InfoHub Logo

Meniń shyǵarmashylyǵyma shapaǵaty tıgen jandardyń biri — Qabekeń, fılologıa ǵylymdarynyń kandıdaty, ádebıetshi, zertteýshi-ǵalym marqum Qabıbolla Sydıyqov boldy.

Sekseninshi jyldardyń basy bolatyn. Birde Túrikmenstandaǵy Krasnovodsk aýdandyq "Jumysshy" gazetiniń jaýapty hatshysy Esbergen İńirbaıuly úıine Qazaqstannan asa qurmetti qonaqtardyń keletinin aıtyp, birge bolýǵa shaqyrdy. Men onda "Jumysshynyń" bólim meńgerýshisimin.

Redaksıamyzǵa jaqyn turatyn Esbergenniń úıine barsam, eki qonaq kisi otyr eken. Biri Qabekeń de, biri Aǵzam Ybyraev degen azamat. Qabekeń sol kezde Almatydan oralyp, Fort-SHevchenko qalasy tarıhı-ólketaný murajaıynyń dırektory eken. Tanysyp-biliskennen keıin kezek ádebıet aýylyna, poezıaǵa qaraı oıysty. Baıqaımyn alǵashqy pikirlesýden-aq Qabekeń ekeýmiz bir-birimizge unap qalǵan sıaqtymyz. Ol Qanatbaı synyqshyǵa qaralýǵa kelgen eken. Qonaq bolyp, el qydyrýǵa asyǵys ekendikterin aıtty.

Qabekeń sol saparynda Krasnovodsk pen onyń mańynda turatyn qazaq aqyndary — Esenǵalı Bókenbaev, ákeli-balaly Ótkilbaı jáne Qudaıbergen Kópekovter sıaqty bes alty adamnyń óleń-jyrlaryn ózimen ala ketti. Buryn jekelegen óleńderim respýblıkalyq gazet jornaldarda jarıalanyp júrgen men de bir top óleńderim men sýretimdi berip jiberdim.

Arada biraz ýaqyt ótkennen keıin Mańǵystaýdyń sol kezde "Komýnıstik jol" atalatyn oblystyq gazetinde "Nur shasha ber, beıbit kún" dep atalatyn úlken taqyryppen bes-alty óleńim sýretimmen jarq ete qaldy. Qabekeń júrek tebirenterlikteı ǵyp alǵy sózin jazypty.

Qabıbolla aǵa 1994 jyly jaryqqa shyqqan tuńǵysh jyr jınaǵym "Boıtumarǵa" da alǵy sóz jazdy.

Ókinetinim Qabekeń aǵamyzben kóp dıdarlasyp, birge bolyp áńgimesin tyńdaı almadyq. Anda-sanda Almatyǵa bara qalǵanymyzda úıine telefon shalatynmyn. "Úıge kelseıshi,"-dep shaqyrǵan kezderi de boldy, biraq sáti túspeı-aq qoıdy. Arnaıy bir bararmyn dep júrgenimde aǵamyz dúnıeden ozdy. Endi ony eske alýdan, ol týraly estelik aıtýdan basqa qolymyzdan eshteńe kelmeıtin sıaqty.

Qaıran Qabeke, Qabıbolla aǵa, jatqan jeriń jaıly bolsyn, tirlikte óte kóp eńbektendiń, beınet pen qıyndyqty da az kórmediń, baqıda janyń jánnátta bolyp, nuryń shalqysyn, abzal aǵa!

---