǵan,
Rýhyn «Lenınshil jastyń» ákep otyr.
Oý, Sattar, endi - daǵy kelmeısiń be,
Qyzyǵyn myna toıdyń kórmeısiń be.
Keı jeri retine kelmeı jatsa,
Durystap, óziń jóndep bermeısiń be.
0, qıal, ósip keıde barlaısyń - aý,
Jaqsymen jan perdesin jalǵaısyń - aý.
Qımas dos ólimin de umyttyryp,
Aldaısyń - aý, bir sátke, aldaısyń - aý.
Sóz arnasyn azyraq dosqa burdym,
Bul úshin quda-jekjat, keshir qurbym.
Balalar baqytynyń basy bolǵan,
Aınaldym osy kúnnen osy jyldyń.
Jemisi máýelesin baqtaryńnyń,
O, baqyt, bul jastarǵa aqtarylǵyn.
Qalaısha men tebirenbeı týra alamyn.
Bul otaý jalǵasy ǵoı Sattarymnyń.

Bárimizge aǵa sekildi, kóbimizdiń alǵashqy redaktorymyz bolǵan Abaı Beısembaev jóninde aıtar sóz bólekshe. Adamdardy qaltqysyz tanıtyn qabiletimen, qashanda bir qalyptan jazbaıtyn súıkimdi qarapaıymdylyǵymen ol ózin jastar arasynda úlken qurmetke bóledi. Redaktor da báıge atyn jaratatyn bapker sekildi ǵoı. «At shappaıdy, bap shabady». Osy maqaldy tvorchestvo tiline aýdarsaq, sol bir jastardyń ómir bastaýynda osy kisiniń turǵany qandaı jaqsy bolǵan. Ábekeńniń adam alalamaıtyn kóńil móldirligi kóbimizge juqqandaı - aý.

Úlken úmit kútken jas darynnyń biri Telman Januzaqov edi. Ol «Lenınshil jasta» redaktordyń orynbasarlyǵyna deıin kóterilip, keıin «Pravda» gazetiniń tilshisi boldy. Telmandy da, Baıanjan Mádıevti de ajal ortamyzdan erte áketti. Biraq olardyń jas kezindegi jaqsy qadamy, jarqyn minezi kollektıvtik tvorchestvoda aıshyqty kúıinde qaldy.

«Lenınshil jas» túlekteriniń ósý joly, ómir joly jalpy qazaq jýrnalısıkasynyń bederine belgili iz qaldyrdy dep bilem. Solardyń biri — Sapar Baıjanav «Sosıalısik Qazaqstan» gazetiniń redaktorlyǵyna deıin kóterildi. Birneshe kitaptyń avtory, ǵylym kandıdaty Muqan Mamajanov, Haıdolla Tilemisov respýblıkaǵa belgili baspagerler, Qazaq SSR- iniń eńbek sińirgen mádenıet qyzmetkerleri. Kitap shyǵarý óneri jóninde bul kúnde qandaı aýdıtorıada bolsa da kemeldi pikir aıta alatyn azamattar. Bekmyrza Baımahanovtyń útiginen ótpegen jastar ol kezde kemde-kem shyǵar. Ózinen góri ózgege kóbirek eńbek sińirýdi Bekeńnen úırený kerek dep júretin qýaqy jigitter. Jas shybyqtaı bylqyldaǵan balaýsa talaptardy táı - táıleýge erinbegenniń biri sol kisi. Bul kúnde ol da eńbegi sińgen mádenıet qyzmetkeri, jýrnalda jumys isteýdiń mol tájirıbesin jınaǵan adam.

Kamal Smaılov jaýapty partıa qyzmetinde bolsa, Ábilpeıiz Ydyrysov jýrnalısterdiń keleshek urpaǵyn daıarlaý vahtasynda. Ekeýi de ǵylym kandıdattary.

Kezdesip syrlasa qalǵanda aramyzdan shyqqan eki ǵylym doktoryn — Nyǵmet Ǵabdýllın men Rymǵalı Nurǵalıevtyń maqtana aıtamyz. Al ǵylym kandıttarynyń ózinen bir ǵylymı-zertteý ınstıtýty ı jasaqtaýǵa bolar edi.

Belgili aqyn-jazýshylar Juban Moldaǵalıevtyń, Ábish Kekilbaevtyń, Oralhan Bókeevtiń, Qalıhan Ysqaqovtyń jotaly shyǵarmalaryn oqyǵanda ekiniń biri bulardyń da tusaýyn kesken, qanatyn qataıtyp ushyrǵan «Lenınshil jas» ekenin bile bermeýi múmkin. Sol bir jyldardaǵy eńbegi arqyly osy bir kemel talanttardyń qol tańbasy jastar gazetinde qalsa, gazettiń de qoltańbasy, olardyń shyǵarmasynda júrgeni kúmánsiz.

Ol jyldardaǵy umtylmas oqıǵalardyń biri — Shyńǵys Aıtmatovtyń tyrnaq aldy shyǵarmasy «Jámıla» povesiniń qazaq tilinde tuńǵysh ret «Lenınshil jasta» basylǵany. Ony qyrǵyz tilinen aýdarǵan ómirden erte ketken, belgili ádebıet zertteýshisi Qaljan Nurmahanov bolatyn. Sattar Bóldekbaevtiń redaktor kezinde osy shyǵarmanyń jarıalanýyna baılanysty jas Shyńǵystyń Almatyǵa kelýi, onymen birge redaksıada sýretke túsýimiz esten kete qoıar ma eken.

Bul shyǵarmanyń jarıalaný tarıhy da izdenýge toly jyldardyń bir nyshany sıaqty. Nendeı taqyryp qyzyq, oqýshylardyń jan - júregin qalaı baýraýǵa bolady — mine osy jaıly oılap, úzdiksiz tolǵaný árkimnen boı kórsetken qasıet edi. Bul kúnde gazet tırajy 200 myńǵa jýyq bolsa, ol óziniń árbir oqýshysynyń aıaýly aqylshysyna aınalyp otyrsa, bul redaksıaǵa jumysqa kelgen barlyq tolqynnyń, olardyń qoltańbasynyń arqasy degen sóz. Sol qoltańbalar tutasyp, izdenýden talmaý dástúrin qurady. Barlyq tolqyn da izdenissiz ómir tul dep eseptedi. Shynynda da solaı. Tvorchestvolyq shańyraq úshin izdený qýaty kúshti kún nuryndaı.

---