InfoHub Logo

Osy 1924 jyldyń tamyz-qyrkúıek aıynan bastap Orynbor qalasynda tórt júzdeı jigitke shaqtalyp áskerı mektep ashylady. Mektep qazaq jigitteri úshin ashylady. Bul mekteptiń maqsaty — qazaqtyń bolashaq qyzyláskerine bastyqtar, úıretýshiler daıarlaý. Mekteptiń oqýy úsh topqa bólinbek: atty áskerdiń ǵylymyn ám tártipterin úıretetin bólim, jaıaý áskerdiń ǵylymyn ám tártipterin úıretetin bólim jáne zeńbirekti áskerdiń ǵylymyn ám tártipterin úıretetin bólim.

Bul mektepke qandaı oqýly ám qandaı jasty jigitterdiń alynatyny týraly ýaqytynda gýbernıa-gýbernıaǵa ám ýez-ýezge qaǵaz jiberilmek. Jáne bul tórt júz jigittiń orny Qazaqstannyń barlyq ýezerine mólsherlenip, bólinip jiberilmek. Ár gýbernıa ám ýez ózine tıgen oryndarǵa arnap jigitterin jiberýi tıis bolady.

Qazaq eńbekshileriniń jastary bul mektepke ýaqytynan qalmaı aldyn ala daıarlanyp kelýleri kerek.

Ásker oqýyna umtylýshy jastar kóp. Ýaqytynan kesh qalǵan jigitter kire almaı qur qalady. Sol sebepti aldyn ala qamdaný kerek.

Bul mektepke túsý úshin onsha kóp oqýdyń keregi joq. Hat biletin ám azyraq esep tártipterin biletin adam bolsa alynar dep oılaımyz.

Jáne bul mektepke osy kúni basqa qalalarda áskerı mektepterde oqyp júrgen qazaq jigitteri alynbaq (máselen, Qazan qalasynda áskerı mektepterde oqyp júrgen qazaq jigitteri alynbaq), biraq bul jigitter aldyn ala ózderiniń sanyn, bilimderin aıtyp, Qazaqstannyń áskerı komısarıatyna bildirip qoıýlary kerek.

Eńbekshil tapqa, Keńes úkimetine qyzyláskerdiń kerek ekenin jurttyń bári biledi. Qazaqstan úkimetine de qyzyláskerdiń kerek ekenin jurttyń, ásirese jastardyń bilýi tıis. Bul týraly úgit-nasıhat aıtpaı-aq jastardyń ózderi-aq ekpindi qamdanyp, bul mektepke túsýge talpynar.

Patshalardyń zamanynda ezilip, buǵyp, qorǵanshaq bolyp qalǵan qazaqtyń qalyń eńbekshil tabynyń jas azamaty, seni Keńes úkimeti áýeli maıdanǵa, jańa turmysqa shaqyrady! Seni Keńes úkimeti jalpy adamzattyń qataryna, teńdikti, baqytty, jańa turmysqa shaqyrady!

Erte talpyn, jas azamat!

28.03.1924 jyl

---