InfoHub Logo

Joldastar! Alystan, jýyqtan, dúnıeniń ár tarapynan kelgen qadirli qonaqtar, dostar!

Ulan-baıtaq qazaq jeriniń bir bólsheginde, ataqty Alataý baýyrynda búgin bárimiz bas qosýǵa sebep bolǵan Jambyl ataǵa taǵy da bir bas ıelik, rahmet aıtaıyq!

Jambyldy eske alǵanda onyń ushqan uıasyn, ıaǵnı týǵan elin, jerin eske almasqa bolmaıdy. Qazaq jeri keń, jerinen eliniń peıili keń. Ol jerde eń paıdaly ósimdikter, ol peıilde adamshylyq eń abzal qasıetter ósedi. Ǵalymdardyń ǵalymy Ál-Farabı, qazaq jazba ádebıetiniń ardageri Abaı, aýyz ádebıetimizdiń kenjesi alyp Jambyl, jasynan dana Shoqan... Bári-bári osy jerdiń, osy eldiń bel balasy. Biz, búgingi qazaqtar, solardy maqtan ete otyryp, etkenimiz ben qazirgimizdi, qazirgimiz ben keleshegimizdi salystyrǵanda tóbemiz kókke eki-aq eli jetpeıdi.

Bet ájimi qatpar-qatpar osynaý jatqan kóne jer talaı top jıyndy, qandy joryqtardy, kúńirengen eldi kórgen. Al, mynandaı merekeni kórgen emes. Adam men adam, el men el dostasqan, bir-biriniń qýanyshyna ortaqtasqan mundaı mereke bizdiń tusymyzda, tek Sovet elinde ǵana dástúrge aınaldy.

Ár halyqtyń ózine tán maqtany bar. Bir halyqtyń maqtany esh halyqqa jat emes, tek ony bir-biriniń bilýi shart. Júz jasaǵan Jambyldy bir kezde qazaq ózi tegis bilmeıtin, endi jer júzi biledi. Bildirip otyrǵan Sovet dáýiri.

Ol jıyrmasynshy ǵasyrdyń Gomeri edi. Gomer qaıta kelmese, Jambyl da kelmes. Biraq onyń izi, sózi tarıh betinde samaladaı saırap jatady.

Eshbir dán topyraqsyz, sýsyz ósken emes. Eshbir danalyq esiretin sebepsiz ósken emes. Súıimbaı, Shójeler bolmasa, qazaqtyń telegeı-teńiz aýyz ádebıeti bolmasa, aldyn kórsetkish shyraǵy, demeýshisi bolmasa, ataqty Jambyl ataqsyz bir Jambyl bolyp qala berer edi.

Jambyldyń dańqyn kótergen sebepter qazaq sovet ádebıetiniń de, ony jasaýshylardyń da dańqyn kóterdi. Aýyz ádebıetinde aýyz toltyra Jambyldy aıtsaq, jazba ádebıette Sáken, Muhtar, Beıimbet, İlıastar bastaǵan topty da aıta alamyz.

Búgingi qazaq eli jas túlek: oıy, isi, armany jańarǵan, julqynyp alǵa sharyqtap shyńǵa bara jatqan jańa qaýym. Kózdegeni komýnızm, bastaýshy Lenın partıasy, kómekshisi Sovet úkimeti. Mundaı qaýymda adamǵa adam jasaıtyn qıanat, qorlyq, zorlyqtarǵa oryn joq. Tek eńbek, óner, mádenıet, ádebıet gúldeıdi. Jambyldyń kóksegeni, jyrlaǵany osy edi. Uly adamdar, uly aqyndar óz ultynyń arnasyna syımaıdy, tek ınternasıonaldyq arnaǵa ǵana syıady. Olardyń ózi ólgenimen, dańqy ólmeıdi, qaıta órshı beredi. Bizdiń Jambyl dál sondaı aqyn.

1972

---